Коронавирус пандемияси сабабли мартда тўхтаб қолган Россия чемпионати элит лигаси 21 июндан давом эттирилади. РФИ ижроқўмининг навбатдаги йиғилишида бу борада тегишли қарор чиқарилди. Қолган дивизионларда эса мавсумни охирига етказмаслик маъқул кўрилди. Ушбу турнирлар якуни 17 мартдаги ҳолат бўйича чиқарилади. Айтганча, Россия футбол иттифоқи президенти Александр Дюковнинг таъкидлашича, мабодо қайсидир сабабларга кўра, РПЛ мавсумини ҳам муддатидан олдин якунлаш зарурати туғилса, қандай чора қўлланилиши аниқ. «Агар чемпионатни охирига етказиш имконияти топилмаса, натижалар мавсумнинг ортда қолган қисми юзасидан аниқланади. Бу чемпионлик, еврокубоклар йўлланмалари ва элитани тарк этадиганлар масалаларига бирдек тааллуқли», - деди Дюков. Ҳозиргача Россия чемпионатининг 30та туридан 22таси ортда қолган. Лигада «Зенит» етакчилик қилмоқда, ЧЛ зонасида «Локомотив» ва «Краснодар» ҳам бор, ЕЛ йўлланмалари учун эса «Ростов», ЦСКА ва «Динамо» даъвогар. Аутсайдерлар - «Крилья Советов» ҳамда «Ахмат».