Ўзбек футболида ўз мавқеи ва содиқ мухлисларга эга «Андижон» жамоаси жорий йилги чемпионат стартида чакки кўринмаган бўлсада, дастлабки 3та турда ғалаба нималигини билмади. Водийликлар 1-турда «Локомотив» майдонида мардонавор курашган ҳолда, ортга кичик ҳисобли мағлубият билан қайтишди.
Кейин Қаршида яна шу сценарий такрорланди. 3-турдан ўрин олган «Водий дербиси» («Навбаҳор»га қарши)да эса кучлар тенг келди. Хуллас, жорий мавсум яхши натижаларга даъво қилиши айтилган «Андижон» мажбурий танаффусга ғалабасиз чиққан 4та жамоадан бири бўлди. Аслида аввалги мавсум бошида ҳам шундай муваффақиятсизлик кузатилган ва жамоа кейинчалик ўйин бобида ўсиб борганди. Айниқса, бошқарувга Александр Хомяков таклиф этилгач, футболчилар янада жипслашишди. Янги мураббий жумладан, легионерлар хизматидан жойида унумли фойдаланиш йўлини топди. Дейлик, мавсумнинг биринчи қисмида майдонда нимаси биландир яққол ажралиб турмаган Радосав Алексич иккинчи даврада ажойиб ўйин намойиш қилиб, мухлислар қалбидан жой олди. Қисқаси, сербиялик футболчи ёмон таассурот қолдирмади, аксарият учрашувларда жамоа жонига оро бўлди, ишончни оқлади. У «Андижон» билан 1 йиллик шартнома тузганди ва мавсум якунида жамоа билан хайрлашди. Яқинда ижтимоий тармоқ орқали Радосав билан боғланиб, баъзи саволларга жавоб олдик. Айтиш жоиз, Алексич ҳам кўплаб легионерлар каби андижонлик мухлисларга алоҳида миннатдорчилик билдирди.

- Салом Радосав, ишларингиз яхшими? Ўтган мавсум «Андижон» сафида чакки тўп сурганингиз йўқ. Бироқ мавсум якунлангач, жамоа билан хайрлашдингиз. Нима, қолишингизни хоҳлашмадими?

- Аввало, айтишим керак, фаолия­тимда илк марта легионер сифатида ўйнадим. Тўғриси, уйдан йироқда яшашда бироз қийналдим, яна тил масаласида мушкулотларга дуч келдим. Чунончи, клуб сафидаги ягона сербиялик эдим. Аввалига менга унча ишонч билдиришмади, кўплаб учрашувларни захирада кузатишга мажбур бўлдим. Хайриятки, янги бош мураббий келгач, у билан тезда тил топишдик. Ўйинимнинг яхшиланишида айнан Хомяков катта ўрин тутди - у менга етарлича имконият бериб, доимий равишда асосий таркибдан жой ажратди.

- Мавсум бошида «Андижон» олдига 6-7-ўринларни эгаллаш вазифаси қўйилганди. Кейинчалик вазият бутунлай ўзгарди ва Суперлигада қолиш учун кураш олиб боришингларга тўғри келди.

- Ҳа, жамоанинг иккинчи даврадаги ҳолатидан келиб чиқсак, асосий мақсад кучлилар сафида қолишга айланди. Муҳими, Суперлигадан тушиб кетмаслик миссиясини бажара олдик. Менимча, аввалги мавсум «Андижон» учун хайрли якунланди.

- Четдан келган кишига мамлакат футболи савияси қандайлиги яққолроқ билинади. Хўш, ўзбек футболи ҳақида нима дея оласиз?

- Ўзбекистонда футбол биринчи рақамли спорт тури саналашини билардим, шунга яраша эътибор ҳам кучли экан. Савияга келсак, юртингизда шароитлар жойида - стадионлар, кийи­ниш хоналари, машғулотлар майдонлари талаб даражасида. Шахсан мен Суперлигани Сербия Премьер-Лигасига таққосладим. Тўғри, Ўзбекистонда «Пахтакор» бошқа жамоалардан яққол устун. Қолган иштирокчилар даражаси деярли тенг. Мухлислар ташрифи масаласида Суперлига бироз олдинда. Дейлик, «Андижон»нинг ўз майдонидаги ҳар бир ўйинини камида 10 минг мухлис кузатди. 

- Эшитишимизча, давралар оралиғида бошқа жамоалардан таклифлар олган экансиз...

- Ҳа, бир неча клуб вакиллари хизматимга қизиқиш билдиришди. Лекин ўша пайт «Андижон» билан шартномам бор эди. Яхши таклифлар тушса, балки яна Ўзбекистонга қайтарман...

- Андижонлик мухлислар юртимизда алоҳида ажралиб туришади, улар жамоа қуйи лигага тушиб кетган вақт ҳам футболчиларни ёлғизлатиб қўйишмаганди...

- Жамоа мухлислари ҳақида фақат ва фақат ижобиий фикр билдиришим мумкин. Улар мен учун Ўзбекистондаги энг яхши фанатлар ҳисобланишади. Хуллас, андижонлик мухлисларни асло унутмайман. Ҳозир салбий жиҳатлар ёки ўхшамаган нарсалар, камчиликларни гапирмайман. Нима учун? Чунки хотирамга фақат яхши кунлар, ижобий воқеалар муҳрланди.

- Клуб футболчилар олдида маош ҳисобидан қарздор бўлиб қолганди...

- Тўғри, орада молиявий муаммолар юзага чиқди. Лекин бу энди тарих ва ўша ҳолатни эслашни ҳам истамайман.

- Александр Хомяковнинг мавсум стартидаёқ истеъфога чиқарилганига муносабатингиз...

- Хомяковни бўшатишгани чакки бўлибди, бу ҳақда эшитиб, афсусландим. Шуни айтишим мумкинки, унинг малакали мутахассис эканлигига шубҳа йўқ. Хомяков билан ўртамизда самимий муносабат шаклланганди. Менимча, у жамоани ёмон бошқармади. Дейлик, иккинчи даврада натижаларимиз ижобий томонга ўзгарди. Ҳар ҳолда, ўйин бобида ҳеч қайси рақибга ютқазмадик, айрим ўйинларда яққол устунлик ҳам қилдик. Хуллас, Хомяковга имконият беришганида, у вазиятни яна ўнгларди, албатта.

А.ИСКАНДАРОВ суҳбатлашди.