Мавсум бошида ўз олдига камида ОЧЛга чиқиш вазифасини қўйган «Навбаҳор» шунга яраша, таркибини истеъдодли футболчилар билан кучайтиришга ҳаракат қилди. Янги ўйин­чилар қаторида «лочинлар» учун бегона бўлмаган асли тўрақўрғонлик Ислом Исоқжонов ҳам бор. Биз куни кеча шу футболчи билан боғланиб, турли масалаларда суҳбатлашдик.

- Ислом, суҳбатимизни пандемия туфайли юзага келган карантин мавзуси билан бошласак. Билишимизча, «Навбаҳор» мураббийлари ҳар бир футболчининг ўз уйида ишлашига мўлжалланган дастурлар тақдим қилишган. Айтингчи якка тартибдаги машғулотлар зериктирмадими? Қолаверса, мураббийлар дастурига қўшимча тарзда яна нималар билан шуғулланяпсиз?

- Аввало, оила даврасида касалликка чалинган барча беморларнинг тезроқ соғайишлари ҳамда бу бало батамом бартараф бўлиб, карантин даври тезроқ тугашини сўраб, дуодамиз. Машғулотларга келсак, уйда икки маҳал белгилаган тартибда шуғулланяпман. Бунда кўпроқ югуряпман ва мураббийлар топшириғини онлайн-назорат остида бажаряпман.

- Таъкидлаш керак, карантин туфайли нафақат салбий, балки ўзимиз учун ижобий саналган маълум жараёнларга ҳам дуч келдик. Хўш, сизда ҳам ижобий таассуротлар борми?

- Ҳа, албатта. Карантин баҳона уйда, оила даврасида бамайлихотир вақт ўтказдим. Шунинг баробарида уй ишларига вақт ажратиш имкони туғилди. Хуллас, карантиннинг ижобий томони - бу оила аъзоларимизга кўпроқ вақт ажратиб, фарзандлар тарбиясига етарлича эътибор қаратганимиз. Лекин салбий томони кўп, барибир. Ахир жамоавий машғулотлар, футболдан четда қолдик. Миллий чемпионат ўйинлари яқин орада давом эттирилиши мумкин. Шуни назарда тутсак, икки ой жамоавий машғулотсиз қолиш жуда ёмон ҳолат. Тўғри, уйда ҳам аниқ кўрсатмалар асосида ишладик. Лекин якка тартибда ва жамоа билан олиб бориладиган машғулотлар ўртасида фарқ катта, барибир.

- Тез орада қайта йўлга тушиши кутилаётган Суперлиганинг биринчи давра баҳслари катта эҳтимолки, мухлисларсиз ўтади. «Навбаҳор»да эса айнан мухлислар армияси катта куч саналади. Жамоа ҳар қандай ҳолатда ҳам, наманганлик мухлислар далдасини қалбан ҳис қилиб ўйнаши тайин, бироқ қийин, барибир. Хуллас, олдингизда ишончни оқлаш учун икки ҳисса куч билан харакатланиш мажбурияти турибди...

- Албатта, чемпионат тезроқ қайта тикланишини интизор бўлиб кутяпмиз. Афсуски, кўринишидан, маълум муддат мухлисларсиз ўйнашимизга тўғри келади. Начора... Биласиз, мухлислар айниқса, «Навбаҳор»нинг ярим кучи ҳисобланишади. Тан олиш керак, уларнинг кўмагисиз жуда қийналамиз. Чунки стадионнинг тўлишига ўрганиб қолганмиз. Очиғи, мухлисларсиз футболни тасаввур қилиш ҳам мушкул. Бинобарин, уларнинг бевосита трибунада қўллаб-қувватлашлари футболчиларга алоҳида ғайрат бағишлайди. Лекин вазият шуни тақозо этаётган экан, бунга кўникишдан бошқа илож йўқ. Албатта, мухлислар ҳурмати икки ҳисса куч билан ўйнашга ҳаракат қиламиз.

- Тушунарлики, бўш трибуналар остида ўйнаш ҳеч бир футболчига осон эмас. Айниқса, «Навбаҳор»дек фидойи мухлислар меҳрига таянадиган жамоалар бу ҳолатда кўпроқ азият чекиши мумкин. Лекин футболчиларнинг майдон тафтини соғиниб қолишгани ҳамда алоҳида иштиёқи бу бўшлиқни тўлдириши мумкинми?

- Ўзимиз истамаган ҳолда ўйинлардан четланиб туришга мажбур бўлдик. Очиғи, мушкул даврни бошдан ўтказяпмиз - футболни роса соғиндик. Менимча, чемпио­натнинг давом эттирилиши биз учун том маънода байрамга айланади. Лекин шу байрамни мухлислар билан баҳам кўролмаслигимиз ачинарли. Майдонда айнан мухлислар учун тер тўкамиз ва барчаси ижобий якун топишидан умидвормиз. Унгача эса ҳаммага сабр.

- Кун келиб, барчаси худди ҳозиргидек бирданига тўхтаб қолса, нима билан шуғулланган бўлардингиз?

- Аввало, Яратгандан бундай ҳолат қайта такрорланмаслигини сўраб қоламиз. Бироқ ҳозирги даврда ҳеч ким кутмаган воқеалар рўй беряпти. Саволингизга келсак, агар яна шундай ҳолатга тушсам, фақат уй юмушлари билан шуғуллансам керак. Чунки бошқа иш қўлимдан келмайди (кулади).

- Атрофдаги гап-сўзларга қараганда, «Навбаҳор» бу йил кубок ўйинларига алоҳида эътибор қаратади ва бу орқали ОЧЛ йўлланмасига эга чиқишни мақсад қилган. Сизнингча, катта таваккал эмасми?

- Ҳа, ОЧЛ сари ҳаракатланяпмиз. Лекин фақат кубок ўйинларига ёпишиб, чемпионатни ташлаб қўймаймиз зинҳор. Чунки ҳар икки мусобақада имконият бор. Қисқаси, ҳар икки мусобақада бирдек кураш олиб бормоқчимиз. Сиз айтган гап-сўзлар тарқалишига келсак, бунга жорий йилги кубок финали Наманганда ўтказилиши сабабдир. Ҳа, бундан фойдаланиб қолиш керак. Лекин финалгача узоқ йўлни босиб ўтиш талаб этилади.

- Келинг, энди Суперлига 1-турида «Пахтакор»га қарши кечган ўйинда сизга кўрсатилган қизил карточка ҳақида гаплашсак. Аслида нима бўлганди, ўйин­дан кейин ҳакам билан учрашиб, вазиятни муҳокама қилиш имкони туғилдими? Ўша вазиятга жамоадошларингиз қандай муносабат билдиришди?

- Очиғи, барчаси шундай тус олишини сира кутмагандим. Ўша вазиятда, «қизил» олганим заҳоти мураббийлар, футболчилар ва мухлислар ҳам мени қўллаб-қувватлаб, далда беришди. Лекин ҳакам билан гаплашганим йўқ. Чунки «шок» ҳолатига тушиб қолгандим. Қолаверса, бундай пайт ҳакамлар билан гаплашишдан маъно йўқ. Зеро, уларнинг ишини муҳокама қиладиган алоҳида мутахассислар бор. Барчасини уларга қўйиб бериш маъқул.

- Кўплаб мухлислар собиқ клубингиз - «Металлург»­ни «Пахтакор» фойдасига ишлайдиган иштирокчи сифатида кўришади. Айтингчи, Бекободда ўйнаганингизда, шу фикрларга мос келадиган ниманидир сезганмисиз?

- Ҳа, «Металлург»даги фаолиятим давомида бундай асоссиз гапларни кўп бора эшитганман. Лекин ишонч билан айтаманки, Бекободда барча ягона куч - аҳил оилага айланганди. Хусусан, рақибдан қатъий назар, ҳар бир ўйинга охиргиси ёки финалдек ёндашардик. Инчунин, натижаларимизнинг «Пахтакор»га умуман алоқаси йўқ эди. Аксинча, айни шундай гаплар урчимаслиги учун «шерлар» билан ўйинларда астойдил курашардик. Афсуски, бу каби бўлмағур гаплар ўтган йили роса кўпайди. Лекин айтингчи, бутун мавсум давомида «Пахтакор»ни қайси клуб мағлуб эта олди? Ҳеч бири!

- Сир эмас, футбол билан шуғулланишни бошлаган ҳар бир бола вақти келиб, кучли жамоаларда ўйнаш, хорижга кетиш ва ўз мамлакати миллий жамоаси сафида тўп суришни орзу қилади. Бироқ бизда кўплаб футболчилар учун бу орзу орзулигича қолиб кетади. Айтингчи, мамлакатимиздан маҳоратли ижрочилар етишиб чиқиши ва уларнинг кучли лигаларга йўл олишларида қандай тўсиқ, камчилик ёки муаммолар мавжуд?

- Менимча, футболчилар олдида ҳеч қандай тўсиқ ёки камчилик йўқ. Барчаси ўзимизга боғлиқ. Орзу-мақсадларга фақат тинимсиз меҳнат орқали эришиш мумкин.

- Бизнингча, айтайлик, Россия ёки Украина чемпионатларининг ўртамиёна жамоалари таркибини бемалол кучайтира оладиган футболчиларимиз кўп. Фақат уларга на қизиқиш бор ва на таклиф. Демак, бу масалада футбол агентлари жиддий бош қотиришлари керак. Бу фикрга қўшиласизми?

- Ҳар бир футболчида ўзига хос ўсиш, юксалиш даври бўлади. Бу мураббийлар кўрсатмаси асосида чиқиладиган марра, албатта.  Фаолияти давомида қандай ютуқларга эришиш футболчининг ўз қўлида. Мураббийлар фақат тўғри йўл кўрсатишади, кўрсатмалар беришади. Лекин айтганингиздек, футболчининг фаолия­тида агентларнинг таъсири ҳам кучли. Аслида фақат Россия ва Украина лигалари эмас, балки янада кучлироқ чемпио­натларда ўйнашга қодир йигитларимиз борлиги - айни ҳақиқат. Назаримда, бизда футболчи рекламаси суст, яна музокара жараёнига уста агентларга эҳтиёж катта.

- Агар хорижлик футболчиларга назар ташласак, уларнинг кўп ишларга вақт топаётганларини кўрамиз. Масалан, футболни ўрнига қўйиш баробарида саёҳатга чиқишади, шоулар ва ижтимоий лойиҳаларда қатнашишади, бизнес билан шуғулланишади, ҳаттоки, сиёсатга бефарқ қарамайдиганлари ҳам топилади. Бизда эса бошқача. Ҳар ҳолда, футболчининг майдондан ташқари ҳаёти унча ёритилмайди...

- Тан олиш керак, Европада футбол умуман бошқа даражага чиқиб улгурган. Ҳозирча уларга тенглашолмасакда, интилишимиз, ўрнак олишимиз керак. Аввало, пул эмас, шунчаки, роҳатланиш учун ўйнашни ўрганишимиз муҳим. Оддий бир ғалабанинг ўзи шунчалик ажойибки, буни сўз билан ифодалаш мушкул. Ўзимга келсак, шукр­ки, футболдан роҳатланаман, майдонда тўп тепиб, дам оламан. Буни таърифлаб беролмайман. Жамоангиз ғалабаси, чиройли ўйинлар, ажойиб голлар - барча-барчаси ажойиб ҳиссиётлар тақдим этади.

- Футболимиздаги муаммолар жамоатчилик томонидан тез-тез муҳокама қилинади. Футбол ичидаги инсон сифатида айтингчи, кўпчилик эътиборидан четда қолаётган яна қандайдир муаммолар ҳам борми?

- Ўзи футболдан ташқаридаги гап-сўзларга унча эътибор қаратмайман. Лекин бир гапни дангал айтишим мумкинки, салбий натижаларнинг аксариятида барча айб ўзимизда, яъни футболчиларда. Менимча, иш бор жойда хато ва камчиликлар кузатилади. Буни тўғри тушуниш керак.

- Куч, тезлик, дриблинг, аниқлик. Ҳаракатларингизда қайси жиҳатга алоҳида эҳтиёж сезасиз?

- Барчасига. Ҳали ўз устимда кўп ишлашим керак. Насиб қилса, терма жамоамиз либосини кийиб, жаҳон чемпионатида ўйнаш ниятим бор. Демак, сиз айтган барча жиҳатларни кучайтириб боришим талаб этилади.

Хуршидбек суҳбатлашди.