Франциялик жаҳон чемпиони - Одил Рами «Сочи» билан шартнома тузгач, кўпчилик буни Россия Премьер-лигаси иштирокчисининг жиддий кучайиши сифатида баҳолаганди. Жумладан, жамоа бош мураббийи Владимир Федотов фахрий футболчининг салоҳиятига алоҳида тўхталган, аммо охирида қўшиб қўйганди: «Афсуски, Одилда кичик жароҳат бор ва у ҳозирча «Сочи» машғулотларида қатнашолмайди». Энди маълум бўлишича, сочиликлар Рами билан шартномани бекор қилишди...

«СЭ» нашрида ёзилишича, ўртадаги келишув бекор қилинганига Рамининг айни ўша кичик жароҳати сабаб бўлган. Таъкидланишича, клуб шартномани 26 май куни музлатган. «Рами «Сочи»нинг тиббий назорати вақти тиззасидаги жиддий жароҳатни яшириб, уни енгил муаммо сифатида кўрсатишга уринган», - дейилади клуб изоҳида. Одил Рамининг агенти Косо Руис эса, жароҳат ҳақидаги хабарни ёлғонга йўйиб, барчаси пулга тақалишини айтмоқда. Унинг иддаосига қараганда, «Сочи» футболчига ҳали бир чақа тўламаган, Одил ҳаттоки, шартномага имзо чеккани учун белгиланган бонусни ҳам олмаган. У энди ФИФА ва CASга мурожаат қилиб, тўловни ундирмоқчи. Лекин агентнинг тасдиқлашича, Рами ва «Сочи» ўртасидаги шартнома чиндан ҳам, бекор қилинган.

Франциялик футболчининг Россияга ташрифидан яна бир эсда қолган ҳолат - бу унинг «Инстаграм» тармоғидаги саҳифасида раддия бергани. Аниқроқ айт­сак, Одил RMC Sportга берган интервьюси нотўғри таржима қилинганини айтиб, журналистлар билан жанжаллашишгача борди. Чунончи, Рамининг коронавирус туфайли фаолиятини айнан «Сочи»да якунлашни хоҳлаётганини айтгани ёзилганди. «Бундай деган эмасман. Шунчаки, карантин туфайли қаердадир «ўтириб қолиш»­дан чўчиётганимни айтгандим», - дея эътироз билдирди Одил. Амалда Рамининг «Сочи»даги фаолияти коронавирус сабаби билангина тўхтаб қолмади. Аслида у бошланмаганди ҳам...