Италиянинг «Аталанта»си «кўҳна қитъа» клуб футболида шубҳасиз, 1-ўринда турадиган ЧЛ турниридаги дастлабки уринишидаёқ не-не грандлар ҳавасини уйғотиб, чорак финалга сакради. Ҳа, футбол оламининг гултожи сифатида тилга олинадиган мусобақа шундан кейин мажбурий ҳолатда тўхтаб қолди. Қуйидаги мақолада эса ЧЛ ўйинларини қўмсашга улгурган мухлисларга озгина кўтаринкилик бағишлаш ниятида ва «Аталанта»га ҳурмат юзасидан нуфузли турнирга ёпирилиб кирган бошқа «қўрс» дебютантларни эсга олинди. Қани, кўрайликчи, қайси клублар илк уринишдаёқ қитъа футболини ҳайратга солишни уддасидан чиққан?

«Осер» (Франция)

Мавсум-1996|1997да чорак финал

Қандай йўлланма олган? «Осер» ўзининг барча сезиларли муваффақияти ва натижалари учун бир киши - Ги Рудан миннатдор бўлиши керак. У ўтган асрнинг 50-йиллари жамоада ярим ҳимоячи ролини бажарган ва мавсум-1961да илк марта бош мураббий ролида ишлаб кўрган. Ги Ру шу тариқа кейинги 40 йиллик умрини «Осер»ни юксалтиришга бағишлади. Жамоа бу вақт давомида садоқатли мутахассис раҳнамолигида Бургундия биринчилигидан Лига 1 чўққисигача бўлган йўлни босиб ўтди. 1995|1996 йиллар мавсуми эса давомли йўлнинг юқори нуқтасига айланди. Ўшанда бургундияликлар Франция элит лигасида «ПСЖ» ва «Монако»ни ортда қолдириб, чемпионликни тантана қилишган ва илк марта ЧЛда ўйнаш ҳуқуқини қўлга киритишганди.

Дебют мавсумида қандай иштирок этган? «Осер» нуфузли турнирга дадил қадам ташлаб, бир уринишда «Аякс» (аввалги икки мавсум финалчиси), «Рейнжерс» ва «Грассхоппер» ҳам ўрин олган гуруҳда 1-ўринни банд этади. Франция чемпиони чорак финал раундида эса турнирнинг бўлажак ғолиби Дортмунд «Боруссия»сига дуч келиб, ҳар икки ўйинни бой беради - 1:3 ва 0:1.

Жамоада кимлар ўйнашган? Лионель Шарбоннье, Бернар Диомед (бўлажак жаҳон чемпионлари, 1998 йил), Тарибо Уэст, Сабри Лямуши, Стив Марле...

«Байер» (Германия)

Мавсум-1997|1998да чорак финал

Қандай йўлланма олган? Кристоф Даум 1996 йили «Байер» бошқарувини қўлга олади ва «доришунослар» атиги бир мавсумда унинг раҳбарлигида Бундеслига турнир жадвалининг 14-қаторидан 2-ўрнига сакрашади. Ўша чемпионат якунида «Кумуш лаган» охир-оқибат, яна «Бавария»га насиб этади, барибир. Айнан ўша мавсумдан эътиборан ЧЛ йўлланмалари тақсимоти ўзгарганди ва шу туфайли Германия вице-чемпиони УЕФА байроғи остидаги бош турнир гуруҳ босқичига квалификация орқали чиқиш имкониятини ҳосил қилиб, бундан унумли фойдаланади.

Дебют мавсумида қандай иштирок этган? «Байер» саралаш босқичида Тбилиси «Динамо»сини ўз йўлидан ҳеч қандай муаммосиз олиб ташлайди — 6:2 (икки ўйиннинг умумий натижаси). Шу тариқа Леверкузен жамоаси «Монако», «Спортинг» ва «Льерс» билан битта гуруҳга тушади. 6та ўйинда 13 очко тўплаган «Байер» «плей-офф»га ҳам осонгина йўл олади, аммо чорак финалдаёқ Мадриднинг «Реал» клубига тўқнаш келади. Хуллас, бир йил олдинги «Осер» каби бу дебютант ҳам айнан бўлажак чемпионга ютқазганди. Айтганча, «Байер» орадан 4 йил ўтиб, энди ЧЛ финалига чиқади ва яна «Реал» билан учрашади. Аммо «доришунослар»га реванш олиш насиб этмайди.

Жамоада кимлар ўйнашган? Роберт Ковач, Нико Ковач, Йенс Новотни, Карстен Рамелов, Кристиан Вернс, Эмерсон (ЖЧ-2002 ғолиби), Кирстен Ульф.

«Лацио» (Италия)

Мавсум-1999|2000да чорак финал

Қандай йўлланма олган? «Бургутлар» аслида Чемпионлар кубогидаги дебютларини ўтган асрнинг 70-йиллари ўрталаридаёқ нишонлашлари керак эди, бироқ «Ипсвич»га қарши кечган ўйиндаги муштлашув туфайли УЕФА томонидан дисквалификацияга учрашади. Шунинг оқибатида «Лацио» тиффозилари яна чорак аср кутишга мажбур бўлишади. Хуллас, Рим дружинаси мавсум-1998|1999нинг охирги турида скудеттони «Милан»га бериб қўяди, лекин Европа Кубок эгалари кубоги турнирида ғолиб чиқади. Кейинги мавсумда эса «бургутлар» ниҳоят, ЧЛ йўлланмасини қўлга киритишади. 

Дебют мавсумида қандай иштирок этган? Свен-Ёран Эрикссон шакллантирган ва афсоналар нуқтаи назаридан ақлни шошириб қўядиган даражадаги «банда» мавсум-1999|2000да ниҳоят, Италия чемпионатида чўққига кўтарилади, жамоа шунингдек, ЧЛда ҳам итальянларни асло уялтириб қўймайди. Ўшанда турнир формати янгиланган эди ва «бургутлар»нинг чорак финалга қадар 2та гуруҳ раунди чиғириғидан ўтишларига тўғри келади. Муҳими, «Лацио» ҳар икки квартетдаги курашни 1-ўринда якунлайди. Биринчисида Киев «Динамо»си, «Байер» ва «Марибор», кейингисида эса «Челси», «Фейе­ноорд» ҳамда «Марсель» ортда қолдирилганди. Айтганча, «Лацио»нинг амалдаги бош мураббийи Симоне Инзаги ўшанда «Марсель» билан ўйинда «покер» қайд этган. Чорак финалга келсак, «Лацио» айни ўша вақт кучайганидан кучайган «Валенсия» олдида ожиз қолади. «Мес­талья» бўлиб ўтган илк учрашувда 2:5 ҳисобида енгилган итальянлар жавоб баҳсида реванш олишади, фақат Хуан Себастьян Вероннинг ягона голи эвазига ўта камтарона ҳисобда - 1:0...

Жамоада кимлар ўйнашган? Фернандо Коуту, Алессандро Неста, Диего Симеоне, Синиша Михайлович, Марсело Салас, Хуан Себастьян Верон, Павел Недвед, Ален Бокшич, Симоне Инзаги, Роберто Манчини.

«Депортиво» (Испания)

Мавсум-2000|2001да чорак финал

Қандай йўлланма олган? «Депортиво» икки аср оралиғида Испаниянинг энг кучли клубларидан бири сифатида гавдаланган эди. Галисияликлар жумладан, мавсум-1999|2000да ўз тарихларида биринчи марта (ҳозирча охиргиси ҳам) мамлакат чемпиони мақомини олишади. Ўшанда Хавьер Ируретанинг ажойиб жамоаси чемпионатнинг якуний турнир жадвалида «Барселона»дан 5 очко ўзиб кетганди. Атиги 5-ўрин билан чекланган «Реал» эса Галисия клубидан 7 очко кам жамғарганди.

Дебют мавсумида қандай иштирок этган? «Депортиво» Европа аренасида ҳам ўз кучини кўрсатиб қўйишни пайсалга солмайди. Дейлик, Ла-Корунья жамоаси биринчи гуруҳ босқичини мағлубиятсиз якунлайди, тўғри, дуранглар сони ғалабалардан икки баравар кўп бўлади. Муҳими, 10 очко жамоанинг квартетда «Панатинаикос», «Гамбург» ва «Ювентус»ни ортда қолдиришига кифоя қилади. Иккинчи гуруҳ раундига келиб, «Депор» энди «Галатасарой», «ПСЖ» ва «Милан» қаршилигини енгади. Испания вакили «Лидс Юнайтед»га қарши кечган чорак финалда ҳам мўъжиза кўрсатишга яқин келади, фақат унга дастлабки учрашувни 0:3 ҳисобида ютқазгани панд беради. Зеро, галисияликлар «Риасор»даги жавоб баҳсида «Лидс»ни шунчаки, ҳимояга қамаб қўяди, 2та гол ҳам уради, аммо учинчисига улгурмай, сенсацион ярим финалчи мақомидан маҳрум бўлади.

Жамоада кимлар ўйнашган? Жоан Капдевилья (жаҳон чемпиони, 2010 йил), Жалминья, Донато, Хуан Карлос Валерон, Фран Гонсалес, Лионель Скалони, Диего Тристан, Рой Макаай, Вальтер Пандиани.

«Вильярреал» (Испания)

Мавсум-2005|2006да ярим финал

Қандай йўлланма олган? Мануэль Пеллегрини 2004 йили Европа футболига юзланиб, биринчи уринишидаёқ «Вильярреал»ни Испаниянинг учинчи рақамли жамоасига айлантирганди. Ваҳоланки, «ғоввозлар» бир йил олдин ички чемпионатда 8-ўрин билан чекланишганди. 

Дебют мавсумида қандай иштирок этган? Саралаш босқичида «Эвертон»ни икки марта бир хил - 2:1 ҳисобида доғда қолдирган «Вильярреал» ЧЛ дебютант­лари орасида рекорд натижа қайд этиш сари далил одимлай бошлайди. Жамоа гуруҳ раундидаёқ кичик мўъжиза кўрсатади. Ҳар ҳолда, «сариқ сувости кемаси» «Бенфика», «Лилль» ва «МЮ» каби рақиблардан олдинга жойлашганди. Дарвоқе, «қизил иблислар» ўшанда квартетдаги охирги поғонада қолишганди. Йўқ, бу ҳозирги жамоа эмас, балки сэр Алекс Фергюсон бошқарувидаги дружина эди! «Вильярреал»га қайтсак, жамоа илк «плей-офф» раундида «Рейнжерс»ни сафарда урилган гол (2:2; 1:1) эвазига курашдан чиқариб юборади, кейин айни шу қоида ёрдами билан «Интер»ни ҳам четга «улоқтиради»: «ғоввослар» Миландаги 1:2 ҳисобидан кейин ўз майдонларида керакли натижа қайд эта олишганди - 1:0. Ярим финал қарама-қаршилигида эса жамоа олдига «Арсенал» тўсиқ қўяди. Бунда «канонирлар»га Коло Туренинг ягона голи ва жавоб ўйинининг охирида Хуан Роман Рикельменинг пенальтидан фойдаланолмагани қўл келганди.

Жамоада кимлар ўйнашган? Родолфо Арруабаррена, Хуан Роман Рикельме, Диего Форлан, Хуан Пабло Сорин, Алессио Таккинарди, Маркос Сенна, Санти Касорла.

«Малага» (Испания)

Мавсум-2012|2013да чорак финал

Қандай йўлланма олган? XXI асрнинг иккинчи ўн йиллиги бошида «Малага» кутилмаганда, қўққисдан бо­йиб кетади ва Испания чемпионати тарихидаги ўзининг энг яхши натижасини расмийлаштиради — Ла Лигада 4-ўрин. Ўшанда Андалусия жамоасини бунга қадар «Вильяр­реал»ни катта саҳнага тортган Мануэль Пеллегрини бошқарган эди. Тўғри, чилилик мутахассис «Вильярреал» ва «Малага»даги иши оралиғида бир мавсум «Реал»ни бошқариб, омадсизликка учрашга ҳам улгурганди.

Дебют мавсумида қандай иштирок этган? Саралаш босқичида «Панатинаикос»ни мураккаб рақиб ўрнида кўрмаган «Малага» гуруҳ раунди бошлангач, ҳайратни янада оширади. Чунончи, камтарин жамоа «Милан», «Зенит» ва «Андерлехт»ни ортда қолдирганди. Кашфиёт клуб кейин 1|8 финалда «Порту»дан устун чиқади. «Малага»нинг чорак финалда Дортмунд «Боруссия»сига қарши ўтказган жавоб ўйини эса чинакамига оловли жангга айланганди. Унинг якунида Юрген Клоппнинг собиқ жамоаси қанот ҳакамида «офсайд лимити тугагани» эвазига 3:2 ҳисобида ғалаба қозониб, «Малага»ни аламда қолдиради. Бу айниқса, Мануэль Пеллегринига алам уйғотгани аниқ. Зеро, чилилик мураббий «Малага» билан ярим финалга йўл олиб, «Вильярреал»да эришган натижасини такрорлаши мумкин эди.

Жамоада кимлар ўйнашган? Вилли Кабальеро, Хесус Гамес, Диего Лугано, Мартин Демикелис, Жереми Тулалан, Дуда, Элизеу, Иско, Хоакин, Хавьер Савиола, Жулио Баптиста, Роке Санта Крус.

«Лестер» (Англия)

Мавсум-2016|2017да чорак финал

Қандай йўлланма олган? Албатта, АПЛ тарихидаги энг «телбавор» мавсум якунига кўра! Клаудио Раньери бошқарувида ўйнаган «Лестер» 2015|2016 йиллар мавсумида ҳеч ким кутмаган ҳолда Англиянинг барча грандларига дарс бергани ҳали ҳамманинг ёдида. Ҳа, «тулкилар» чинакам сенсацион натижа қайд этишганди. Хуллас, «Лес­тер» ўз тарихида мутлақо нотаниш чўққи саналган ЧЛни илк марта маҳв этишга қандай йўл олгани - бу мўъжиза...

Дебют мавсумида қандай иштирок этган? АПЛ рейтинги туфайли қуръа ташлаш маросими олдидан биринчи саватчага жойлаштирилган «Лестер» чекига нисбатан енгил гуруҳда ўйнаш тушади. Ҳар ҳолда, «Порту», «Копенгаген» ва «Брюгге» Англия чемпиони учун енгилмас рақиблар саналмасди. Шунга яраша, «тулкилар» 5-турдан кейиноқ квартетда 1-ўринни расмийлаштиришади ва гуруҳ босқичи финишида ҳаттоки, «Порту»га 0:5 ҳисобида ютқазишдан ҳам қайтишмайди. 1|8 финалда эса «Лестер» Испания вакили «Севилья» билан куч синашади. Бунда жамоа «Рамон Санчес Писхуан»да 1:2 ҳисобида ютқазиб, ўз майдонида барчасини ўз ўрнига қўяди - 2:0. Айтганча, жавоб баҳсида дарвозабон Каспер Шмейхель пенальтини бартараф этмаганида, «Лестер» бу рўйхатга киролмай қолармиди...?

Жамоада кимлар ўйнашган? Каспер Шмейхель, Уэс Морган, Роберт Хут, Кристиан Фукс, Дэнни Дринкуотер, Риёд Маҳрез, Жейми Варди, Ислом Слимани, Аҳмад Мусо.