Норасмий маълумотларга қараганда, футбол тарихидаги энг қимматбаҳо ўйин Чемпионшипда ўтказилди. Аниқроқ айтсак, унинг натижасига мувофиқ, «Фулхэм» АПЛга қайтди ва бунинг учун 135 млн. фунт стерлинг олади. Гап Чемпионшип «плей-офф» босқичи финали ҳақида бормоқда. «Фулхэм» ўйиннинг қўшимча бўлимларида урилган 2та гол эвазига «Брентфорд»ни 2:1 ҳисобида енгди ва атиги бир мавсумдан кейин яна Англия элит лигасига қайтди.

Учрашувнинг бош қаҳрамони - «дубль» расмийлаштирган ҳимоячи Жо Брайан. Умуман, «Фулхэм»нинг алоҳида байрам қилишига асослар кўп. Улардан энг асосийлари:

1. Скотт Паркер. 2013-2017 йиллар оралиғида клуб сафида тўп сурган Паркер кейинчалик бош мураббий Славиш Йоканович ассистенти сифатида иш бошлади. 2019 йили эса бош мураббий ваколатини қўлга олди. Натижаси - биринчи тўлақонли мавсумидаёқ «Фулхэм»ни АПЛга олиб чиқди.

2. Улкан мукофот пули. Тез орада «Фулхэм»нинг банкдаги ҳисоб рақамига катта миқдорда маблағ тушади. Ҳаммаси жуда мураккабдек, лекин анча жўн - жамоа АПЛ йўлланмасини қўлга киритгани учун 135 миллион фунт стерлинг олади (ТВ-шартномалар ва бошқа тўловлар), агарда кучлилар сафида қололмаса. Бундай ҳолатда футбол ассоциацияси тўловни 3 йил давомида амалга оширади. Бордию, «Фулхэм» кейинги мавсум якунида АПЛдаги жойини сақлаб қолса, унда кейинги 5 йилда яна 246 миллион фунтга бойийди. Таққослаш учун айтсак, «Ливерпуль» АПЛдаги ғалаба учун 150 миллион фунт олади. Шундан келиб чиқиб айтсак, Чемпионшип «плей-офф» босқичи финали - дунё футболидаги энг сердаромад ўйин.

Чемпионшип.

«Плей-офф». Финал

4 август

БРЕНТФОРД - ФУЛХЭМ - 1:2

(0:0, 0:0, 0:1, 1:1)

Голлар: Далсгор (120}4) -

Жо Брайан (105, 117).