«Арсенал» билан ўйинда «Ливерпуль» таркибидаги дебют голини урган Диогу Жота жорий трансфер ойнасида мерсисайдликлар томонидан сотиб олинган учинчи футболчи бўлганди. «Қизиллар» жамоасида 23-рақамда ҳаракат қилаётган португалиялик ярим ҳимоячи «канонирлар»га қарши баҳс арафасида янги клуби расмий сайтига интервью берди.

- Диогу, хуш келибсиз! Ҳозир нимани ҳис этяпсиз?

- Раҳмат. Ўзим ва оилам учун ҳаяжонли дамлар. Болалик давримдан то ҳозиргача бўлган даврни бир-бир кўз ўнгимдан ўтказиб, айни пайт «Ливерпул»да эканлигимга ишониш қийин.

- Сўнгги кунлар қандай ўтди?

- Мазкур трансфер тезроқ амалга ошишини хоҳладим. Гап-сўзлар тарқалганда, кўплаб хат-хабарлар олдим. Келишувни тезроқ битириб, янги жамоамдаги машғулотларни бошлашимга имкон яратишни истадик.

- «Ливерпуль» нимаси билан сизни ўзига жалб этди?

- Дунёдаги энг яхши клублардан бири, айни пайт - энг яхшиси, ахир «Ливерпуль» клублар ўртасида жаҳон чемпиони саналади. Премьер-лигада ҳам йирик жамоалардан, шу боис, рад жавоби бериш имконсиз эди. Бор имкониятимни ишга солмоқчиман, умид қиламанки, ҳаммасини уддалайман. Икки йил «Вулверхэмптон»да ўйнадим, энди эса, яна Чемпионлар Лигасида қатнашишга тайёр эканлигимни ҳис қиляпман.

- Таркибдаги жой учун курашишга тайёрмисиз?

- Албатта. Ҳали жамоамиздаги янги шерикларим билан танишишим керак, аммо мен жамоавий ўйинчиман, шундай экан, менга ҳар доим ишонч билдирса бўлади.

- Эндигина 23 ёшга тўлдингиз. Бу «Ливерпул»га ўтиб, ривожланиш учун энг қулай вақтми?

- Худди шундай. Мени Юрген Клопп шахси ўзига қаратди. У фантастик даражадаги мураббий. Ўйлашимча, бу айнан ривожланишим учун керакли бўлган нарса. Ўсмирлик чоғларимда унинг жамоалари Чемпионлар Лигасида қандай қатнашганини кўрганман. Энди эса у билан шахсан танишдик.

- Сўнгги икки мавсум «Ливерпуль» ва «Вулверхэмп­тон» ўзаро 4та шиддатли ўйин ўтказишди. Улардан ўзингизга қандайдир сабоқ олдингизми?

- «Ливерпуль» - ўзгача жамоа, унда жадаллик ва прессинг даражаси юқори, мен ҳам шунинг бир қисми бўлмоқчиман. Баъзан улар майдонда сон жиҳатидан кўпроқдек тасаввур уйғонади. Ўтган мавсум «Ливерпуль», шубҳасиз, энг яхши клуб бўлди.

- Алиссон ҳамда ван Дейк билан бир жамоадасиз. Кўнглингиздан қандай ҳислар кечмоқда?

- Улар ўз позицияларида дунёнинг энг яхши футболчилари. Албатта, эндиликда бир жамоада эканлигимиз ажойиб. Аммо қолган ўйинчилар ҳам мен учун муҳим.

- «Энфилд»дан қандай таассурот қолди?

- Ўйлашимча, бу стадиондаги муҳит энг яхшиси. «You~ll never walk alone» қишиғи эса бу аренада бўлганларнинг хотирасида узоқ муддатга муҳрланади. Тўғри, коронавирус пандемияси сабаб уни жонли тарзда тинглаш имконияти йўқолди, лекин тез орада мухлисларнинг трибуналарга қайтишларидан умидворман.

- «Ливерпул»да Мане, Фирмино ва Салоҳ бор. Улар билан ҳамкорликдан нималар кутяпсиз?

- Улар жаҳон даражасидаги футболчилар. Кўп гол уришади, жиддий меҳнат қилишади. Бу ўйинчилар мендан тажрибалироқлар, шундай экан, биринчи навбатда, ўйиндаги алоқаларни ўрнатиб, улардан нимадир ўрганмоқчиман. Умид қиламанки, ушбу учликнинг гол уришида ёрдам бераман.

- Сиздаги универсаллик таркибга киришингизда асқотади, деб ўйлайсизми?

- Менимча, ҳар қандай мураббий бунга эътибор қаратади. Бир нечта позицияларда тўп сурадиганлардан наф катта. Мураббий қўйган исталган чизиқда ўйнашга тайёрман.

- «Ливерпул»даги прессинг ҳақида гапирдингиз. Бу борада устунлигингиз борлигини ҳамма яхши билади...

- Айнан шунинг учун ҳам «Ливерпул»ни танладим. Мендаги сифатлар жамоа услубига жуда мос келади.

- Терма жамоада дебют голингизни урдингиз, «Ливерпул»га ўтдингиз, тез орада фарзандли бўласиз. Сиз учун бу йил мазмунли ўтди, шундайми?

- Ҳа, ҳаммаси шунчалик тез рўй беряпти. Бундан роҳатланишга интиляпман. Коронавирус сабабли йил унчалик ёқимли бошланмаганди, аммо ҳозир аниқ айта оламан - у ҳаётимдаги энг яхшиси. Фарзандим шу ерда туғилади, демакки, Англия муҳитида улғаяди.

- «Вулверхэмптон»да «Ливерпул»нинг собиқ футболчиси Конор Коуди билан бирга тўп сургандингиз. У билан «қизиллар» ҳақида гаплашдингизми?

- Йўқ, лекин бугун-эрта суҳбатлашамиз. Бу Коудининг қадрдон клуби, демакки, менга нимадир сўзлаб беради.

- Мухлислар сиздан нима кутишлари мумкин?

- Мен жамоавий футболчиман. Асосий вақтим олдинги чизиқда ўтади, вазифам - вазиятлар яратиш, узатмалар йўллаш, гол уриш. Бор кучимни ишга соламан. Ишқибозлар менга ишонишса бўлаверади.

А.АҲМЕДОВ тайёрлади.