Европада трансферлар ойнаси ёпилган бўлсада, эркин агент мақомидаги футболчилар ўзлари учун янги жамоа топиш ҳаракатини давом эттиришлари мумкин. Қуйидаги мақола яқин ўтмишда ўз клубларида етакчи саналган ва турли таклифларга кўмилган, аммо айни паллада ишсиз қолган 8 нафар футболчи хусусида.

Даниэль СТАРРИЖ (31 ёш). Охирги клуби - «Трабзонспор» (Туркия)

Бу футболчи Брендан Рожерс даврида «Ливерпул»да Луис Суарес билан қудратли ҳужумкор дуэтни ташкил этганди. Бироқ англиялик ҳужумчи Юрген Клоппга керак бўлмай қолди. Германиялик мутахассисга унинг тез-тез жароҳатланиши маъ­қул келмади. Оқибатда Старриж ўтган йилнинг ёзида эркин агентга айланди ва август ойида «Трабзон­спор» билан 3 йиллик шартнома тузди. Бироқ шу йилнинг мартида англиялик ҳужумчи 4 ой муддатга футболдан четлатилди. Сабаби - акаси букмекерлик идорасида унинг қайси жамоа сафига қўшилиши борасида пул тикканди. Охир-оқибат, Туркия клубида 16 марта майдонга тушиб, 7та гол урган Даниэль келишувни бекор қилишга мажбур бўлди. 31 ёшли ҳужумчи бундан бир неча кун аввал «Инстаграм» орқали футболга қайтиш нияти жиддий эканлигини маълум қилди: «Ҳамон фаолман ва эътиборимни аниқ мақсадга қаратганман. Қайтишим яқин». Хуллас, Старрижнинг Sky Sports нашрига берган интервьюсига қарасак, у АПЛга қайтмоқчи.                                                                                                                                                           

Жек УИЛШИР (28 ёш). Охирги клуби - «Вест Хэм» (Англия)

Арсен Венгер даврида «Арсенал»­нинг доимий аъзоси мақомида юрган Уилшир вақтида англиялик иқтидорли ярим ҳимоячилар қаторида тилга олинарди. Жек 2014 ва 2015 йилларда «тўпчилар»нинг Англия кубогини қўлга киритишларида катта роль бажарди. Аммо оғир жароҳатлар унинг фаолиятини издан чиқарди. 2018 йили «Вест Хэм» либосини кийган салоҳиятли йигит 2 мавсум давомида атиги 19 марта майдонга тушди. У шу вақт оралиғида 1тадан гол ва самарали узатма муаллифига айланди, холос. «Болғачилар» шу тариқа октябрь ойида ҳафтасига 100000 фунт миқдорида маош оладиган Уилшир билан хайрлашишга қарор қилишди. Футболчи эса ўйинга шай эканлигини таъкидлаган ҳолда, ҳамон ўзига жамоа қидириш билан овора.

Дэнни УЭЛБЕК (29 ёш). Охирги клуби - «Уотфорд» (Англия)

Оғир жароҳатлар ортидан Лондонга сиғмай қолган «Арсенал»нинг яна бир вакили. Ваҳоланки, Уэлбек Англия терма жамоаси таркибида Россия мундиалига ҳам келган эди. У 2018 йилнинг ноябрида ЕЛ доирасида «Спортинг»га қарши кечган беллашув- (0:0)да ёқимсиз жароҳатга йўлиқди. Майдондан шифокорлар замбилида чиқиб кетган футболчи шундан кейин 2 марта жарроҳлик столига ётди. 2018|2019 йиллар мавсуми охирида эркин агентга айланган Дэнни «Уотфорд» сафига қўшилди ва янги жамоа­сида 20 марта майдонга тушиб, 3та гол урди. Жумладан, чемпионатнинг сўнгги турида «Арсенал» дарвозасини нишонга олди. Кейин эса Чемпионшипга тушиб кетган жамоа билан орани очиқ қилди.

Самир НАСРИ (33 ёш). Охирги клуби - «Андерлехт» (Бельгия)

«Манчестер Сити» таркибида 2 марта Англия чемпиони мақомига эга бўлган франциялик футболчи 2017 йили «шаҳарликлар» билан хайрлашди. Насри шу-шу на ўз ўйини ва на жойи­ни топди. Унинг «Анталияспор»даги фаолияти бор-йўғи 8та ўйин ва 2та гол билан ниҳоясига етди. Бинобарин, Самир 2018 йилнинг февралида антидопинг қоидаларини бузгани учун 6 ой муддатга дисквалификация қилинди. Боз устига, апелляциядан кейин жазо муддати 1 йилга узайтирилди. Шу тариқа Самир 2019 йил бошида «Вест Хэм» билан мавсум охирига қадар мўлжаллаган шарт­нома тузиб, футболга қайтди. Бироқ лондонликлар сафида жами 6та учрашувда майдонга тушиб, 2та голга ассистентлик қилиш билан кифояланди. Насри ўтган йилнинг ёзида «Андерлехт»да фаолиятини тиклашга уриниб кўрди, аммо ишлари яна юришмади - пандемия даврида клуб қоидасига хилоф равишда Дубайга йўл олди. Натижада яна ишсиз бўлиб қолди. Вақтида топ-клублар ва Франция терма жамоасида рисоладагидек ўйнаган футболчини ҳаттоки, «Зенит» ҳам ўз сафига олишни истамади.

Марио МАНЖУКИЧ (34 ёш). Охирги клуби - «Ал-Дуҳайл» (Қатар)

Хорватиялик ҳужумчи 2018|2019 йиллар мавсуми якунида «Ювентус»даги фаолиятини якунлаб, Қатарга йўл олди. Бироқ «Ал-Дуҳайл»даги саргузашти узоққа чўзилгани йўқ - атиги 10та ўйинда қатнашиб, 2та гол урди. Июлнинг ўрталарида шартномани бекор қилган Мариога Москванинг «Локомотив» клуби жиддий қизиқди. Аммо евронинг рублга нисбатан курси кўтарилиб кетгани келишувнинг самарали амалга ошишига имкон бермади. Шунингдек, «Милан» ва «Беневенто» клублари ҳам Манжукич хизматидан фойдаланиш ниятини билдирди, аммо футболчи жамоасиз қолди, барибир. У ҳамон эркин агент мақомида.

Алешандре ПАТО (31 ёш). Охирги клуби - «Сан-Паулу» (Бразилия)

Охирги 10 йилликнинг биринчи қисмида «Милан»даги ёрқин ўйинлари билан эътиборга тушган бразилиялик ҳужумчи кутилмаганда, ватанига қайтишни лозим топди ва «Коринтианс» сафидан жой олди. 2016 йили эса ижара шартномаси асосида «Челси» таркибига қўшилди, аммо атиги 2та ўйинда иштирок этди, Испаниянинг «Вильярреал» клубида ҳам ўз ўйинини тополмади. Пато шу аснода Хитой футболига юзланди ва «Тянжин Теда»да анча сермаҳсул ўйнади - 60та учрашувда 36та гол. Ўтган йилнинг мартида «Сан-Паулу»га қайтган ҳужумчи 35 марта майдонга тушиб, 9та гол муаллифига айланди. Апрель ойида 31 ёшли ҳужумчида Европа, айниқса, «Милан»да ўйнаш орзуси қайта ниш урди ва августда «Сан-Паулу» билан хайрлашди. Пато шундан буён ишсиз.

Эсекиель ГАРАЙ (34 ёш). Охирги клуби - «Валенсия» (Испания)

«Зенит»нинг собиқ ўйинчиси билан «Валенсия» ўртасидаги шартнома муддати ўтган йилнинг ёзида ниҳоясига етди. Аслида «кўршапалаклар» манфаатли шартлар асосида ҳамкорлик муддатини узайтиришни исташганди. Бироқ футболчи таклифни рад этди. Кейинчалик Гарай «Интер» ва «Рома» эътиборини тортган бўлсада, бу қизиқишлар натижа бермади. Шу аснода футболчи жамоасиз қолди, эркин агент мақоми унга наф келтиргани йўқ.

Шинжи КАГАВА (31 ёш). Охирги клуби - «Сарагоса» (Испания)

Иқтидорли қитъадошимиз вақтида Юрген Клоппнинг «Боруссия»сида етакчи ўйинчилардан бири эди. Кейинчалик япон «МЮ» таклифини қабул қилдию, фақат орқага кетди. Оқибатда 2019 йили айланиб-айланиб, Сегунда иштирокчиси билан шартнома тузди. Шинжи «Сарагоса» сафида жами 36 марта майдонга тушди - тўлиқ мавсум. Лекин унинг жамоа­си Ла Лига йўлланмасини қўлга киритолмади, 3-ўринни эгаллаган сарагосаликлар «плей-офф» ўйинида «Эльче»дан енгилишди. Шу тариқа япониялик футболчи Испания клубидан кетди.