«Манчестер Юнайтед»нинг уч футболчиси АПЛ 8-тури доирасидаги «Эвертон»га қарши баҳс (3:1)да жароҳатланишди. Бу ҳақда Goal жамоа устози Оле-Гуннар Сульшернинг сўзларига таянган ҳолда хабар берди. Мутахассиснинг айтишича, Маркус Рэшфорднинг елкаси шикастланган, ҳимоячи Виктора Линделёфнинг бел қисмида муаммо пайдо бўлган. Чап қанот ҳимоячиси Люк Шоунинг тиззаси лат еган. Норвегиялик мураббий футболчиларнинг жароҳатлари қанчалик жиддий эканлигидан бехабар эканлигини қўшимча қилган.

Бундан ташқари, Сульшер «Эвертон» билан ўйиндан сўнг АПЛ раҳбариятини танқид қилди. «Лига мутасаддилари жамоамизга бефарқлар. Чоршанба куни Туркияда ўйин ўтказганимизни билиб туриб, Премьер-лигадаги ўйинни шанбага белгилашлари қандай тушуниш мумкин? «Ливерпуль» ва «Манчестер Сити»ни олайлик. Ҳар икки клуб сешанба куни майдонга тушишганди, сўнгра якшанба куни беллашишди. Бу каби тақвимга ким жавобгар? Футболчилар пандемия даврида нафақат жисмоний, балки ақлан ҳам чарчашаётганини тушунишимиз керак. «Эвертон»га қарши кечадиган муҳим баҳсни аввалги ўйинимиздан 3 кун кейинга белгилаш адолатданми? Шу сабабли ҳам бугун Люк Шоу жароҳатга йўлиқди», - деди мутахассис Sky Sports вакилларига берган интервьюсида. Маълумот учун, «МЮ» навбатдаги ўйинини 21 ноябрь куни ўз уйида «Вест Бромвич»га қарши ўтказади.