«Реал» ярим ҳимоячиси Исконинг агенти мижозининг клубини алмаштириши мумкинлигини инкор этмади. «Иско кучини бошқа чемпионатда синаб кўрмоқчи. Аммо ҳозирча бирорта клубдан расмий таклиф олмадик. Борди-ю, келишув амалга ошмаса, унинг учун «Реал»да қолиш муаммо эмас», - деди агент. Олдинроқ ушбу футболчига Карло Анчелотти бошчилигидаги «Эвертон» қизиқиш билдираётгани тўғрисида хабарлар тарқаганди.

Айтганча, Marca хабарида айтилишича, «Бетис» клуби «Реал» ҳужумчиси Мариано Диасга қизиқмоқда. Аввалроқ Мадрид жамоаси устози Зайниддин Зидан ушбу футболчини режаларига киритмаслигини айтганди. Лекин доминиканлик 27 ёшли ҳужумчининг маоши мазкур трансфернинг амалга ошишига йўл бермаслиги мумкин. Зеро, Диас йилига 5 млн. евро олади, демак, жамоасини алмаштиришни хоҳласа, ушбу сумманинг камайишига кўниши лозим.

Шу ўринда айтиш жоизки, «Реал» форварди Лука Йович коронавирусга чалинди. 22 ёшли сербдан COVID-19 бўйича олинган тест мусбат натижа берди. Таъкидлаш жоиз, аввалроқ «Реал»да Эден Азар, Эдер Милитао ҳамда Каземиро ҳам инфекция юқтириб олишганди.