Бу футболчининг Европадан кетганига анча бўлди. 2015 йили қадрдон «Бока Хуниорс» клубида ўйнаган Карлос Тевес маълум муддат Хитойда тўп суриб, сўнг яна «Бока»га қайтди. 2018 йилнинг бошида ҳамма унинг пуллари ҳақида гапирди. Муҳокамага арзигулик мавзу эди бу: «Шанхай Шеньхуа» билан шартнома имзолаган форварднинг маоши ўшанда қарийб 38 миллион еврони ташкил этганди...

Чин ўлкасида 20та ўйинда 4та тўп киритди. Ҳар бир голнинг нархи 9,5 млн. - гап-сўзлар жуда кўпайди. Тевеснинг ўзи Хитойдаги ҳаётини шундай тасвирлаганди: «У ерда 7 ойлик таътил ўтказдим. Мураббий ва президентнинг танқиди? Бу нормал ҳолат. Нега Хитойда эканлигимни ўзим ҳам тушунмасдим». Тевеснинг ўйини чиқмади, жароҳатларини тиклаш билан шуғулланди, оиласи билан Диснейлендда вақтичоғлик қилди ва шу боис, журналистлар томонидан танқидларга бурканди.

2018 йилнинг январида хитойликлар уни клубдан ҳайдашди ва барча енгил тин олди: пулларни нисбатан иштиёқи кучлироқ футболчиларга сарфлаш имкони туғилганди. Тевес уйига қайтди. «Бока» фурсатдан фойдаланиб, уни текинга ўз сафига қўшиб олди. Дастлабки ўйиндаёқ ассист муаллифига айланди, рақибининг қизил карточка олишига сабабчи бўлди. Бир неча ойдан сўнг матбуотда Тевеснинг қамоқда футбол ўйнаш асносида жароҳатлангани ҳақида хабарлар тарқалди - у ерга жазо муддатини ўтаётган акасини кўргани борган экан. Тевес эса бу маълумотларни инкор этди: «Қамоқда тўп суриб, таваккал қиладиган даражада аҳмоқ эмасман - тренажёр залида шуғулланаётганда шикастландим».

У қарийб бир ой футбол ўйнади. Шу вақт мобайнида Либертадорес кубогида гол урди. Мавсум охирида эса «Бока» билан Аргентина чемпионлигини қўлга киритди. 2018 йилнинг кузида Либертадорес кубогида ҳам муваффақият яқин эди, финалда «Ривер Плейт» тўсиғидан ўтиш қолганди, холос. Уйда 2:2 ҳисоби қайд этилди, жавоб баҳси эса фанатларнинг тартибсизликлари туфайли Мадридга кўчирилди ва «Бока» ютқазди. Тевес ўша куни бошқалардан ажралиб турди, айниқса, чигалёзди машғулоти пайти майдонга югуриб чиққан фанатни полиция чангалидан қутқариб қолганида. Стадионга тўпланган 50 мингга яқин мухлис ҳиссиётларини сақлаб тура олишмади, Тевес эса буни уддалади.

Унинг учун сўнгги йилларнинг энг яхшиси барибир, 2020 йил бўлса керак. Масалан, мартда чемпионликка эришди. Бу Тевеснинг «Бока» сафида қўлга киритган навбатдаги ютуғи эди, аммо бу галгиси ўзгача бўлди:

* «Бока» финишга 2 тур қолганда «Ривер»дан 4 очко ортда қолаётганди. Кейинчалик ушбу фарқ 2тага етди. Ўзи ғалаба қозониб, «Ривер» ютқазса, чемпион бўлиши аниқ эди.

* Шу воқеа содир бўлди. «Бока» уйда марҳум Диего Марадона бошқарувидаги «Химнасия»ни қабул қилди. Ўйиндан аввал Тевес аргентиналик афсона билан қуюқ саломлашди.

* «Бока»га ғалаба учун битта гол кифоя қиларди. Чемпионлик голи 72-дақиқада қаҳрамонимиз ҳисобига ёзилди.

Мазкур учрашувдан кейин бутун дунёни коронавирус пандемияси қуршаб олди, лекин шу ерда ҳам Тевес эътиборга тушди. America TV эфири орқали нутқ сўзлаган ҳужумчи футбол аҳлини ночорларга ёрдам беришга чорлади: «Ҳар қандай футболчи ярим йил ёки бир йил маошсиз яшаши мумкин. Биз бу борада энг яхши намуна бўла олмаймиз. Эҳтимол, бошқа ишларда ибратлидирмиз, аммо бунисида эмас. Клублар ҳам мазкур жараёнда қатнашишлари лозим. Тонгги машғулотга чиқишдан кўра, инсонлар саломатлиги учун қайғуришга ундашлари керак. Уйингизда ўтирганингизни видеога олиб жўнатгандан кўра, ташқарига чиқиб, ёрдамлашганингиз маъқул».

Июлда клуб Тевесга янги шартнома таклиф қилди. Футболчи қабул қилди, фақат... бир шарт билан - барча маоши ва мукофот пулларини хайрия мақсадида сарфлайди. «Пандемиядан азият чекаётган кўп инсонлар бор, уларнинг иши ва ейишга нони йўқ. Мен ажратаётган маблағ қайси ташкилотга бораётганини билишим керак. Шу олти ой мобайнида ҳеч қандай пул олишни истамайман», - деди у.

Ноябрда Тевес Аргентинада бироз ғалати рекорд ўрнатди - ўйиннинг 3-сониясидаёқ сариқ карточка олди. «Бока» билан Либертадорес кубогида гуруҳдан чиқишни уддалади, 1|8 финалда уларга «Интернасьонал» рақиблик қиладиган бўлди. Ўйинлар декабрь ойи бошига белгиланган.

Энди Тевеснинг қанча муддат тўп суриши «Бока»га боғлиқ. Карлос 2018 йилнинг майида бутсаларини 2019 йил охирида, шартнома якунланганидан сўнг михга илмоқчи эканлигини айтганди. 2020 йил ўрталарида келишувни узайтириб, хайрия ишлари билан шуғулланмоқчилигини билдирди. Кейин эса «Коринтианс» ёки «Вест Хэм»га кетишни режалаштирди.

Афтидан, ҳар икки вариант маъқул эмасдек. ESPN журналисти Марсело Бенедеттонинг хабар беришича, «Бока» Либертадорес кубогидаги иштирокини якунлагач, Тевес футболчилик фаолиятини якунлайди. Мазкур турнирнинг финали 2021 йилнинг январига белгиланган. Ҳал қилувчи баҳс ўтказилганидан кейин бир неча кун ўтиб, Карлос 37 ёшга тўлади.