МАШҲУР ФУТБОЛЧИЛАРНИ ҚИЙНАЙДИГАН ФОБИЯ (ҚЎРҚУВ). Қуйидаги мақолада таниқли футболчиларни қийнаган|қийнаётган фобия (қўрқув касаллиги) ҳақида гап боради. Биламизки, ҳаётда энг жасур кишилар ҳам нимадандир чўчишади. Камдан-кам ҳолатларда таниқли шахсларнинг қўрқув манбалари хусусида маълумот чиқади. Баъзан уларнинг яқинлари билмасдан «сир»ни айтиб қўйишади. Тахмин қилиш мумкинки, Артём Дзюба билан бўлган воқеа туфайли РПЛ футболчилари энди ноутбуклар ва телефонлар камераларидан қўрқишса керак. Тўғри, бугунги тўпламда машҳурларнинг аллақачон машҳурлашган фобиясига эътибор қаратилган.

Марко Верратти («ПСЖ») ва

Фил Жонс («МЮ») - лифт

«ПСЖ»нинг бир гуруҳ футболчилари яқинда, ЧЛ ўйини арафасида Лейпцигдаги меҳмонхона лифтида қамалиб қолишди. Улар орасида Марко Верратти ҳам бор эди. Италиялик футболчи бундай ёқимсиз дақиқаларда ёлғиз эмаслиги учун қувонгандир. Чунки у лифтга чиқишнинг ўзидан қўрқади, энди қамалиб қолса, қандай аҳволга тушишини тасаввур қилиб олаверинг. «МЮ» ҳимоячиси Фил Жонснинг лифтга муносабати яхши, фақат у хориждаги механик зиналарга тоқат қилолмайди. Сабаби оддий - Фил болалигида таътил пайти Грецияга борган ва бир куни лифтда нечадир соат қолиб кетган экан. Эҳтимол, у айни ўша воқеадан кейин ҳаммага маълум мимика (юз ифодаси)сига эга бўлгандир...

Оливье Жиру («Челси») - Альф

Рўйхатда тушган энг ноодатий фобия. Франциялик ҳужумчининг таъкидлашича, болалигида акалари уни ерости маҳлуқи - Альф билан қўрқитиб туришган. Тушунарлики, ушбу «даҳшатнамо» мавжудот дарвозабонлар учун Оливьедан қўрқинчлироқ эмас. Лекин Жирунинг ўзи Альфдан ҳамон қўрқади. «Альф - бу монстр. Тавба, жуда хунук бу маҳлуқдан роса қўрқардим. Акам тез-тез чўчитарди: «Эҳтиёт бўл, Альф келмоқда». Шунда яширинишга жой тополмай қолардим», - деганди Жиру ўз фобияси ҳақида.

Килиан Мбаппе («ПСЖ») - сичқон ва каламуш

Айтишларига қараганда, Килиан бир куни меҳмонхона йўлагида сичқонни кўриб қолган. Ўшанда маъмурларнинг кичик зараркунандани тутиб, Мбаппени тинчлантириш учун ҳаттоки, мушук излашларига тўғри келган экан. Дарвоқе, «Ливерпул»нинг собиқ ҳужумчиси Питер Крауч ҳам айни шу фобиядан азобланади. У айниқса, йиртқич кемирувчи - каламушдан қаттиқ қўрқади.

Деннис Бергкамп («Арсенал»нинг

собиқ футболчиси) - самолёт

Кўпчилик эшитган машҳур фобия. Бунда «учмас голланд»ни қўрқоққа чиқариш унча тўғри эмас. Чунки Деннис парвозлар билан боғлиқ нохуш ҳолатларга тез-тез дуч келган. Унинг самолётга чиқишдан қўрқишига яқин дўстининг авиаҳалокат оқибатида ҳаётдан кўз юмгани етарли асос, ҳар ҳолда. Албатта, Бергкамп футбол оламида бундай фобияга эга ягона шахс эмас. Радек Ширл, Владислав Радимов, Александр Кержаков, Ули Хёнесс, Игорь Добровольский ва Пауло Геррерони ҳам бемалол «учмас голланд» ёнига қўйиш мумкин.

Уэйн Руни («Дерби Каунти») - арвоҳ

Уэйннинг фобияси ҳам болалиги билан боғлиқ. Руни ақлини танибдики, унда арвоҳларга нисбатан кучли қўрқув шаклланган. Ўзининг айтишича, ёлғиз ухлашдан қўрқиб, ҳамиша телевизор ёки фенни ёқиб ётар экан: «Тўғриси, ҳозиргача чироқлар ва телевизорни ёққан ҳолда ухлайман. Ишлаб турган чангютгич ёки фен шовқини бундан-да яхши. Ҳозиргача қанчадан-қанча фенни ёндириб-куйдирдим. Саноғи йўқ. Чунки феннинг шовқини бўлмаса, арвоҳларни ўйлаб, сира ухлолмайман». Англиялик собиқ ҳужумчи Пол Гаскойн ҳам шунга ўхшаш азоб-уқубатда - у қоронғуликдан қўрқади. Собиқ жамоа­дошларининг айтишларича, инглиз футболининг афсонаси ва бош пиёнисталаридан бири меҳмонхонада ҳамиша телевизорни ўчирмасдан ухларди.

Дэвид Бекхэм («МЮ»нинг собиқ футболчиси) - буфонофобия

Йўқ, Дэвид «Ювентус» дарвозабони Жанлуижи Буффондан сира қўрқмайди. Буфонофобия - бу қурбақадан қўрқиш. Ушбу қўрқув Бексда «Мавҳумликка саёҳат» теледастурини суратга олиш пайти пайдо бўлган. Дастур лойиҳаси бўйича дўстлари билан Бразилия ўрмонлари бўйлаб саёҳатга чиққан Дэвид қурбақани кўргач, ранги докадек оқариб кетган, кейин тинмай бақирган экан. У яна шахсий шкафида мукаммал тартиб ўрнатади, ҳаттоки, нарсаларини ранглари бўйича ажратади. Айрим гап-сўзларга ишонсак, Дэвид баъзи қушлардан ҳам ўлгудай қўрқади.

Стивен Жеррард («Глазго Рейнжерс» бош мураббийи) - мисофобия

Афсонавий инглиз футболчиси ифлос буюмлардан қўрқади. Айниқса, микроб ва вируслардан чинакамига даҳшатга тушади. Айтишларича, Жеррард кун давомида қўлларини неча марталаб, яна совунлаб ювишга одатланган. Бунинг учун уни ҳаттоки, турмуш ўртоғи ҳам калака қилганди.

Микаэль Форселл («Челси»нинг

собиқ футболчиси) - мушук

Ушбу ҳикояда ҳаммаси анча содда. Финляндиялик собиқ футболчида мушукларга нисбатан кучли аллергия бор. Қисқаси, у мушукни кўрса, «сичқон»­га айланиб қолади, гўё. Ишонмаслигингиз мумкин, лекин бу рост - Микаэль бир сафар автомобили ёнида ўтирган мушукнинг нари кетишини кутиб, «Бохум» машғулотларига кечиккан экан: «Машғулотга боришим керак, лекин қўрқувдаман. Қарасам, мушук ҳеч кетмаяпти, у тахминан 20 дақиқа ўзини автомобиль ғилдирагига ишқалади. О, қандай азоб...».

Хесус Навас («Севилья») ва Андрей Аршавин («Арсенал»нинг собиқ футболчиси) - неофобия

Буниси ўзгарувчан қўрқув ва у одатий фобиялардан фарқланади. Навас руҳшунос ёрдами билангина «Манчестер Сити» таклифини қабул қилган. Аршавин ҳам Англияга бориши билан биринчи навбатда, шифокорга мурожаат этган. Умуман, россиялик футболчиларда неофобия кучли бўлса керакки, улар РПЛдан четга чиқишни унча хушламайдилар. Қисқаси, неофобия - бу янги муҳитга мослашишдан иккиланиш.

Яна бир Қатор «ҚизиҚ» фобия эгалари

Даррен Бент ўргимчакдан қўрқади;

Наби Кейта итдан қўрқади;

Роналдо вазн ўлчаш тарозисига чиқишдан қўрқарди;

Каллум Хадсон-Одои чиройли товусдан қўрқади...

М.ПЎЛАТОВ тайёрлади