Ўтган йилнинг октябрь ойида бўлиб ўтган трансфер ойнасининг сўнгги кунида «Манчестер Юнайтед» ёш вингерни сотиб олгани ҳақида хабар берди. Мухлислар Жейдон Санчонинг келишини узоқ кутишди, аммо ўрнига «Аталанта»нинг кўпчилик учун нотаниш бўлган 18 ёшли футболчисини қарши олишди. Футболчи ҳужжатларини тайёрлашга бир неча ой сарфлади ва яқинда «МЮ» сафига қўшилди. Британия ОАВ маълумотига кўра, ушбу вингер қарийб 40 миллион еврога тушиши мумкин: «Аталанта» 25 млн.ни олишга улгурган, яна 15 «лимон» эса бонус сифатида тақдим этилади.

Амад Траореми ёки Амад Диалло?

Амад Кот-д~Ивуар пойтахтида, фуқаролик уруши бошланишига яқин таваллуд топган. Абиджандаги ҳаёт истиқболдан дарак бермасди, шу боис, 10 ёшли болакай оиласи билан Италияга йўл олди. Муҳожирлар Парма ва Модена ўртасида жойлашган Реджо-Эмилия шаҳрига жойлашишди.

Орадан 8 йил ўтиб, Парма прокуратураси ёш футболчилар савдоси, ҳужжатларни қалбакилаштириш ва ноқонуний иммиграцияга алоқадорлик юзасидан тергов ишларини олиб борди. Гумонланувчилар рўйхатида қайд этилган Хамед Мамаду Траорени Амаднинг отаси сифатида кўрсатишганди ўшанда. Суриштирувлар эса бу шахс шунчаки, йигитчанинг узоқ қариндоши эканини кўрсатди.

Амад 18 ёшини нишонлаган куни «Инстаграм»даги обуначиларидан ўзини Траоре деб атамасликларини сўради. 2020 йилнинг сентябрида ивуарлик футболчи фамилиясини расман Диалло деб ўзгартирди. Унинг декабрда олган Италия паспортида Траоре деган шариф йўқ. «Юнайтед»даги либосининг орқа қисмида эса 19 рақами ва «Амад» ёзуви бўлади.

Уни ким топди?

Диалло 12 ёшида Рождество муносабати билан ўтказилган маҳаллий турнирда «Бока Барко» ҳаваскорлар жамоаси таркибида тўп сурди. Амад мусобақанинг энг ёш иштирокчи бўлишига қарамай, ҳаммадан кўп гол урди. «Рома» скаути ўйин бошланганидан беш дақиқа ўтиб, Диаллонинг тўпни кўксида олиб юришини кўргач, стадионни тарк этди. «Уни бу ерда кўриш бефойда, «Рома»га кўрикка келсин», - деди мутахассис.

Вундеркинднинг овозаси «Фио­рентина», «Милан» ва «Наполи»нинг собиқ дарвозабони, ЖЧ-1982 олтин медали соҳиби Жованни Галлигача етиб борди. Учинчи дивизион клуби «Луккезе»да ишлаётган ушбу мутахассис Амадни тўнғич акаси Хамед (суриштирувлардан кейин кўпчилик улар ўртасида қариндошлик ришталари борлигига ишонмаяпти) билан биргаликда кўрикка чақирди.

«Улар билан академиядаги йигитлар ўртасида катта фарқ бор эди. Амад ҳаммани ҳайратга соларди: тўпни рақиблари оёғи орасидан ўтказар, турли трюкларни амалга оширарди. Йигитлар ўзларидан ёши катталар билан машғулот ўтказиб, мутлақо ўзгача савияни намойиш этишарди», - дея эслайди Галли. Италия термасининг собиқ дарвозабони нисбатан кучлироқ клублардаги танишларига қўнғироқ қилгач, ака-укаларни олиб кетишди: Хамед «Эмполи»га ўтди, Амад эса - «Аталанта»га.

«МЮ» қизиқишига сабаб

Амад «Аталанта»га ўтган пайт клуб Чемпионлар Лигасидан йироқ эди. Ҳозир Бергамо жамоаси «А» серияда ўзига яраша кучга эга, аммо 2015 йили еврокубоклар ҳудуди ҳақида гап-сўз бўлмаган. Бу жиҳат Диаллони заррача хавотирга солмаган - ёшлар даражасининг ўз муҳити бор. 13 ёшида у «Аталанта» билан U-15 чемпионати ғолибига айланди, кейинги икки мавсумда эса 19 ёшгача бўлганлар лигасида ғалабалар сабабчиси бўлди.

Ушбу муваффақиятлар Амадунинг халқаро аренада кўзга кўринишига замин ҳозирлади. 2019 йилнинг октябрида «Аталанта» «Манчестер Сити» меҳмони бўлди. Диалло гол уриб, ўйинни стадиондан кузатган «Юнайтед» вакилларининг ижобий баҳосига лойиқ кўрилди. Орадан беш кун ўтиб, ивуарлик футболчи катталар футболидаги дебютини нишонлади: «А» Серия доирасидаги «Удинезе»га қарши баҳсда 14 дақиқа тўп суриб, яна битта гол муаллифига айланди.

Амад умумий ҳисобда Жан Пьеро Гасперин қўл остида 64 дақиқа ўйнади, кўпинча ёшлар жамоаси машғулотларида кўриниш берди. «Ҳар пайшанба Примаверадаги йигитлар (U-19 жамоа­лари)га қарши ўйин ўтказардик, ўшанда Диаллони тўхтатиш жуда қийин эди. У гўё Месси каби ўйнарди, оёқларига тепишга тўғри келарди», - дея ҳазил аралаш фикр билдирганди «Аталанта» сардори Папу Гомес.

Унга яна кимлар харидор бўлганди?

Кузда ушбу футболчига асосий даъвогар сифатида «Парма» кўрсатилганди. Ўтган мавсум Деян Кулусевскини пармаликларга ижараг бериб, фойда кўрган «Аталанта» Диалло билан ҳам худди шундай иш тутмоқчи бўлганди. Клублар барча жиҳатлар бўйича келишувга эришишган паллада жараёнга «Манчестер Юнайтед» ҳам қўшилди. «Деярли келишиб олган пайтимизда, «МЮ» пайдо бўлгач, футболчини уларга сотишди», - деганди «Парма» спорт директори Алессандро Лукарелли бироз ранжиган кўйи.

Оле-Гуннар Сульшерга Амадни Англияга кўчиб ўтишга кўндириш учун FaceTime орқали бир марта суҳбатлашиш кифоя қилди. Норвегиялик мутахассис воқеани қуйидагича сўзлаб берди: «Клуб Амадни бир неча йилдан буён кузатаётганди. Унинг ўйинини бир неча марта шахсан кузатганим сабабли, унинг келажаги порлоқлигига ишончим комил эди. «Манчестер Юнайтед» ёшларни ривожлантириш салоҳияти билан ном қозонган, клубимиз Диаллонинг салоҳиятини намоён этиш учун керакли барча нарсаларга эга».

У қандай ўйнайди?

Диалло дастлаб марказий ярим ҳимоячи позициясида ўйнаган, аммо вақт ўтгани сайин қанотга мослашган. Ўз навбатида, Амад классик вингер вазифасини бажармайди, марказ томон интилиб, ҳужум ташкил этишда қатнашишни маъқул кўради. Диалло учун идеал схема - 4-3-3. «Ўйлашимча, бу футболчи турли чизиқларда бемалол ўйнай олади. У аксарият ўйинларида ўнг қанотда кўриниш берган. Аммо масалан, Чемпионлар Лигасида Амад чапда тўп сурган», - дея кузатувлардан кейинги таассуротлари билан ўртоқлашди Сульшер.

Статистика Диаллонинг тўп билан ҳаракатланишни хуш кўришини кўрсатмоқда. Wyscout маълумотига кўра, Амад бир ўйин давомида тахминан 9та алдаб ўтишни амалга оширади, муваффақиятли ҳаракатлар фоизи 54,2га тенг. Солиштириш учун, Антони Марсьяль бир ўйинда қарийб 7 марта дриблинг ишлатади ва бу 51 фоиз ҳолатда иш беради.

Уни «МЮ»да нима  кутяпти?

«Аталанта» футболчисини ёзгача ижара асосида таркибда сақлаб қолмоқчи бўлганди, бироқ «МЮ» кўнмади. Бундан кўринадики, «Юнайтед»дагилар Амадни тезроқ керакли даражага чиқаришни исташмоқда. 40 миллион евро яқин орада ўз ҳосилини бериши керак, унинг бошқа ерда вақт ўтказишидан фойда йўқ.

Диалло футбол ўйнашни бошлаган «Бока Барко» клуби президенти Энцо Гуэрри Амаднинг муваффақиятга эришишига ишонмоқда: «Уни захирада ўтириши учун эмас, майдонда тўп суриши учун олишди. Агар у «Ювентус» ёки «Интер»га кетганида, имконияти кўп бўлмасди. Англияда ёшларга эътибор кучлироқ».

Сульшер аллақачон ҳаракатлар режасини тузиб қўйган: «Худди Факундо Пельистри билан бўлгандек иш тутамиз. Даст­лаб Диалло биринчи жамоа маш­ғулотларига қўшилади, сўнгра унга ўйин дақиқаларини тақдим этамиз. Бу асосий таркибда амалга ошадими ёки ёшлар жамоасидами, ҳозирча ушбу саволга жавоб беролмайман. Барчаси унинг ўзини нечоғли кўрсата олишига боғлиқ».

Янги футболчининг дарҳол бошланғич таркибга кириши ҳадеганда кузатилавермайди, аммо тўланган катта пуллар унга имкон берилишидан даракдир. Агар Амад ёзгача «МЮ» ўйинига киришиб кетса, Санчони Германиядан жалб қилишга эҳтиёж йўқолади. Ҳозирча ҳаммаси футболчининг ўз қўлида: ё асосий таркибга муқим жойлашиб, янги юлдузга айланади ёки ижара саёҳатларини амалга ошириб, клубнинг энг ёмон трансферларидан бири сифатида тарихга киради.

А.АБДУВАЛИХЎЖАЕВ тайёрлади