Январда Европа яшил майдонларида кузатилган энг шов-шувли воқеа «Бавария»нинг Германия кубогини тарк этгани бўлди. «Кўҳна қитъа»нинг энг кучли клубини иккинчи Бундеслига вакили - камтарона «Хольштайн Киль» мағлубиятга учратди. Буни нечоғли драматик тарзда амалга оширгани алоҳида эътирофга лойиқ: ўйин пайти икки марта ҳисобда ортда бораётиб, мувозанатни тиклаш, пенальтилар сериясида барча имкониятларидан фойдаланиш (мюнхенликлар сафида Марк Рока «қовун» туширди) ҳаммага ҳам насиб қилавермайди. Демак, қуйидаги маълумотлар Чемпионлар Лигасида «Барселона»ни 8:2 ҳисобида енгган «Бавария»га муносиб қаршилик кўрсатган жамоа ҳақида.

Ҳа, «Бавария» иккинчи таркиб билан ўйнамаганди. Тўғри, Буна Сарр ва Жамол Мусиала ўйинни дастлабки дақиқалардан бошлашди, бироқ қолган позицияларда ҳақиқий юлдузлар тўп суришди. Захирадан ўйинга қўшилганларга эътибор қаратинг: жаҳон чемпиони Бенжамен Павар, 2020 йилнинг энг яхши футболчиси Роберт Левандовски, Дуглас Коста ва Давид Алаба. Яъни Ханс-Дитер Флик таслим бўлмас рақибини енгиш учун ихтиёридаги барча «қурол»лардан фойдаланди.

Айниқса, мазкур баҳс Мануэль Нойер учун омадсиз кечди. Ўша куни у рақиб томонидан йўлланган фақат битта зарбани қайтаришга эришди, холос. Қолган иккита ҳужум ва пенальтилар сериясида германиялик посбоннинг ишлари юришмади. Албатта, ФИФА талқини бўйича энг яхши дарвозабон, Германиянинг йил якунларига кўра тенгсиз кипери «Бавария» сафидаги 410-ўйинини (ушбу кўрсаткич бўйича афсонавий Лотар Маттеусга тенг-лашиб олди) бу тахлит нишонлашни хоҳламагани турган гап.

Муваффақиятсизлик мюнхенликларни шок ҳолатига туширди. Ҳатто оғир-босиқлиги ва совуққонлиги билан ном қозонган Томас Мюллер ҳам интервью пайти ўзини тутолмади: унга журналистнинг мағлубият сабаблари ҳақида савол бериш чоғида кулгани ёқмади. Флик эса «требл»ни сақлаб қолиш имконияти йўқолганидан ранжиганини таъкидлади.

20 йилда илк марта

«Бавария»нинг охирги марта кубок баҳсларидаги мағлубияти 2019 йилнинг августида қайд этилиб, ўшанда Германия Суперкубогида Дортмунд «Боруссия»си устунликка эришганди (2:0). «Плей-офф» раундлари ҳақида гапирсак, 2019 йилнинг мартида Чемпионлар Лигасининг бўлажак ғолиби «Ливерпуль» мюнхенликлар йўлига тўғаноқ бўлганди (0:0, 3:1).

Фақатгина Германия кубоги билан чеклансак, «Бавария» аввалги икки турнирда ғолиб чиққан, сўнгги мағлубиятни эса 2018 йилнинг майида қабул қилиб, финалда «Айнтрахт»га ютқазганди (0:2). Бундан ташқари, «Бавария»нинг қуйи лига жамоаларига имконият бериши сўнгги марта мавсум-2003|2004да кузатилган (чорак финалда «Алемания»га ютқазган), 1|8 финалдан четда қолиш ҳолати эса охирги бор 2000 йилда рўй берган («Магдебург» пенальтилар сериясида устун келган).

«Хольштайн» - 120  йиллик тарихга эга

Киль шаҳри шарафини ҳимоя қилувчи камтарона жамоа футболчилари ажойиб ҳиссиётларни бошдан кечиришди. «Хольштайн»дагилар клубга 120 йил аввал - 1900 йилнинг октябрида («Бавария»дан ярим йил кейин) асос солинган деб ҳисоблашсада, фактлар ушбу воқеа икки йил кейин содир бўлганини кўрсатади. Гап шундаки, асосий жамоани 1902 йилнинг 4 майида маҳаллий мактаб ўқувчилари Фридрих Брюгманн, Вальтер Дуден ва Ханс Гош ташкил этишган, кейинчалик сафга уларнинг дўстлари ва синфдошлари ҳам қўшилишган. Уларнинг клуби қисқа муддатда шаҳарнинг энг кучли, Германиянинг энг яхши жамоалардан бирига айланди. Бироқ асосчилар жуда ёш бўлишгани сабабли уларнинг муваффақиятлари ҳақида ёзма далиллар деярли қолмаган - йигитлар бундай майда-чуйдаларга эътибор қаратмай, бўш вақтларини тўлиқлигича яшил майдонда ўтказишган, шу тариқа ушбу спорт турининг келажагига шубҳа кўзи билан қараган ота-оналарини ранжитишган.

Бир неча йиллардан кейин эса бошқа маҳаллий жамоалардан бири, мамлакатнинг жанубий қисмида яшаган, ҳозиргача шахси номаълум бўлиб турган икки талаба асос солган «Киль футбол клуби 1900» билан бирлашилди. Ушбу жамоа дастлаб Киль эркаклар гимнастика клуби сифатида фаолият юритган, бир неча йиллардан кейин футбол бўлими пайдо бўлган. Бироқ ўйинчиларга учрашувларни ўтказишлари учун гимнастика раҳбариятидан рухсат олиш талаб этиларди ва 1900 йилнинг февралида асосчи талабалар мустақил яшашни маъқул кўришган.

У пайтлари клуб номида рақамлар, «Хольштайн»га асос солинганидан кейин, ўзининг биринчи бўлганини қайд этиш мақсадида шундай ўзгаришга қўл урган. Киль футболининг дастлабки вакиллари жамоаси ҳам кучли эди, лекин кўп ўтмай у ерда тарқалиш кузатилди (кўплаб ўйинчилар кетиб, «FC Kilia Kiel»ни ташкил этишди). Натижада қолганлар «Хольштайн»даги рақиблари билан бирлашишга мажбур бўлиб, клубга асос солинган йилни ҳам уларга ҳадя қилишди.

Вернер - энг ёш  мураббий

Клуб тарихидаги энг ажабтовур воқеа ҳақида гапирсак: ҳеч қачон Бундеслигада қатнашмай туриб, Германия чемпионати ғолибига айланган. Гап шундаки, 60-йилларгача мамлакатнинг ягона чемпионати бўлмаган. Унинг ўрнига турли минтақавий турнирлар ўтказилиб, ғолиблар финал раундига чиқишган, «плей-офф» тарзидаги ўйинлар орқали мамлакатнинг энг кучли клуби аниқланган.

Айнан шу ерда «Хольштайн» учинчи уринишда ўзининг ягона миллий олтин медалларига эга бўлган (бунга қадар ярим финал ва финалда ютқазган). Ушбу воқеа 1912 йилда кузатилган («Бавария» илк чемпионликни 1932 йили қўлга киритган). Мазкур совриндан ташқари, клубнинг бошқа мукофотлари ҳам бор, аммо уларнинг бари ҳар тарафлама минтақавий мақомга эга. «Хольштайн» янги тарихида асосий вақтини немис футболининг учинчи ва тўртинчи лигаларида ўтказди, иккинчи бундеслигага эса фақат 2017 йилда кўтарилиб, шов-шувли тарзда финишга кучли учликда етиб борганди. Бироқ ўтиш ўйинларида нисбатан тажрибалироқ ҳисобланган рақиб - «Вольфсбург»га ютқазган (0:1, 1:3).

Кейин жамоада пасайиш кузатилди ва уни «Хольштайн»нинг ҳозирги устози, Германия профессионал футболидаг энг ёш мураббий - 32 ёшли Оле Вернер тўхтатди (Юлиан Нагельсманн ундан бир ёш катта). Ушбу мутахассиснинг фаолияти деярли тўлиқлигича «Хольшайн» билан боғлиқ. Бу ерда у футболчи сифатида фаолият юритган, U-19 жамоасидан ўтиб, «асосий»да маълум муддат ўйнагач, 21 ёшида профессионал фаолиятини якунлаган. Кўп ўтмай, ёшлар жамоасида мураббийликни бошлаб юборган. Вернер шиддатли ўсишга эришиб, 2013 йилда ўринбосарлар билан ишлаш орқали асосий жамоага ўтган. 2019 йилнинг октябридан буён «Хольштайн»ни бошқармоқда.

«Бавария» таркиби  52 баравар қиммат

«Хольштайн» ўтган мавсумни 11-ўринда якунлади, жорий мавсумда эса етакчи «Гамбург»дан атиги 1 очкога ортда қолган ҳолда, учинчи ўринга чиқди. Жамоа таркибининг умумий нархи 17,6 млн. еврога баҳоланади («Бавария» 52 марта қимматроқ). Бу лигадаги 7-кўрсаткич ҳисобланади, етакчи - «Гамбург» (37,8 млн.). Вернер ўйинчилар танлови масаласида камтарона имкониятга эга бўлишига қарамай, Диего Симеоне ва Жозе Моуриньога хос ҳимоявий тактика танлайди. Кўриниб турибдики, буни аъло даражада уддаламоқда.

Жамоада бошланғич таркиб ва захира ўйинчилари яққол ажралиб қолган. Етакчилар - марказий ҳимоячи, маҳаллий тарбияланувчилардан бири, «Хольштайн» сардори Хауке Валь (айнан у «Бавария» билан ўйиннинг қўшимча дақиқаларида боши билан гол уриб, жамоаси жонига оро кирганди), жанубий кореялик ҳужумкор ярим ҳимоячи Ли Жэ Сон (ўйиндан кейинги пенальтилар сериясида имкониятидан фойдаланганлардан бири) ҳамда марказий ярим ҳимоячи Александер Мюлинг. Келажагига ишонч билан қаралаётган 22 ёшли ҳужумчи Янни Зерра (у ҳам захирадан тушиб, 11 метрли нуқтадан зарба йўллашда адашмаганди) эса Дортмунд «Боруссия»си ўринбосарлари таркибида таълим олган.

Агар вазият шу зайл давом этса, келгуси мавсумда «Хольштайн»ни биринчи Бундеслигада кўришимиз мумкин. Шунда мазкур жамоа футболчилари учун «Бавария»га қарши кечадиган ўйинлар одатий ҳолга айланади.

Ў.УМАРОВ тайёрлади