У ҳаммадан кўп қизил карточка кўрсатади, мураббийларни бақиришга мажбур этиши ҳам мумкин: «Бизни ўлдир». У яна мухлисларнинг ўлдириш ҳақидаги доимий таҳдидлари аро юради, турли мемлар ҳам шу реферига аталган. Хуллас, Майк Дин АПЛдаги энг қаттиққўл ҳакамлардан биридир.

Фақат статистика

Майк Дин жорий мавсумнинг ўзида футболчиларни 54 марта сариқ карточка билан сийлашга улгурди. 9 февраль кунги ҳолат бўйича айтсак, бу АПЛдаги учинчи кўрсаткичдир. Фақат Стюарт Атвелл (57 марта) ва Майкл Оливер (55 марта) «сариқ»қа кўпроқ мурожаат қилишган. Қолаверса, Дин бу мавсум 6та қизил карточка қайд этди - буниси рекорд. Умуман олганда, Дин АПЛ ўйинларида 100та карточка маррасига етган биринчи ҳакамдир.

Майк Диннинг сариқ  карточкаларга доир охирги 5 мавсумдаги статистикаси

Мавсум-2015|2016 - 107та (лигада энг юқори кўрсаткич, Тэйлор ҳам айнан 107та «сариқ» кўрсатган)

Мавсум-2016|2017 - 111та (лигада 4-кўрсаткич)

Мавсум-2017|2018 - 93та (лигада 4-кўрсаткич)

Мавсум-2018|2019 - 129та (лигада энг юқори кўрсаткич, иккинчи ўриндаги ҳакамникидан 27та кўп)

Мавсум-2019|2020 - 113та (иккинчи кўрсаткич)

Майк Диннинг қизил карточкаларга  доир  охирги 5 мавсумдаги  статистикаси 

Мавсум-2015|2016 - 9та (лигада энг юқори кўрсаткич)

Мавсум-2016|2017 - 5та (лигада энг юқори кўрсаткич)

Мавсум-2017|2018 - 3та (лигада 3-кўрсаткич)

Мавсум-2018|2019 - 10та (лигада энг юқори кўрсаткич)

Мавсум-2019|2020 - 4та (лигада 4-кўрсаткич)

АПЛда учинчи 10 йиллик

Ўтган кузда, аниқроғи, сентябрь ойида Диннинг АПЛда фаолият бошлаганига 20 йил (!) тўлди. Тўғри, у дебоча учрашувда захира ҳаками ролини бажарган эди. Ортда қолган вақт давомида қаттиққўл рефери элит лига доирасидаги 509та ўйинда ишлади. Таққослаш учун айтсак, айни пайт АПЛда фаолият юритаётган футболчилардан атиги икки нафари - Гарет Бэйл ва Жеймс Милнерда ўйинлар сони кўпроқ. Дин шунингдек, пенальти белгилашни ҳам хуш кўради. Рақамларни келтирсак, у 2015|2016 йиллар мавсумидан буён 56 марта «нуқта»га ишора қилди ва бу борада ҳар сафар АПЛ реферилари орасида кучли 5таликка кирди.

Кўпчилик унга қарши

Дин ҳамиша таъна-дашномлар, турли маломатлар остида. Дейлик, Арсен Венгер унинг ишини шармандаликка тенглаштирган бўлса, мухлислар оиласига мудом таҳдид қилишади. «Саутгемптон» вакиллари эса лига раҳбариятига алоҳида мурожаат йўллаб, Динни жамоа ўйинларига асло тайинламасликни сўрашган.

Мана, Майк Динга аталган айрим танқидий қарашлар:

** «Қўполликнитекшир, қизилкарточканитекшир. Кейингисафарбизнишунчаки, ўлдир. Буишқўлингданкелади». Дин бу эътироз учун хорватиялик мутахассисни қизил карточка билан «мукофотлади».

**«Сен ўзи  қанақа одамсан?» Аргентиналик мутахассис реферининг қароридан шу қадар ғазабландики, бу иборани қайта-қайта такрорлади.

**«Ҳакамларнинг баҳсли ва ғалати ҳаракатлари намуналаридан бири. Эҳтимол, шунинг учун ҳам инглиз реферилари ЖЧга боришмаётгандир».  Ўшанда, яъни 2018 йили Дин «Саутгемптон»га қарши баҳсда Маркос Алонсонинг қўпол ҳаракатидан кўз юмиб, уни майдондан четлатмаганди.

** «Илтимос, бизнинг ўйинларга Динни бошқа тайинламаганлар». «Авлиёлар» февраль ойи бошида «MЮ»га қарши кечган ўйиндан сўнг ФАга шу мазмунда мурожаат йўллашди.

** «Шунчаки, шармандалик». Бу Дин ишига берилган энг салбий баҳолардан бири.

** «Унинг қарорлари ғалати. Дин жамоадошингизга карточкак ўрсатганида, сардор сифатида сабабини  сўрасангиз, бунга бақириб жавоб беради: «Кўз ўнгимдан  йўқол, аксҳолда, сен ҳам насибангни оласан». Франциялик ҳимоячи Динни фаолиятида учратган энг даҳшатли ҳакам сифатида ҳам «таърифлаган».

Охирги можаро

Дин ҳакамлигига боғлиқ охирги можароли воқеа жорий мавсум «Фулхэм» ва «Вест Хэм» ўртасидаги ўйинда кузатилди. Учрашув якунида Томаш Соучек тирсагини кўтарганча Александр Митровичга урилди. Такрорий лавҳадан кўриндики, «болғачилар» вакили рақибига қасддан урилмаган, қолаверса, тўқнашув ҳам унча оғриқли эмасди. Майк Дин эса бир неча дақиқа давомида вазиятни қайта-қайта томоша қилди ва якунда Соучекка қизил карточка кўрсатди. Ўйиндан кейин номаълум шахслар ҳакамга ўлдириш ҳақида таҳдид қилишди, мухлислар ижтимоий тармоқларда нафақат ўзи, балки оила аъзоларини ҳам «нордон» сўзлар билан «сийлашди». Айримлар ҳаттоки, Динни АПЛ 24-тури учрашувларига тайинламасликни сўрашди.

Яна  нималар   маълум?

Дин 2003-2013 йиллар оралиғида ФИФА ҳаками саналган. У фақат ёш лимитидан ўтгани туфайли элит рўйхатдан чиқарилди. Эътиборли томони, Дин 2000 йилгача ҳаваскор ва яримпрофессионал лигалар ўйинларида ишлаган, холос. Кейин бирданига АПЛ ҳакамлари қаторига қўшилди. Дин ҳаваскорлар миқёсида ишлаган пайт мактабда жисмоний тарбия ўқитувчиси эди. Айтишларича, у ҳакамликка битта мақсад - озиш учун қўл урган. The Athletic нашрида ёзилишича, ўша вақт Майкнинг вазни 17 стоун (чамаси 107 кг.)га тенг бўлган.

Ҳакамлик  хатоларидан  безиб...

Дин фаолияти стартини эслар экан, ҳакамликка соҳадаги хатолардан безигани туфайли киришганини таъкидлайди: «Азалдан футболни қаттиқ яхши кўраман, аммо ҳакамлар хатоларидан ўзимни қўярга жой тополмасдим. Шунинг учун бу соҳага бошсуқишни лозим топдим. Яширмайман, бошида озгина қўшимча даромадни ҳам ўйлаганман, аммо АПЛ доирасига чиқиш хаёлимга келган эди. Кўринишидан иш услубим ва унинг сифати ФА кузатувчиларига ёққанки, мени қисқа фурсатда АПЛ ўйинларига жалб этишди». Мухлислар эса Динни артистлик хатти-ҳаракатини ёқтиришмайди. Мана, The Athletic нашри мақоласидан бир парча: «Диннинг имо-ишоралари, кўзини ўйнатиши ва турли лаҳзаларга реакцияси ортидан «Твиттер»да машҳур Celebrity Refs аккаунти пайдо бўлди». Бу саҳифа ҳакамларга боғлиқ энг кулгули вазиятларни тўплайди. Унда Дин иштирокидаги кадрлар ҳамманикидан кўп.

«Транмир» фанати

Арсен Венгер «Aрсенал» иштирокидаги ўйинлардан биридаги ҳакамлигидан кейин Майк Дин «Тоттенхэм»га мухлислик қилишини айтганди. Мухлислар кейинчалик жўр овозда Венгер фикрини қўллаб-қувватлашган. Лекин бу фикр нотўғри. Дин аслида Англия футболи тизимидаги Лига 2 дивизиони иштирокчиси «Транмир» клуби мухлисидир. Майк оиласи билан айнан шу клубни қўллайди. Эътиборлиси, «Транмир» мухлислари бир сафар «Уэмбли» аренасига айнан Дин ниқобини кийган ҳолда ташриф буюришган.

Дин ўтган йилнинг сентябрь ойида турмуш ўртоғи ва фарзандларини АПЛдаги юбилей - 500-ўйинига таклиф қилди. Ўйиндан олдин бу ҳақда унинг ўзи гапирганди: «Бугун турмуш ўртоғим Карам, катта қизим Зара ва набирам Харви кўз ўнгида ишлайман. Яна бир қизим - Бриттани эса келмайди, негаки, унинг учун «Транмир» ўйинини томоша қилиш муҳимроқ, доимгидек». Диннинг ўзи ҳам «Транмир» ўйинларини стадионда кузатишга ошиқади. Ҳаттоки, уни фанатлар трибунасида ҳам кўп кўришган. Дейлик, «Уэмбли»да «Транмир» голини ғоят бошқача нишонлагани камералар нигоҳига тушган. Ҳакам «Транмир»га муҳаббати ҳақида ҳамиша тўлқинланиб гапиради: «Бу - менинг ҳаётим. Тушунарлики, ушбу жамоа ўйинларида ишламайман. Чунки эътиборим АПЛга қаратилганман. Премьер-лига доирасидаги ўйинда ишни тугатишим ҳамоно телевизор каналини «Транмир» иштирокидаги баҳсга бураман ва яхшигина футболдан баҳра оламан. Ха-ха, ҳазиллашяпман. Лекин кучли зўриқиш ва стресс ҳолатидан кейин «Транмир» ўйини томошаси туфайли ўзимга келишим - айни ҳақиқат».

А.ҲАМИДОВ тайёрлади.