Оловли АПЛ. Англия чемпионатига шундай таъриф берилишига сабабчи бўлаётган иштирокчилардан бири - «Борнмут». Ҳа, ёш мураббий Жонатан Вудгейт анча қизиқарли жамоа шакллантирганини исботлашга улгурди. «Борн­мут»нинг натижалари ўз йўлига, асосийси, камтарин клуб ғоят мароқли футбол намо­йиш этмоқда. Экспертларнинг хулосаларига кўра, Вудгейт мураббийликда ҳали ўз сўзини баралла айтиши мумкин. Аммо унинг ўзи FourFourTwo нашрига берган ин­тервьюсида футболчилик фаолиятида бор иқтидорини кўрсатолмаганини тан олди.

- Англиянинг бир қатор жиддий клубларидан ташқари, «Реал»да ҳам ўйнагансиз. Фаолиятингизни икки ибора билан тасвирлаб бера оласизми?

- Ҳалол ва жонкуяр футболчи эдим. Бироқ биринчи навбатда бошқа иборалар ёдга тушади - айтилмаган сўз. Ҳа, майдонда бор маҳоратимни намойиш этолмадим. Хуллас, бошлаган ишни охирига етказолмагандекман. Оддий айтганда, охирги сўзни айтишга улгурмадим - бутун фаолиятимга доир ҳис-туйғуларимни энг тўғри тасвирлайдиган жумла шу.

- Нима, бу хулоса сизни ҳозир ҳам безовта қиляптими?

- Ҳа, тан оламан, ҳаммаси миямда тез-тез чарх уради. Ўйлайманки, ҳар қадамда мени ёқимсиз жароҳатлар таъқиб этмаганида, фаолиятим бутунлай бошқача тус оларди. Баъзан шахсий статистикамни ўрганиб чиқаман, кейин рақамларни 500тадан ортиқ ўйинда қатнашган тенгдошларим натижалари билан таққослайман. Эҳ, ортга қараб, барчасига кўп жиҳатдан ўзим айбдор бўлганимни тушунаман. Чунки ҳар доим жароҳатлардан кейин тўлиқ тикланмай туриб, майдонга шошилардим.

- Демак, ўзингизни айблайсиз...

- Қайсидир маънода. Ўйиндан четда қолганингда, ўзингга турли саволларни берасан: «Мураббий нимани ўйлаяпти?» «Мухлислар нима дейишади?» «Наҳотки, улар мени ўйнашни истамайдиган заиф футболчи сифатида кўришса...?» Бундай ҳолатда ички сезгинг сени фақат бир йўналишга буради: имкон қадар тезроқ майдонга қайтишга. Ваҳоланки, ҳали эрта эканлигини билиб турасан. Энди тушундимки, футболчи тиббий ташхисга ҳар доим жиддий ёндашиши шарт. Тўғри, баъзан жароҳат сенинг айбингсиз ҳам такрорлашиши мумкин.

- Шунга қарамай, фаолиятингизда ёқимли лаҳзалар ҳам кўп кузатилган, айниқса, «Лидс»да. Қизиқ, ўзингиз учун энг яхши давр қайси?

- Катта футболга «Лидс»да қадам ташлаганим учунми, мени ҳанузгача шу клуб билан боғлашади. Аслида фаолиятимнинг ҳар бир босқичидан яхши хотиралар бор, тўғри, «Лидс»даги давр бош­қача эди, албатта. Ахир биз УЕФА кубоги ва ЧЛда ажойиб мавсумларни ўтказдик. Шунингдек, маълум муддат АПЛда олтин медаль учун ҳам курашдик.

- Ўша «Лидс» юқори чўққиларни забт этишга қодир эди, фақат молиявий муаммолар бўй кўрсатишига қадар...

- 18-20 ёшли йигитлар ўйиндан ўйинга кучайиб боришди ва бутун жамоа фақат олдинга интилди. Ёш бўлсакда, кўпчилик терма жамоа таркибига кириб улгурганди - ўзим, Гари Келли, Ян Харт ва Гарри Кьюэлл. Қолаверса, ҳамма гап клуб тарбияланувчиларида эмасди, Рио Фердинанд, Робби Кин, Майкл Брижес, Доминик Маттео ва Робби Фаулер каби йигитлар таркибга энг порлаган даврларида қўшилишган. Дарвоқе, Брижес жароҳат туфайли мендан ҳам кўпроқ жабр тортган. Дейлик, «Сандерленд»дан «Лидс»га ўтиб, дебют мавсумидаёқ 20та гол урганди. Ишончим комил, агар у мунтазам яхши спорт формасида бўлганида, 2002 йилги мундиалда Англия термаси ҳужумларини ёндирарди. Москванинг «Локомотив» клубига қарши кечган УЕФА кубоги учрашувини яхши эслайман - Брижес ўшанда шундай мукаммал ўйин намойиш этгандики, бунақасини «9-рақам»лар ижросида бошқа кўрган эмасман. Бир ўзи бутун олдинги чизиқни назорат қилган, керакли пайт тўпни ушлаб турган, «иккинчи қават»да беназир ҳаракатланиб, бошқаларни ўйинга боғлаганди. Шунинг баробарида орқада ҳам тер тўкиб, рақиб ҳимоячиларини ўзига эргаштирганча 2та гол урган. Шунчаки, даҳшат!

- ЧЛнинг бир нечта катта ўйин­ларида қатнашгансиз, аммо Ли Бойер билан иккингизга боғлиқ машҳур суд иши оқибатида анча вақт четда қолишингизга тўғри келганди (Бойер ва Вудгейт Лидсдаги тунги клуб яқинида муштлашув келтириб чиқариб, танага қасддан оғир шикаст етказганликда айбланишган. Суд жараёнида Бойер айбловдан қутулган, Вудгейт эса жамоат ишларига ҳукм қилинган).

- Ҳа, айрим катта ўйинларда иштирок этдим. Жумладан, «Элланд Роуд»да «Барселона»га қарши баҳсда 1:1 ҳисобида дуранг қайд этганимизни яхши эслайман. Сэр Бобби Робсон ке­йинчалик ўша куни Ривалдога қарши ўйиним билан ишончини тўлиқ оқлаганимни айтганди. Ўзи ўша даврда бутун жамоа ажойиб ҳолатда эди. Ҳаётда бошдан кечирганларингиз сизни тоблайди - барчаси сабоқ. Аммо баъзи синовлар жуда қаттиқ бўлади. Одам буларни миясида сақлаб қолади ва фарзандларига ўргатади. Қисқаси, мен ҳам футболда жиддий сабоқ олганман.

- 2003 йили Робсон сизни «Ньюкасл»га чорлади. Айтишларича, ўшанда «Лидс»да қолишни хоҳлагансиз...

- «Лидс» ёзда Фердинандни «МЮ»га сотди, кейин Дэвид О~Лири кетди ва унинг ўрнини Терри Венейблс эгаллади. Ажойиб мураббий, ундан кўп нарсаларни ўргандим, аммо атрофида жуда кўп ноаниқликлар бор эди. Кетишим кераклигини айтишганида, юрагим сиқилди, аммо «Лидс» пулга муҳтож эканлигини тушунардим. Шунинг учун жамоа билан хайрлашишга мажбур бўлдим. «Ньюкасл»да ҳаммаси ёқди, ҳар ҳолда, сэр Бобби қўл остида муносиб ўйнаганман. Бироқ «Лидс»дан кетишни истамаганим рост.

- Яна 1 йилдан кейин «Реал» билан шартнома туздингиз, аммо жароҳат туфайли бутун мавсумда майдонга тушмадингиз. Сўнг орзиқиб кутилган дебют ўйинингизда автогол муаллифига айландингиз, камига қизил карточка ҳам олдингиз. Ўша муваффақиятсизликка қандай дош бердингиз?

- Фақат ўйиннинг «Реал» фойдасига ҳал бўлгани таскин берди. Менимча, бир йиллик «таътил»да руҳий томондан қотиб қолгандим. Умуман, ўйинда катта омадсизликка юз тутган бўлсамда, майдонга қайтишнинг ўзи завқ бағишлаганди. Зеро, бундан олдин ҳам жароҳатдан сўнг майдонга қайтиб, жисмоний ҳолатни тиклаш масаласида кўпроқ қийналгандим. Ҳозирги кунда руҳий саломатликка катта эътибор қаратилмоқда, аммо 15 йил бурун ҳеч ким бу ҳақда гапирмасди. Ўйинчиларнинг ўзлари ҳам руҳий тушкунлик борасида оғиз очмасдилар, чунки бу заифлик сифатида қабул қилинарди. Йўқ, ўшанда тушкунлик издан чиқарганини айтолмайман, аммо қийин давр эди, барибир. Умуман, табиатан ижобий фикрлайдиган кишиман ва ҳамиша «Буни енгиб ўтаман, албатта» қабилида ўйлаганман.

- Умуман, «Мадрид»даги фаолиятингизни қандай баҳолайсиз? Журналистлар айтганларидек, чиндан ҳам, фалокатми?

- Албатта, йўқ. Эҳтимол, бу давр катта муваффақият келтирмагандир, лекин шахсан ўзим учун жуда фойдали бўлганди. Ҳа, «Реал» сафида етарли миқдорда ўйин ўтказмаганимдан афсусланаман, албатта. Иккинчи томондан, дунёнинг энг катта клубида Роналдо, Роберто Карлос, Дэвид Бекхэм ва Мичель Сальгадо билан тўп сурганимдан фахрланаман. Улар - катта юлдузлар, шунинг баробарида самимий ва камтар йигитлар.

- «Мадрид»дан ижара келишуви асосида «Мидлсбро»га ўтдингиз. Кўпчилик бу қадамни ортга ташланган қадам сифатида баҳолаганди...

- Аслида бу қадам болалик орзуларини ўзида мужассам этган. Ақлимни таниган пайтдан бошлаб, отам ҳамроҳлигида «Эйрсом Парк»га борардим ва ўша вақт бир куни жамоа либосини кийишни дилимга тугиб қўйганман. Тўғри, ижара келишувидан кейин «Мидлсбро» билан тўлақонли шартнома тузиб, хатога йўл қўйдим. Зеро, ижара муддати тугагач, «Реал»га қайтиш имкони бор эди - «Мадрид» мени ҳеч қачон янги клуб топишга мажбурламаган. Фақат «Боро»да ўйнаш ёқиб қолгани таъсирида «Реал»дан батамом кетгандим - бу мен учун энг катта пушаймон. Аслида ўшанда «Мадрид»да ўз ўрнимни топишга уриниб кўрсам бўларди.

- 2008 йилги Лига кубоги финалида «Тоттенхэм»га ғалаба келтирган гол муаллифига айландингиз. Бу фаолиятингиздаги энг муҳим воқеа, шундайми?

- Албатта. Тўғри, ўша гол менга қандайдир шахсий соврин олиб келмади, аммо жуда катта аҳамиятга эга, барибир. Эсимда, ўйиндан сўнг Флорентино Перес мактуб юбориб, мен учун ниҳоятда хурсанд эканлигини билдирганди. Ажойиб лаҳзалар...

- Англия миллий термасидаги илк ўйинни 1999 йили, охиргисини эса 2008 йили ўтказдингиз. Аммо ҳисобингизда атиги 8та ўйин бор...

- Дебютим Болгария термасига қарши кечган ўйинга тўғри келди ва кўпчилик мени олдинда самарали халқаро фаолият кутаётганини айтди. Лекин очиқ тан оламан, терма жамоа сафидаги ўйинларим ҳақида гапиришнинг ҳожати йўқ. Яна ўша гап: терма жамоадаги фаолиятим - «айтилмаган сўз». Миллий жамоада илк марта майдонга тушганингизда, камида яна 100та учрашувда қатнашишни кўзлайсиз, аммо менинг ҳолатимда бунинг иложи йўқ эди...

Д.АЛИМОВ тайёрлади