Қуйидаги ҳикоямиз АПЛда ўз ўрнини тополмаган, бироқ бошқа чемпионатларда муваффақиятли тўп сураётган энг сара футболчилар тўққизлигига бағишланган.

РОМЕЛУ ЛУКАКУ

Фаолияти давомида 113та гол билан АПЛ тарихидаги энг яхши тўпурарлар рўйхатида етакчи йигирмаликдан жой олган ҳужумчининг муваффақиятига ҳеч ким шубҳаланган эмасди. Ҳозирда тўп суришни тўхтатмаган ўйинчилардан фақат Серхио Агуэро, Гарри Кейн ва Жейми Вардилар Ромелудан кўпроқ гол уришган, холос.

Шу боис, 75 млн. фунт эвазига «МЮ» таркибига ўтган бельгиялик мерганнинг Англиядан кетиши хусусида фикр билдириш қийин. У 96 учрашувда 42та гол урган бўлсада, «МЮ» мухлислари ва мутасаддилари меҳрини қозона олмади:

«Англияда ҳамма мени дангаса, деб ҳисобларди. Етарли даражада югурмас эканман, ҳаракатларим уларга ёқмасмиш. Энди ўйинларим ва нималарга эришаётганимга эътибор беринг. Англияда ҳам шундай ўйнашга қодир эдим».

Ўтган йилги мазкур эътирофидан кейин Лукаку «Интер»га ўтиши хусусида фикр билдирди. Антонио Конте раҳбарлигида ҳужумчи 50дан ортиқ гол урди. Унинг кўмаги эвазига жамоа ЕЛ финалига етиб борди, нуфузли мусобақада йилнинг энг яхши ўйинчиси унвонига сазовор бўлди. Бундан ташқари, «Интер» билан 2010 йилдан бери илк бор скудеттога даъвогарлик қилди, жорий мавсум «А» серияда пешқадамлик қилмоқда.

КИРАН ТРИППЬЕР

Инглизлар одатда жуда камдан-кам ҳолларда АПЛдан бошқа чемпионатларни устун қўядилар. Бироқ Киран Триппьер олдида ўзга йўл қолмаганди: Россиядаги ЖЧда ҳар қачонгидан кўра яхшироқ тўп сурган ҳимоячини «Тоттенхэм» нима учундир бошқа жамоаларга таклиф этди. Кўпчиликни ажаблантирган ҳолда Диего Симеоненинг «Атлетико»си унга қизиқиш билдирди.

Мадридда Триппьер илк кунидан бошлаб рисоладагидек ўйин кўрсатди - ЕЧЛда «Ливерпуль» тўсиғини бартараф этишда фаол қатнашди, дебют учрашувида «Хетафе» айнан унинг кўмаги билан маҳв этилди.

Англиялик ҳимоячининг ижобий хислатлари кўп бўлсада, Симеоне ҳозир унинг ёрдамидан фойдалана олмаяпти - Киран букмекерлар ўйинларига аралашиб қолгани боис дисквалификация муддатини ўтамоқда.

КРИС СМОЛЛИНГ

Гарри Магуайр таркибга жалб этилгач, фахрий футболчининг «қизил иблислар» сафидаги мавқеи пасайиб кетди. Унинг ўрнига Виктор Линделёф ва Эрик Байиларга ишонч билдирилишидан безор бўлган ҳимоячи дуч келган жамоа таклифини қабул қилишни маъқул кўрди.

Лекин унинг «Рома» таркибидан жой олишини ҳеч ким кутмаганди. Аввалига ижара асосида тўп сурган ҳимоячи римликлар ишончини қозониш учун бор куч-маҳоратини жалб этди.

Ортда қолган 18 ой ичида «Смоллдини» 31 марта «бўрилар» сафида майдонга тушди. Таажжубки, 31га чиққанида ишлари юришмай қолган ҳимоячи бу давр ичида пойтахтлик мухлислар ёқимтойи бўлиб олди. Ваҳоланки, «МЮ»да Смоллинг ҳеч қачон бунчалик юксак эҳтиромга сазовор бўлмаганди.

«Манчестерда фаолиятимни якунлаш мен учун энг осон йўл эди. Бироқ билмаганларимни ўрганиш мақсадида «Рома»га ўтишни ихтиёр этдим», - деганди маҳаллийлашган «Смоллдини» ўз интервьюларининг бирида.

СЕРЖ ГНАБРИ

Бир пайтлари Тони Пьюлис томонидан «Вест Бромвич» учун яроқсиз деб топилган ўйинчи Европанинг энг кучли жамоасида жавлон урмоқда. Ҳатто Бундеслига грандининг машҳурлиги ҳам уни заррача бўлсада чўчита олмади. Энди АПЛ аутсайдери таркибида нон тополмаган «қувғинди» ЕЧЛ ғолиблигини қўлга киритди.

Гнабри 16 ёшида «Арсенал»га келган бўлсада, на Лондон ва на бошқа шаҳар жамоаларида обрў-эътиборга эриша олди. Пойтахтдаги 5 йил ичида у атиги 11 марта майдонга тушгач, қадр­дон ватанига қайтди. Серж аввал «Вердер», кейин «Хоффенхайм» шарафини ҳимоя қилди. Унинг 21та голи «Бавария» эътиборини тортиш учун етарли бўлди.

Ўтган мавсум ЕЧЛ доирасидаги 9 учрашувида рақиблари дарвозаларини 9 марта ишғол этган ҳужумчи Франк Риберининг вориси сифатида «7» рақамига муносиб кўрилди.

«Мен шунчаки шок ҳолатидаман. Биз Сержнинг имкониятларини юзага чиқара олмадик», - деганди англиялик мураббий афсусланиб.

ГЕНРИХ МХИТАРЯН

АПЛ тарихидаги ягона арманистонлик футболчи маҳаллий мухлисларда ёрқин хотира қолдира олмади. Ҳатто ЕЛ финалидаги голи ҳам ярим ҳимоячига дурустроқ эътибор қаратиш учун озлик қилди. Генрих Моуриньонинг трансфер юришларида восита вазифасини адо этди. Моу уни Алексис Санчесга алиштирди.

Табиийки, муносиб ўринга эришолмаган футболчи Англияни тарк этиш пайига тушди ва кўпчилик қатори Италияга, аниқроғи, «Рома»га йўл олди. «Мен захирада ўтиришни эмас, футбол ўйнашни истайман. Бу ердагилар менга ишонишгани учун, «Рома»ни танладим», - деганди футболчи ўтган йили. Римда арман ўғлони 38 ўйинда 17та гол урди. Яъни, Англиядаги 4 йиллик натижасидан кўпроқ. Жорий мавсумда эса у етакчи ассистентлар сафида бормоқда.

ЯГО АСПАС

Бу футболчи фақат ягона бурчак зарбаси туфайли «Ливерпуль» мухлислари хотирасида қолган. «Челси»га қарши кечган баҳсдаги Жеррарднинг қўпол хатосидан сўнг айнан Аспас тўпни Виллианга йўллаган ва у ғалаба келтирувчи голни урганди.

«Ўша бурчак зарбаси - Англияга қолдирган эсдалик совғам. Лекин футболда доимо иккинчи имконият бўлади», - деганди Яго. 2016 йилда ўша имконият Аспасга «Сельта» эшикларини очди. Ўзининг жонажон клубида у шунчалик очилиб кетдики, ҳозирда жамоа тарихидаги биринчи рақамли тўпурарга айланди - Ла Лигадаги 232та учрашувда 112та гол урди. Шунингдек, Яго - Ла Лига ва Сегунда вакиллари орасидаги энг яхши испаниялик тўпурарга бериладиган Сарра совринининг 3 карра соҳиби.

ЖЕРОМ БОАТЕНГ

Бу футболчининг АПЛдаги фаолияти шунчалик қисқаки, кўпчилик уни унутишга ҳам улгурди. «Манчестер Сити»даги 16та ўйиндан кейин у Венсан Компани ва Жолеон Лескоттларга муносиб рақобат қила олмаслигини тушуниб, «Бавария»га йўл олди. Мюнхенда Жером 214 марта майдонга тушди. Бундан ташқари, Германия терма жамоасининг асосий ўйинчиларидан бири сифатида 2014 йили жаҳон чемпиони унвонини қўлга киритди.

Клуб миқёсида Боатенг 20та соврин соҳиби. Қаторасига қўлга киритилган 8та Германия чемпионлиги ва 2та ЕЧЛ кубоклари ҳам шулар жумласидан.

МЕМФИС ДЕПАЙ

«МЮ» мухлисларини Депай трансферини танқид қилганликлари учун кечириш мумкин. Мемфис шунчаки, ўзига сарфланган 25 млн. фунтни оқлай олмади. Нидерландиялик ҳужумчи 33та ўйинда атиги 2та гол урди. Кейинчалик унинг Нидерландия чемпионатидан кейин юксак савияда ўйнай олмаганлиги танқид қилинди. Бироқ маълум бўлишича, унга яна бироз вақт бериш керак бўлган.

Депай 2016 йилдан бери «Лион»да самарали тўп сурмоқда. Лига 1да у 121 учрашувда жамоа­сига 54та гол совға қилди. Агар жароҳат олмаганида, ЕЧЛнинг ўтган мавсумдаги ярим финалида қатнашган бўларди. Ҳозир ҳужумчи «Барселона» нишонида турибди.

МОЙЗЕ КИН

Афсуски, бу футболчи камситувчи лавҳа билан англиялик мухлислар хотирасидан жой олди. «МЮ»га қарши баҳсда майдонга тушган футболчини 19 дақиқадан кейин захирага олишди. 27 млн.ли харидидан «Эвертон» нима кутганлигини айтиш қийин. Аммо уни ижарага олган «ПСЖ» мамнун. Пойтахт клубида Мойзе 14 марта майдонга тушиб, жамоаси ҳисобига 9та гол келтирди. Эҳтимол, мавсум якунида Маурисио Почеттино бу шогирдини олиб қолишни талаб этар

С.РАҲМОНОВ тайёрлади