Тошкентнинг «Локомотив» ва Ўзбекистон миллий жамоаси шифокори Аброр Пирриев «Локомотив»нинг португалиялик бош мураббийи Микаэль Секейранинг футболчиларнинг намоз ўқиши ва рўза тутишига муносабати ҳақида ёзди.

«Муборакдаги ўйиндан сўнг («Машъал» - «Локомотив» - 1:4) кийиниш хонасида ифторлик учун дастурхон безадик. Оғиз очиб жамоа намозга сафланди. Бу ҳолатни Секейра диққат билан кузатиб турарди. Автобус йўлга тушганда бош мураббий менга юзланди:

– Конфуций айтган: Дунёда шундай нарсалар борки, уларни кўрмасдан туриб ишониб бўлмайди. Яна шундай нарсалар борки, ишонмай туриб кўриб бўлмайди. Негадир, йигитлар намозга берилганда буюк файласуфнинг шу сўзлари ёдимга тушди.

– Ўша ишончни ҳосил қилувчи ва уни мустаҳкамловчи бир қудрат бор; бу ҳам бўлса илмдир, деган бизнинг алломалар, – қўшиб қўйдим мен.

Бироз жим қолган бош мураббий фикрини хулосалаган бўлди:

– Ҳа-а, футболчилар рўза тута бошлаганда уларнинг жисмоний ҳолатини ўйлаб бироз хавотирда эдим. Аммо руҳий қувват жисмоний кучдан устун экани яна бир бор исботини топди», - дея Секейранинг сўзларини келтирмоқда Аброр Пирриев телеграмдаги хабарида.