Якунланган мавсум «Тоттенхэм»да ишлари асло юришмаган Деле Алли ва Хосеп Гвардиоланинг қизи ўртасида кучли муҳаббат шаклланмоқда, шекилли. Айтиш ўринли, англиялик иқтидорли ярим ҳимоячи олдинги маҳбубаси билан компьютер ўйинлари туфайли ажрашган. Аниқроғи, Деле виртуал ўйинларга ҳаддан ортиқ берилиб кетгач, қиз ундан шунчаки, юз ўгирган. Янги қаллиғичи? У футболчидан отасининг жамоаси - «Манчестер Сити»га ўтишини сўрамаяптимикин?

Ҳа, 2020|2021 йиллар мавсуми ҳам «Тоттенхэм» учун самарасиз якунланди: «шпорлар» бирор соврин ютолмадилар ва бу борадаги «қуруқ» серия 13 йилга етди. Тўғри, «Тоттенхэм» АПЛнинг якуний турнир жадвалида 7-ўринга жойлашиб, учинчи даражали еврокубок (Конференциялар лигаси) йўлланмасини қўлга киритди, аммо бу натижа Лондон клубини қониқтирмаслиги тайин. Яқин-яқинда ҳам голеадор Гарри Кейн­дан кейин  жамоанинг иккинчи юлдузи ҳисобланган тезкор ярим ҳимоячи Деле Алли эса, фаолиятидаги энг ёмон мавсумни бошдан кечирди - у АПЛнинг катта қисмида захира ўриндиғида қолди, бирорта гол урмади ва 1тагина самарали узатма билан кифояланди. Диққат қилинг, гап 30 сонияда рақибини 8 марта алдаб ўтиш асносида Гиннес рекордлар китобига кирган футболчи ҳақида кетмоқда.

Қарангки, Деленинг майдондаги ишлари орқага кетган бўлса, унинг шахсий ҳаётида ҳаммаси ижобий тус олмоқда. Яқинда Британия газеталарида шов-шувли хабар чиқди: «Деле Алли «Манчестер Сити» бош мураббийи Хосеп Гвардиоланинг қизи билан бирга». Репортёрлар ҳаттоки, уни 20 ёшли Марияни ўпаётган ҳолатда «ушлашди». The Sun таблоиди томонидан аниқлаштирилишича, Алли испаниялик мутахассиснинг қизи билан 1 ойча олдин танишган. «Бир қарашда, Деле ва Мария атрофдаги воқеалар ва одамларга заррача эътибор қаратишмагандек..., - дея Лондондаги Cloud 9 баридан олинган фотосуратга изоҳ берди нашр. - Ҳар ҳолда, ўпишаётганларини кимдир кўришига қарши эмасдилар. Ваҳоланки, бардаги барча столлар мижозлар билан тўла эди. Деле ва Мария шунчалик чиройли жуфтликдек кўринишдики, танимаганлар уларни янги келин-куёв ўрнида қабул қилган бўлсалар керак».

Аслида жорий йилнинг март ойида Аллининг маҳбубаси билан орани очиқ қилгани маълум бўлганди: ички кийимлар модели, 24 ёшли Руби Мэй «Тоттенхэм» футболчисини шунчаки, ташлаб кетди. ОАВ маълумотларига кўра, ажрашувга Деленинг киберспортга ҳаддан ортиқ берилиб кетгани сабабдир. Оддий айтганда, унинг бўш вақтни тўлиқ FIFA, Fortnite ва Call of Duty ўйин иловаларига бағишлаши ҳурлиқо моделга сира ёқмаган. Ахир футболчининг машғулотлар ва ўйинлардан уйига қайт­гани ҳамоно сарвқомат маҳбубаси кўнглини овлаш ўрнига комьютер қаршидан турмаслиги кимга ҳам ёқарди? Хуллас, Мэй барчасидан зерикиб, Аллидан юз ўгирди ва кейинчалик бир неча марта шундай йўл тутганидан хурсанд эканлиги хусусида ошкора гапирди.

Диққатга сазовор ўхшашликка қаранг: «Тоттенхэм» Деле Аллини ўйин амалиётисиз қолдирган Жозе Моуриньони ёш мураббий Райан Мейсон билан алмаштирган бўлса, футболчи ҳам Мэй ўрнига тезда янги қаллиқ топди. «Афтидан, Деле ниҳоят, Руби билан ажрашгани аламидан бутунлай қутулганга ўхшайди. Футболчи ҳам, Мария ҳам ёш, ҳар иккиси эркин ва ҳали турмуш қурмаган. Лекин уларнинг муносабатлари қандай ривожланишини ҳеч ким билмайди?»  - бу The Sun нашрининг  янги жуфтлик истиқболига шарҳи. Балки Деле ҳали Мария таъсирида «Манчестер Сити»ни танлаб, Гвардиола қўл остида хиралашган фаолиятини яна ёрқинлаштирар...

20 ёшли Мария испаниялик мутахассиснинг тўнғич фарзанди ҳисобланади. Хосеп Гвардиолада яна бир ўғли ва қизи бор - 18 ёшли Мариус ва 13 ёшли Валентина. Уларнинг оналари - бизнесвумен Кристина Серра. Хосеп 27 йилдан буён шу аёл билан бирга. Умуман, 1994 йили танишишган Гвардиола ва Серра нақ 10 йилдан кейингина расман никоҳдан ўтишган.

А.АҲМЕДОВ тайёрлади