ЖЧ-2018 мусобақаси мухлислар хотирасидан ҳақиқий байрам сифатида жой олди. Бу ҳақда Франция терма жамоасининг афсонавий собиқ футболчиси ва Евро-2020 элчиси Давид Трезеге «РИА Новости»га берган интервьюсида таъкидлаб ўтди. Суҳбат давомида Давид нима учун яна Россияга қайтиш ёқимли бўлгани, пандемия даврида вақтдан унумли фойдалангани, тажрибасини ўғли Аарон билан ўртоқлашгани, шунингдек, Криштиану Роналдунинг «Ювентус»даги келажаги борасида тўхталиб ўтди.

— Санкт-Петербург, Москва ва умуман олганда, Россиядаги қабул жараёни бўйича таассуротларингиз билан ўртоқлашсангиз...

— Мен ташриф буюрган ҳар икки шаҳар ҳам ажойиб. Бу ердаги инсонлар жудаям интилувчан, очиқкўнгил. Улар Евро-2020 мусобақаси бошланишини сабрсизлик билан кутишди. Айтиш жоизки, Россия терма жамоасида ўз мухлислари қаршисида ўйнаш имконияти юзага келди. Евро-2020 ўзгача турнир бўлади. Умуман олганда, ҳар доим Россияга келиш фурсати туғилганида, бу ерга хурсандчилик билан ташриф буюраман.

— Россиядаги мундиал пайти шу ЖЧ тарихидаги энг зўри бўлганлигини таъкидлагандингиз. Ўша турнирдан қандай таассуротлар қолганди?

— ЖЧ-2018га қадар Россия бизда тартибли ва ёпиқ мамлакат сифатида тасаввур уйғотганди. Аммо россияликларнинг очиқкўнгил эканликликларига гувоҳ бўлдик, улар энг яхши сифатларини намойиш этишди. Мен эса бундан ажабланмадим, чунки Россия ҳақида бироз маълумотга эга бўлиб улгургандим. Стадионлар ҳам мундиалга юқори савияда тайёрланганди. Мухлислар эътирофига кўра, бу ЖЧ барчада ўзгача таассурот қолдирган, ташкилий ишлар ажойиб тарзда йўлга қўйилганди.

— Пандемия даврини қандай ўтказдингиз?

— Қийин давр бўлди, кўп нарса, энг аввало, оила тўғрисида ўйлашимизга тўғри келди. Олдин ҳис қилинмаган мулоҳазалар йили бўлди. Пандемия ҳаётдан кўпроқ завқ олиш, ўзингиз учун янада оддийроқ бўлган нарсаларни кашф этиш, кундалик ташвишларга сабр қилишни ўргатди...

— Россияга Евро-2020 кубоги турнеси доирасида ташриф буюрдингиз ва мазкур мусобақа билан боғлиқ ўзгача хотираларга эгасиз...

— Ҳа, ушбу турнирдан ажойиб хотиралар қолган. Франция термаси жаҳон чемпионлигидан сўнг Европа чемпиони унвонига ҳам эришган илк жамоа бўлганди. Иккита соврин - бу ғоя, иштиёқ ва орзунинг жамланмаси. Шунингдек, Евро-2000 финалида ғалаба тўпига ҳам муаллифлик қилгандим. Терма жамоа таркибида иккита асосий совринни қўлга киритиш бахтига мушарраф бўлганман. Бу эса унутилмас онлардир! Балки, аввалига совринга унчалик эътибор қаратмагандирмиз. Аммо вақти келиб, унинг қанчалик қийматга эга эканлигини тушунамиз... Узоқ йиллардан сўнг, қитъа ғолибига топшириладиган кубокни яна бир марта томоша қилдим. Бу эса менга ўзгача ҳиссиёт бағишлади.

— Футболчилик фаолиятингизни 2014 йили якунладингиз. Айни пайт футбол, хусусан, «Монако», «Ювентус» клублари, миллий терма жамоага бағишлаган йилларингиз борасида нима дея оласиз?

— Футбол профессионал ва шахсий ҳаётимда умрим мазмуни, ҳиссиёт ва орзумга айланди. Ҳаттоки, айни пайт элчилик вазифасини бажараётганимда ҳам футбол ичидаман. Бу менинг ҳаётим. Миллионлар ўйинида эришган ютуқларимни сўз билан ифодалашим қийин. Шу боис, футболга ҳурмат билан ёндашаман. Ҳозир менда инсонлар ва мухлислар билан кўпроқ суҳбат қуриш имконияти бор. Футболчилигимда эса бунга вақтим етмасди. Эндиликда бу мени қувонтириб, ажиб ҳисларни тақдим этмоқда. Чунки биз футболнинг катта кучга эга эканлигини яхши биламиз, миллионлар ўйини ижтимоий ва маданий соҳаларда барчани бирлаштиришини яхши тушунамиз.

— Фарзандларингиз уларнинг отаси кимлиги ва футболда қандай муваффақиятларга эришганлигини билишадими?

— Биласизми, бир тарафдан олиб қараганда, фарзандларим машҳурлигимдан азият чекишмаган. Аммо мен ҳам буни айтишдан тийиламан... Боиси, ота-онам менга ҳеч қачон босим ўтказишмаган ва футбол борасидаги масалалар бўйича қароримга қаршилик билдиришмаган. Менимча, бу жуда тўғри йўл бўлган. Ўзим ҳам фарзандларим билан муносабатда шундай йўл тутяпман. Ўйлайманки, ҳар ким ўз йўлини босиб ўтиши, ўз лойиҳаларини амалга ошириши лозим. Аммо ўғлим доимо ёнимда. Биз бирга саёҳат қиламиз, у бундан хурсанд, мен билан фахрланади. Лекин у ҳали ўқияпти. Ўғлим отасининг футболда маълум йўлни босиб ўтганлиги, ёрқин тарих яратганлигини билади. Бу эса эса уни руҳлантиради. Шахсан мен учун бу ёқимли ҳолат.

— Тўнғич ўғлингиз Аарон ҳам моҳир спортчи (яккакураш спорти билан шуғулланади - IFF изоҳи). У сиздан маслаҳат олиб турадими?

— Аарон маслаҳатга муҳтож эмас ва профессионал бўлиш йўлида астойдил меҳнат қилмоқда. У шундай муҳитда туғилди, менинг профессионал фаолиятим ва бошқа нарсаларни кузатди.

— Аарон сизнинг спортчилик тажрибангиздан бирор нарсани ўзлаштирганми?

— Албатта, у иштиёқни ўзлаштирган. Юқори савияли спортчи бўлсанг, масаланинг профессионал ва шахсий томонлари бўлади. Лекин бу биринчи навбатда ҳиссиёт билан боғлиқ. Ушбу ҳиссиётлардан эса иштиёқни топиш керак. Бизда бирор ишни бажариш иштиёқи уйғондими, олдимизда улкан имкониятлар эшиги очилади. Ҳозир Ааронда шуни кўряпман. Айни пайт бизда, узоқ вақт давомида, илк марта биргаликда саёҳат қилиш имконияти юзага келди. Ааронга спорт дунёси ёқишини ҳис қиляпман ва бу яхши ҳолат. Менимча, бу унинг ҳаётига ҳам ижобий ўзгаришларни олиб киради. Ахир, ҳар куни спорт билан шуғулланиш фойдали-ку!

— Биз фарзандларингизга ўрнак бўладиган жиҳатларингиз ҳақида суҳбатлашдик. Янги авлод вакиллари борасидаги фикрингиз қандай? 1998 йили «Фахрий легион» ордени соҳиби бўлганингиздан сўнг, ёшларга нисбатан қандайдир ўзгача масъулиятни ҳис қиляпсизми?

— Бу яхшими ёки ёмонлигидан қатъий назар, футбол кучли ўзгаришга юз тутди. Ҳаётимизнинг кўп қисмини ташкил этадиган ижтимоий тармоқларга назар солсангиз, олдингига қараганда, футболчилар ҳозир кўпроқ шахсий маҳоратлари намойиш этилган видеороликларни кўпроқ жойлашмоқда. Олдинлари футболчиларга бундай видеороликни намойиш этмаслик, ўзларида сақлаб туришлари уқтириларди. Энди биз янги авлодга мослашишимиз керак. Уларда барча нарса очиқ, кўпроқ нарсалар намойиш этилади. Аммо эҳтиёт бўлиш лозим. Уларга профессионаллигимни намойиш этишим, йўл кўрсатишим керак, деб ўйлайман. Мен шундай яшайман, шундай тарбия топдим. Аммо аслида, янгича қарашларга мослашишим керак, менимча.

— Футболчи ўзини намунали тутиши, бошқаларга ўрнак бўлиши керакми?

— Албатта, шундай бўлиши шарт. Барчамиз футболнинг оммабоп спорт тури эканлигини тушунамиз. Кўплаб футболчилар осон бўлмаган йўлни босиб ўтишган. Шунингдек, молиявий жиҳат ҳам профессионализмнинг ажралмас қисми ҳисобланади. Лекин бу ҳақда унутиш лозим. Ўзингизни эҳтиёткор тутишингиз, тўғри қарор қабул қилишга интилишингиз, масъулиятли бўлишингиз талаб этилади. Агар ўзингизни шундай тутсангиз, ҳамма нарса осонлашади ва сиз барчага ўрнак бўлишингиз мумкин.

— Энди футболдаги сўнгги воқеалар ҳақида гаплашсак. Масалан, «Ювентус» ўзининг асосий юлдузи Криштиану Роналдудан айрилиш арафасида. Сизнингча, у клубга нима берди? Айримлар унинг Туриндаги фаолияти муваффақиятсиз ўтди, деб ҳисоблашмоқда. Ушбу фикрларга қўшиласизми?

— Роналду Италия чемпионати имиджини анча яхшилади. Менимча, Италия «А» серияси ундан жуда яхши фойдаланди. Клуб борасида гапирадиган бўлсак, Криштиану сўнгги 10 йил ичида ички майдонда жуда кучли бўлган Италиянинг энг муҳим футбол клубига келди. Албатта, Роналду ёрдамида туринликлар халқаро миқёсда кўпроқ ютуқларга эришишни, Чемпионлар Лигасида ғолиб чиқишни исташганди. Энди Криштиану клуб вакиллари билан биргаликда «Ювентус»да қолиш ёки қолмаслик тўғрисида қарор қабул қилиши керак.

Яқинда «Ювентус» ЕЧЛ йўлланмасини қўлга киритди. Менимча, бу яхши. Криштиану уч йил ичида 100дан ортиқ гол урди. Менимча, шахсий ютуқлари нуқтаи назаридан у жуда зўр ижрочи. Ҳа, Криштиану «Ювентус» билан Чемпионлар Лигасида зафар қучолмади, аммо ушбу мусобақани бир нафар футболчи ҳисобига ютиб бўлмайди. Биз бунинг исботини кўрдик. Энди клуб ҳам, Роналду ҳам келажаги борасида бир қарорга келишлари керак.

— Килиан Мбаппе ва Эрлинг Холандни, мана бир неча йиллардан буён, футбол келажаги дейишмоқда. Бу футболчилар борасида нима дея оласиз? Улар тарихга киришлари мумкинми?

— Лионель Месси ва Роналдудан сўнг, албатта, Мбаппе ҳамда Холанд ажралиб туришибди. Улар футболнинг ҳозирги авлоди бўлиш билан бирга келажаги ҳамдирлар. Улар профессионал, кучли иштиёқ ва мотивацияга эга футболчилар. Албатта, вақт ўтиши билан улар қайси клубда ўйнашларини ҳал этишларига тўғри келади.

— Мбаппе топ даражадаги футболчига айланиши учун «ПСЖ»дан кетиши керакми?

— Килиан олдига юқори мақсадларни қўйган клубда ўйнамоқда. Лекин... Англия, Испания, Италия, Германия - бу кучли тўртлик чемпионатлари. Менимча, вақт ўтиши билан Мбаппе муҳитни ўзгартиришга эҳтиёж сезади. Бу профессионал спортчи ҳаётининг бир қисмидир. Худди шундай фикрларни Холанд борасида ҳам айтишим мумкин. Эрлинг ҳам ўз тарихига эга ва мақсади юқори клубда ўйнамоқда. Лекин у бошқа клубга ўтиши керак, фақат... «Бавария»га эмас.

Улуғбек УМАРОВ тайёрлади