Евро-2020 иштирокчилари якуний таркибни тақдим этгач, sports.ru сайти дарҳол нуфузли турнир «заявка»сига тушган футболчилар ёшига эътибор қаратиб, шунга боғлиқ асосий фактларни ажратиб кўрсатди. Ишонинг, бу борада қизиқарли жиҳатлар етарли...

Шведлар турклардан 4 ёш катта

Энг муҳим фактор - жамоалар таркибининг ўртача ёши. Таҳлилларга кўра, таркибдаги футболчиларнинг ёши нуқтаи назаридан энг «қари» жамоа - бу Швеция термаси (29,2 ёш). Шунингдек, Бельгия (29,1 ёш), Словакия (28,2 ёш), Финляндия (28,1 ёш) ва Венгрия (28 ёш) жамоалари ҳам «акахон» мақомида. Қизиғи, «В» гуруҳидан ўрин олган Бельгия, Россия, Финляндия ва Дания термалари бу борада кучли 12таликда. Қисқаси, «В» квартети - «қариялар чойхонаси». Энг «ғўр» таркиб Туркия термасида - 24,9 ёш. Англия (25,2 ёш), Уэльс (25,5 ёш), Украина (26,4 ёш) ва Испания (26,5 ёш) термалари ҳам чемпионатга нисбатан ёш таркибни танлаган.

«Қария» киперларга ишонч

Энг ёши катта 5 нафар футболчи рўйхатида икки дарвозабон бор: Мартен Стекеленбург ва Крейг Гордон. Лекин улар захира вакиллари ҳисобланишади, гарчи ўз амплуалари бўйича кучли мутахассис бўлсаларда. Пепе ҳамон Португалия термаси мудофаасининг асосий таянчи ролини бажармоқда, Горан Пандев - камтарона Шимолий Македония жамоасида асосий «фигура». Юрий Жирков эса Россия термаси чап қанот ҳимоясига жавобгар фахрийдир.

 Энг ёш футболчи - Козловски

Энг ёш футболчилар рўйхатини поляк Кацпер Козловски бошқариб турибди. Ҳали 18 ёшга тўлмаган бу йигит Польша миллий жамоасида 2та ўйин ўтказишга улгурган. Унинг ортида кучли миллий лигаларнинг вундеркиндлари жой олишди: Жуд Беллингем, Жамол Мусиала ва Педри. Шунингдек, 2 нафар украиналик бор - Илья Забарний ва Георги Судаков.

Айтганча, Йетро Вильямс ҳамон Европа чемпио­нати тарихида майдонга тушган энг ёш футболчи бўлиб қолмоқда - нидерландиялик ҳимоячи турнирдаги дебютини 2012 йили 18 ёшу 71 кунлигида нишонлаганди. Бўлажак турнирда фақат Козлов­ски ва Беллингем унинг рекордини янгилашлаши мумкин.

Евро-2020: энг ёш Қатнашчилар

30 ёшга тўлмаган сардорлар

Евро-2020да ҳали 30 ёшга тўлмаган сардорлар кўп - Эндрю Робертсон (Шотландия термасида 44та ўйин), Гарри Кейн (Англия термасида 54та ўйин) ва Гранит Жака (Швейцария термасида 93та ўйин). Робертсон ва Кейн аллақачон катта синовлардан ўтган етакчилар - ҳар иккиси сардорлик боғичини 2018 йили қўлга олган.

Евро-2020: энг ёш сардорлар

Криш 5-Қитъа чемпионати остонасида

Криштиану Роналду - бўлажак Европа чемпионатининг асосий фахрийси. Диққат қилинг, у бу турнирга 5-марта йўл олди. Португалия футболи рамзи шу билан Европа биринчилигида қатнашиш сони бўйича Икер Касильяс билан тенглашди. Фарқи шуки, испаниялик дарвозабон 5та чемпионат «заявка»сига кирган ҳолда, уларнинг 2таси (2000 ва 2016 йиллар)да майдонга тушмаган. Роналду олдида бошқа ҳеч ким йўқ, демак, у бу борада мутлақ рекордчи бўлишга яқин. Айтганча, Криш 2024 йили 39 ёшда бўлади, балки 6-чемпионатга ҳам уриниб кўрар ҳали...

Финал босқичида энг кўп гол

Роналду аввалги 4та Европа чемпионати финал раундида жами 9та гол урди.  Франция футболи афсонаси Мишель Платини ҳисобида ҳам айнан 9та гол бор. Хуллас, Криштианунинг бу масалада мутлақ рекордчи бўлишига 1тагина гол кифоя қилади.

Саралаш ва финал босқичида энг кўп ўйин

Жанлуижи Буффоннинг Европа чемпионати саралаши ва финал босқичларида кўп ўйин ўтказиш борасидаги рекорди омонат турибди. Айни пайт буюк Жижи ҳисобида 58та ўйин бор. Криштиану эса ҳозирга қадар 56та ўйинда қатнашган.

Финалда гол урган энг ёши катта футболчи

Қитъа чемпионати финалида атиги бир футболчига 30 ёшдан кейин гол уриш насиб этган - Германия термаси вакили Бернд Холзенбейн. Роналду бу натижани янгилаши учун аввало, португалияликлар финалга чиқишлари керак, ке­йин унинг ўзидан гол уриш талаб этилади.

М.ПЎЛАТОВ тайёрлади