Хабарингиз бор, 25 июндан 11 июлга қадар Тошкент шаҳри ОЧЛ гуруҳ босқичи иккита гуруҳи ўйинларига мезбонлик қилади.

Бугун Ўзбекистон футбол ассоциациясида «Ҳ» ва «И» гуруҳи учрашувлари олдидан ташкилий қўмита қўшма йиғилиши бўлиб ўтди.

Унда мусобақа ташкилотчилигига доир бир қатор масалалар - стадионлардаги шароит, тиббий протокол, хавфсизлик, ҳакамлик ва яна бир қатор йўналишлар юзасидан ОФК вакиллари билан муҳокама этилди.

Ушбу марказлашган мусобақада фаолият олиб бориши режалаштирилган барча делегациялар пойтахтимизга етиб келишга улгурди.

Тадбир аввалида Ўзбекистон футбол ассоциацияси вице-президенти Равшан Эрматов сўзга чиқиб, меҳмонларни Ўзбекистонга ташрифлари билан қутлади ва мамлакатимизда ўтадиган мусобақа уларда илиқ таассурот қолдиришига умид билдирди.

Шунингдек, Осиё футбол конфедерацияси вакили Аваз Бердиқулов қўмита йиғилишида сўз олиб, ОФК қитъа миқёсидаги шу каби мусобақаларни Ўзбекистон билан ҳамкорликда ўтказишдан мамнун эканини эътироф этди.

Ўз навбатида, йиғилишда ОФК таснифидаги мусобақаларнинг маркетинг, медиа, тижорат ва тиббий масалалари атрофлича муҳокама қилиниб, томонларнинг бу борада ташкилий қўмита аъзоларига зарур кўрсатмалар берилди.