Россиялик ҳазилкаш касбдошларимиз ўз орзу-умидларини Миранчук фаолияти билан боғлаб, уни «Аталанта»да ойнинг энг яхши футболчиси унвонига лойиқ топишган паллада, захирада юрган Алексей Гасперинининг услубига мослашиш билан овора ва шахсий мукофотларга арзийдиган ўйиндан йироқ эди. Малиновский эса қаторасига уч марта - март, апрель ва май ойларида «Ой футболчиси» совринини қўлга киритиб, бу борада ўзига хос «хет-трик» муаллифига айланди. Тўғри, бу муваффақиятга Руслан бирданига эришгани йўқ. Бир қатор жароҳатлар, коронавирусни бошдан кечирди, қишда Бельгияга қайтиш ҳақида ўйлаган пайтлари ҳам бўлди. Аммо мавсумнинг ҳал қилувчи баҳсларида чиндан ҳам сермаҳсул ўйин кўрсатди.

«А» серияда бергамоликлар 90та гол уришди, ҳатто янги чемпионни ҳам ортда қолдиришди. Топ-чемпионатлар орасида «Аталанта» «Бавария»дан кейин иккинчи поғонадан жой олди. Малиновский жамоа голларининг 20тасига бевосита алоқадор. Атиги 22 марта бошланғич таркибда майдонга тушган ва асосан ўзига мос позицияни танлаш билан банд бўлган ўйинчи учун ажойиб кўрсаткич.

28 ёшли ярим ҳимоячи нафақат ўзининг энг кучли қуроли - чап оёқда йўллайдиган «замбарак» зарбалари, балки фидойилиги, тезлиги ва ўйинни «ўқий олиш» қобилияти билан ҳам ажралиб турди.

Россиялик зукко шарҳловчилардан бири бўлган Леонид Слуцкий таъкидлаб ўтганидек, олис ва кучли зарбани амалга ошириш учун футболчи туғма тезкорлик ва жисмоний қудратга эга бўлиши шарт. Агар Роберто Карлос ва Руслан Малиновскийларда бақувват гавда ва оёқ мушаклари бўлмаганида, ҳеч қайси мураббий уларни бу даражага олиб чиқа олмасди. Қўшимчасига, туғма иқтидор соҳибларидан ўта юқори меҳнатсеварлик ҳам талаб этилади. Русланнинг таърифича, бундай савиядаги футболчининг бир ҳафтага бўлсада, суръатни пасайтиришга ҳаққи йўқ.

«А» сериянинг расмий статистикаси Малиновскийнинг кўрсаткичлари борасида хатоликка йўл қўйиб, битта ассистни камроқ ҳисоблади. Аслида статистика билан шуғулланадиган порталларда Русланнинг 12та самарали узатмани амалга оширгани қайд этилган. Яъни, Лукакуга нисбатан битта кўп. Боз устига, натижалар бир хил, деб ҳисобланганда ҳам, Малиновский учун катта муваффақият. «Аталанта» доимий ротация шароитида тўп сурди, Лукаку эса мунтазам равишда ва Мартинесдек мукаммал шерик билан ҳамкорлик қилди.

Руслан 36 учрашувнинг 14тасида захирадан майдонга туширилди, Иличич, Пессина, Гомес, Пашалич ва Миранчуклар услубига ортиқча тайёргарликсиз муносиб рақобат кўрсатишга мажбур бўлди ва якунда нафақат ўз жамоадошлари, балки лигадаги бошқа плеймейкерлардан ҳам ўзиб кетди. Бу унинг юксак спорт формасида эканлигидан далолат беради. Якунда Руслан «А» сериянинг май ойидаги энг яхши футболчиси совринини, «Аталанта» эса ЕЧЛ йўлланмасини қўлга киритди.

Умид қиламизки, бу галги муваффақиятни бергамолик мухлислар муносиб тарзда нишонладилар. Ўтган йили мазкур шаҳар Италияда биринчилардан бўлиб пандемия тажовузини қабул қилган ва жиддий муаммоларга дуч келганди. Аммо футбол ҳаётнинг шукуҳли онларини тортиқ этади. «Аталанта» мухлислари Гомес ва Гасперини ўртасидаги можарони афсус-надоматлар билан кузатишганди. Энди уларнинг бахтига, янги қаҳрамон - Малиновский майдонга тушди. Бирданига бўлмасада, аста-секин бош мураббий ишончини қозонди.

Контенинг кетиши «Интер» трансферини барбод қилиши мумкин.

Сўнгги чемпионнинг Малиновскийга жиддий эътибори хусусидаги маълумотлар ҳақиқат. Руслан Контенинг услубига жуда мос. Шўрлик Эриксеннинг жамоани тарк этиши эса, Италия қонунчилиги унга «А» серияда фаолият юритиш ҳуқуқидан маҳрум этиш билан якунланиши мумкин. У ҳолда, жамоа Брозович ва Барелла билан муносиб ҳамкорлик қила оладиган учинчи хавбекни излаб топиши талаб этилади. Пьеро Аузилионинг Русланга ҳурмати жуда баланд.

«Интер»нинг спорт директори ва Мароттанинг ёрдамчиси бир йил аввал Малиновскийни улкан муваффақият кутаётганлигини башорат қилганди. Миланликларнинг молиявий имконияти чекланганлиги боис, таклиф йўллашга ошиқмаяпти, аммо «енг ичидаги» музокаралар олиб борилмоқда. Контенинг кетиши эса трасферни йўққа чиқариши мумкин. Чунки Симоне Инзагининг ўйинчи танлаш бобидаги диди ва майдон марказидаги ўйин услуби ўзгача. Гарчи у савияли дебютантларни рад этмаса ҳам.

«А» серядаги нуфузига кўра, Малиновский Шевченко эмас. Лекин Роберто Манчинининг «Италияга хос бўлмаган» терма жамоаси қайд этган муваффақиятли серияни инобатга олсак, рисоладагидек савиядаги ижрочилар машҳур юлдузлардан кўра кўпроқ қадрланадилар. Чунки улар ортиқча инжиқлик ва нозик таъбликдан холилар, «мойли» жой учун муштлашишни билмайдилар. Руслан Миранчукни қўллаб-қувватлашда давом этмоқда, аммо Алексей Гасперинининг асосий қонун-қоидаларини мукаммал ўзлаштириши кераклигини ҳам таъкидлаб ўтганди. Ундан ошкоралик ва жамоавий ўйин талаб этилади.

Руслан Бундеслига ва АПЛга мос

Малиновский марказий ярим ҳимоячилар дуэтида ҳам ўйнаши мумкин. Бу вариантда Кроос ва Модричга хос узатмалардан фойдаланади. Шунингдек, Нидерландия термасига қарши беллашувдаги каби 3-5-2 схемасида Яремчук билан Шевченко жамоасининг сўл қанотини кучайтириши мумкин.

Руслан шунингдек, ўнг қанотда ўйнашни ҳам хуш кўради. Қисқаси, у универсал жангчига айланиб улгурди. Агар «Аталанта»нинг асосий таркибидан жой олиш мақсадида нечта рақобатчиларни ортда қолдирганини ёдга олсангиз, бу ишни баҳоси 25-30 млн. евро бўлган ўйинчи амалга оширганига ишонмайсиз. Бунақа футболчи учун янги жамоа топиш қийин эмас. Малиновскийнинг молиявий ишларини Коваленкони бергамоликларга пуллаган агент олиб боради. Тўғри, «Шахтёр» ва терма жамоа мухлисларининг Викторга аталган эътирозлари битта вагон ва аравага аранг жой бўлса керак.

Малиновский эса Зинченко билан биргаликда - Шевченконинг асосий юлдузлари. Русланнинг ижобий хислатлари унинг чайир ва бақувват эканлигига асосланганлигини ҳисобга олсак, ёши ҳеч кимни чўчитмайди. Таажжубки, хавбек «Шахтёр»да ортиқча бўлди, йиллаб ижараларда юрди ва ниҳоят, омади кулиб, «Генк»ни танлади. Бельгияда «Аталанта»га кўтарилиш шарафига эга бўлди, Бергамодаги икки йил ичида эса маҳоратини сезиларли даражада оширди. Энди унинг янги жамоага ўтиши Миранчукнинг асосий таркибга ўтишини осонлаштиради. Ахир асосий рақобатчи биттага камаяди.

Энди навбат универсализмни терма жамоада қўллашга

Хўш, Гасперини қандай фикрда? Иличичнинг сохта ҳужумчи позициясини эгаллаган Малиновскийни қўйиб юборишга розими? Гап фақат кўтарилиш ҳақида бормоқда. Хавбекка «Челси» бефарқ эмаслигини билдирди. Шевченко ва Абрамович - узоқ йиллик қадрдон дўстлар. Бироқ трансфер кутилган натижани бермайди. Сабаби, лондонликлар таркибида Русланга боп ўрин йўқ. Ўтган йили Малиновскийга «Лидс» қизиқиш билдирганди. Тўпни рақибларидан тортиб олишни ўринлата оладиган кучли зарба ва аниқ узатмалар соҳиби «Ювентус»га ҳам асқотиши мумкин.

Чалханоглу ва Мхитарян ҳам рисоладагидек ассистентлар, лекин Руслан ҳимояда ҳам катта манфаат келтиради. У таянч ҳудудида ўйнамоқчи эди. Бироқ Гасперини ундаги ҳужумкорлик салоҳиятини устун қўйди. Янги жамоа Русланнинг универсаллигини инобатга олиши аниқ. Аммо ўз савиясини топ мақомига етказиши учун Малиновский терма жамоанинг ёзги турниридан унумли фойдаланиши лозим эди. Украина термаси ҳам, Руслан ҳам Еврода сифатли ўйин намойиш этди - Нидерландияга муносиб қаршилик кўрсатди, Шимолий Македонияни маҳв этди. Гарчи Австрияга кичик ҳисобда имконият бой берилган бўлсада, украинлар учинчи ўрин билан кейинги босқич йўлланмасини қўлга киритишди. Нимчорак финалда эса шведлар 2:1 ҳисобида мағлуб этилди. Қаҳрамонимиз 61-дақиқада Николай Шарапенконинг ўрнига майдонга тушиб, муносиб тўп сурди. Кейинги босқичда эса Украина нисбатан кучлироқ рақиб - Англия миллий жамоасига 0:4 кўринишида имкониятни бой бериб, турнирни тарк этди. Руслан мазкур учрашувни жароҳати сабаб ўтказиб юборди...

***

Шуниси аниқки, Малиновский жисмоний қувват ва ўйинни тушуниш фазилатларидан ташқари, бамаъни ва ақл билан иш тутиши туфайли майдонда яққол ажралиб туради. Ўзи вазмин табиатли, эмандек кучли инсон. Бельгия чемпионатидан топ-чемпионатга кўтарилиш осон бўлмаслигини у яхши тушунганлиги аниқ. Энди Руслан ўзини АПЛда синаб кўришни маъқул кўрар - «Лидс»дан ташқари, «Арсенал» ҳам украиналик ярим ҳимоячига харидор. Нима бўлганда ҳам, мавсумнинг шиддатли парвозларидан бири. Тўрт позицияда рисоладагидек ўйнай оладиган универсални топ-бешликдан ҳам топиш мушкул.

А.АҲМЕДОВ тайёрлади