ОФК Кубогида 1/8 финал босқичи ўйинларини бошқарадиган ҳакамлар маълум бўлди.  25 август куни Қаршида бўлиб ўтадиган «Насаф» — «Аҳал» баҳсида саудиялик ҳакамлар ишлашади. Ўйин назоратчиси эса Тожикистондан.

Бош ҳакам — Муҳаммад Холид Ал Ҳоиш (Саудия Арабистони)
Қанот ҳакамлари — Абдулраҳим Аш Шаммари ва Абдуллоҳ Ёсир (Саудия Арабистони) 
Назоратчи — Давлатманд Исломов (Тожикистон)

Эслатиб ўтамиз, 1/8 финалда Туркманистон клуби устидан қозонилган ғалаба Рўзиқул Бердиев жамоасини Марказий Осиё минтақаси ғолиби сифатида тўғридан тўғри яримфиналга олиб чиқади. Чунки жануб (Мальдив, Ҳиндистон, Бангладеш) ва АSEAN (Вьетнам, Таиланд, Камбоджа, Филиппин) жамоалари ўртасидаги гуруҳ босқичи ўйинлари мезбон ҳудуд топилмагани ҳамда коронавируснинг авж олиши туфайли ўтказилмади. Натижада чоракфинал бўлмайди ва «Насаф»да Қаршидаги ғалаба орқали яримфиналга йўл олиш имконияти бор.

«Насаф» «Аҳал»ни мағлуб этиб яримфиналга чиқса, 20 октябрь куни Ҳонконг жамоаси — «Ли Ман Уорриорс» билан тўқнаш келади. Ғолиб бир ўйинда аниқланади ва мезбон қуръа ташлаш орқали маълум бўлади.