Ливерпуль шаҳри ЮНЕСКО томонидан бутунжаҳон мерослари сифатида рўйхатга олинган қадамжолар қаторидан ўчириб ташланди. Бунинг асосий сабабларидан бири - «Эвертон» стадиони қурилиши...
Ҳа, эндиликда Ливерпуль шаҳрининг тарихий маркази ЮНЕСКОнинг бутунжаҳон мерослари рўйхатидан ташқарида. Ушбу қарор Бутунжаҳон мероси қўмитаси томонидан қабул қилинди. «Ливерпуль - денгизчилар ва савдогарлар шаҳри» объекти ичида тарихий марказдаги 6та ҳудуд қайд этилганди. ЮНЕСКО бунга қадар шаҳарни 18-19-асрнинг энг йирик савдо марказларидан бири сифатида таърифларди: «Ливерпуль замонавий порт технологиялари хўжалиги, транспорт тизими ва бандаргоҳларни бошқариш борасида биринчи рақамли шаҳар ҳисобланади». ЮНЕСКО мутасаддиларининг хулосаларига кўра, шаҳар энди тарихий қадамжолардаги қурилиш ишлари ортидан ҳудуднинг етук умуминсоний қийматини англатувчи нишоналарни йўқотмоқда. Гап асосан Ливерпулда қад кўтараётган янги иншоотлар ҳақида кетмоқда.
ЮНЕСКО аслида 2012 йилиёқ Ливерпуль маъмуриятини шаҳар объектлари элит рўйхатдан чиқариб юборилиши эҳтимоли ҳақида огоҳлантирганди. Ташкилотнинг иддаосига кўра, тинимсиз қурилишлар оқибатида тарихий биноларнинг кўриниши мунтазам ўзгармоқда. Шунга қарамай, Ливерпуль ҳокимияти Liverpool Waters мажмуаси, шунингдек, 52888 мухлисга мўлжалланган «Эвертон»нинг янги стадиони лойиҳаларини маъқуллади. Ливерпуль мэри Жоан Андерсон эса ЮНЕСКО қароридан ҳайрон. Унинг сўзларига қараганда, шаҳар маъмурияти тарихий қадамжоларга мудом эътибор қаратиб келади. Шаҳар раҳбари бу ишларга 100 миллион фунтлаб маблағ ажратилаётганини ҳам қўшимча қилди. Guardian нашри эса Ливерпулнинг ЮНЕСКО назаридан четда қолишини Буюк Британия учун миллий шармандалик, шунингдек, таҳқирловчи зарба сифатида баҳолади.
Бутунжаҳон мероси мақоми БМТдан моддий ёрдам олиш ва сайёҳлик марказлари қаторига кириш ҳуқуқини беради. Ливерпуль шаҳри элит рўйхатга 2004 йили киритилганди. Энди деярли 50 йил давомида рўйхатдан ўчирилган 3-объектга айланди. Олдинроқ Уммондаги ноёб антилопалар қўриқхонаси ва Дрезден яқинидаги Эльба дарёси водийси ҳам бутунжаҳон мерослари рўйхатидан чиқариб юборилганди. Бунга қўриқхона ҳудудининг қисқартирилгани ва сўлим водийда кенг қурилиш ишлари олиб борилгани сабаб бўлганди.
Сўз
- Бизнинг бутунжаҳон мерослари рўйхатига киритилган объектимиз ҳеч қачон ҳозиргидек яхши ҳолатга келган эмасди. Жоан Андерсон (Ливерпуль шаҳри мэри).
А.АБДУВАЛИХЎЖАЕВ тайёрлади
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20