«Боруссия Дортмунд» сардори Марко Ройс навбатдаги интервьюсида жамоанинг янги бош мураббийи Марко Розени мақтади. Шунингдек, Жейдон Санчонинг кетганидан афсусда эканлигини ва Эрлинг Холланд ўзининг бежирим кийиниш услуби билан уни ҳайратда қолдиргани ҳақида сўзлади.

Мавсумга тайёргарликнинг ҳозирги босқичи

- Жуда қийин. Лекин шундай бўлиши аниқ эди. Бу ерга келганимизга уч ҳафтадан ошди, ҳар куни яхши кайфиятда ва тиришқоқлик билан ишлаяпмиз, гарчи ўртоқлик учрашувларидаги натижаларимиздан бунга ишониш қийин бўлсада. Лекин янги мураббийлар штаби билан ишлаш бизга катта завқ бағишламоқда ва ҳар куни янги нарсаларни ўрганяпмиз. Айни пайт машғулотларда ўрганганимиз энди-энди ўйинга киритила бошланган босқичдамиз.

Марко Розедан янги импульс

- Тўлиқ таъсирни сезиш учун бироз кутиш керак. Ҳозирча жамоамиз тўлиқ таркибда эмас, тез орада янги мавсумда катта роль ўйнайдиган футболчилар қўшилишади. Ҳаммасини бирданига қабул қилиш имконсиз, лекин шундай бўлсада, яхши томонга ўзгарган жиҳатлар талайгина ва биз тўғри йўлдамиз. Машғулотлар ажойиб ва биз мураббий нимани кўришни истаётганини баҳоли қудрат намойиш этяпмиз. Асосийси, буни майдонда ва учрашувларда кўрсатиш керак.

Марко Розенинг машғулотлари

- Мунтазам равишда машғулот ва ўйинлар видеотаҳлилини ўтказамиз. Ҳар бир машқ ўзига хослиги билан ажралиб турибди ва ҳар бирида шиддат бор. У бизга юқори ва кучли прессингни, шу билан бирга, тўпни рақиб дарвозасига тезроқ етказиш учун кенг ҳимояни ўргатмоқда ва буларнинг барчаси интенсивлик билан боғлиқдир. Ўйинда интенсивликсиз прессинг қила олмайсиз, ҳар доим оёқда тик туриш керак, ҳамиша орқага тезликда чекинишга ҳаракат қилиш лозим. Булар албатта, ўйинимизни яхшилайдиган кичик элементлар, аммо бунга ҳали вақт керак. Марко Розе билан ишлаш кишига катта завқ бағишлайди, чунки у ўз ишининг устаси. Унинг учун кичик нарсалар ҳам жуда муҳим, шу билан бирга у ажойиб инсон.

Жейдон Санчодан сўнг таркибни кучайтириш зарурати

- Албатта, Жейдон тимсолида сафимизни ақл бовар қилмайдиган даражада кўп нарсаларни бажарган футболчи тарк этди. Бу билан фақатгина унинг голли ҳаракатларини айтмаяпман, балки ўзгача ўйин услуби бор эди. Албатта, хафа бўлдим, лекин бошқа томондан унинг болалик орзуси амалга ошганидан хурсандман. Бизга унинг фазилатлари етишмайди, шунинг учун кўрайлик-чи, ҳужум чизиғида усиз нима қила оларканмиз.

Кучайтириш зарур бўлган жиҳат

- Барқарорлик. Сўнгги йилларда айнан шу жиҳат асосий муаммо бўлиб келмоқда. Мавсумда ажойиб иштирок этган давримиз бўлди, аммо кейин барқарорлик етишмаган узоқ даврни ҳам бошимиздан ўтказдик. Энди бунинг устида жиддий ишлашимиз керак. Барқарорлик - ёмон ўйин билан ҳам керакли натижага эришишни англатади. Айнан шу хусусият чемпион жамоаларни ажратиб туради.

Йиғиндаги ёш футболчилар

- Гёки (Гёктан Гюрпуз) жуда ёрқин таассурот қолдирмоқда. У ўзига тўлиқ мос тушган позицияда ўйнаяпти. У билан майдонда бирга бўлиш менга ёқди. Лекин бошқа ўйинчилар билан ҳам, чунки улар биз билан бўлишдан хурсандликлари, ўзларини исботлаш имкониятига эга эканликлари аниқ. Бу, албатта, улар учун катта имконият.

Холанднинг кийиниш услуби

- Тан олишим керак, у жуда журъатли. Аммо қайсидир жиҳатдан бу услуб унга бироз мос тушган. Эрлинг шунчаки зўр йигит. Агар шундай ўйнашда давом этса, демак хоҳлаганича кийиниши ёки умуман ҳеч нарса киймаслиги ҳам мумкин. Голларини уришда давом этаркан, унинг нима кийиш-киймаслигининг менга фарқи қолмайди.

М.ПЎЛАТОВ тайёрлади