Ўзбекистон терма жамоасининг энг яхши тўпурарларидан бири Максим Шацких Украина жамоаларида ўтказган вақт давомида турли даражадаги турнирларда кўплаб голларни уриб, нуфузли совринларни қўлга киритди. Ва у, шунингдек, Украина клубларида урилган 100та гол маррасини босиб ўтишга муваффақ бўлган биринчи хорижлик футболчи саналади.

Украина клублари легионерлари учун мўлжалланган Максим Шацкиз номидаги тўпурарлар клуби тузилиш тарихига кичик экскурсия бошлашдан олдин шуни эсда тутиш керакки, ушбу рейтинг тузилган вақтда унга кириш учун 40та гол уриш кифоя қиларди. Қисқа вақтдан сўнг, хорижлик тўпурарларнинг голлари кўпайиб, рейтинг талаби 50та голга етказилди ва бу ўз-ўзидан клубга обрў ва эътибор бағишлади.

Максим Шацких УЕФА Чемпионлар Лигаси саралашида (28.07.1999) ўзининг биринчи голини «Жальгирис» (Вильнюс) дарвозасига урди, ўшанда литвалик голкипер Дилис қўриқлаган дарвозага иккита голни жойлаб қўйганди.

Орадан беш йил ўтиб, Италиянинг «Рома» клубига қарши баҳсда бирданига иккита муҳим воқеа рўй берди - «Динамо» (Киев) Евромусобақада Италия клуби устидан ўз уйида биринчи ғалабасига эришди ва Максим «оқ-кўклар» сафида ўзининг 100-голини урди. Бу воқеа 2004 йилнинг 23 ноябрида, УЕФА Чемпионлар Лигаси гуруҳ босқичи доирасидаги Киевнинг «Динамо» ва Римнинг «Рома» жамоалари ўртасидаги учрашувда рўй берганди. Эсингизда бўлса, учрашувнинг 82-дақиқасида ўзбекистонлик ҳужумчи томонидан урилган иккинчи гол унинг учун 100-гол бўлган ва «Динамо» Рим клубини ишончли тарзда (2:0) мағлуб этганди.

100-голидан сўнг, Максим ўз ҳисобига турли клуб мусобақаларида яна 71та гол қўшиб қўйди, уларнинг аксарияти (142) «Динамо» (Киев) клубидаги фаолиятига тўғри келди.

Ўзбекистон терма жамоасининг энг яхши тўпурари шарафига номланган ушбу бомбардирлар клуби 2010 йил 18 июлда Луганскда, Украина чемпионати доирасидаги «Заря» (Луганск) - «Арсенал» (Киев) жамоалари ўртасидаги учрашувдан сўнг ташкил этилган. Ўша куни киевликлар мезбонлардан ишончли тарзда устун келишганди - 2:0.

Тўпурарлар клуби муаллифи, спорт журналисти Виктор Хохлюк ўша куни Максим Шацких билан мулоқот қилиб, унга ўз ғоясининг моҳиятини айтиб беришга муваффақ бўлди. «Канонирлар» ҳужумчисига лойиҳа ёқди ва у иккиланмасдан ўз номини Украина жамоаларининг хорижлик тўпурарлари рамзий клубида ишлатилишига рози бўлди.

Максим Шацких хотираларидан: «Эсимда, 2010 йил июль ойи. Киевнинг «Арсенал» клубида ўйнаётган пайтим, ташқарида жазирама иссиқ. Бирор жойда яшириниб, кондиционер остида ўтирадиган палла, биз эса Луганскда маҳаллий «Заря»га қарши уйин ўтказаётгандик. Тўғри, ғалаба қозондик, мен эса учрашув охирида пенальтидан гол урдим. «Заря» яхши уйин кўрсатди, лекин биз тажрибалироқ эдик... Учрашувдан сўнг маҳаллий журналистларга интервью бердик, улардан бири, ажойиб ва эсда қоладиган фамилия соҳиби - Хохлюк, бир қатор саволлардан сўнг легионер тўпурарлар клубини очиш ва унга менинг номимни бериш таклифи билан чиқди. Албатта, у менга тафсилотларни батафсил гапириб, бу лойиҳа қандай давом этиши ҳақида маълумот берди. Мен ўшанда ҳам қарши чиқмаганман, ҳозир ҳам қарши эмасман, чунки футбол билан боғланган ҳар қандай ғоя бу ажойиб нарса».

Клубдаги ҳозирги ҳолат ҳақида гапирадиган бўлсак, сўнгги марта чоп этилганидан буён жадвалда катта ўзгаришлар кузатилмади.

Донецкнинг «Шахтёр» клуби тўпурари Тайсон грузиялик Васил Гигиадзега етиб олди. Ҳар иккисининг ҳисобида энди 74тадан гол бор. Апрель ойида бразилиялик футболчи «Шахтёр»ни тарк этди ва ўз ватанида, «Интернаcионал» клубида фаолият олиб боряпти.

Максим Шацких клубига номзодлардан уч нафари гол урди - «Динамо» аъзоси, словениялик Вербич Украина чемпионатида дарвозаларни яна уч маротаба ишғол қилди (жами 34та гол), бразилиялик Дентино («Шахтёр») рақиблар дарвозасига тўрт марта гол урди. У Украина чемпионатида учта, УЕФА Чемпионлар Лигасида битта тўп киритиб, голлари сонини 27тага етказди.

Тажрибали хорват Младен Бартулович яна номзодлар рўйхатига қайтди, у «Волинь» ва «Ингулец» сафида Биринчи лигада ўйнаб, элит дивизионга қайтишга муваффақ бўлди ва яна мухлисларни голлари билан хурсанд қила бошлади. Младен 2020|2021 йиллар мавсумида «Ингулец» таркибида Украина Премер-лигасида 7та гол уришга муваффақ бўлди ва шахсий жамғармасини 41та голга етказиб олди.

Юқоридагиларни сарҳисоб қилиб, ишонч билан айтишимиз мумкинки, яқин йилларда тошкентлик тўпурарни биринчи ўриндан ҳеч ким қимирлата олмайди. Нима ҳам дердик, бугунда хорижлик тўпурарларнинг Украинадаги қисмати шу экан...

Шацкихнинг Украина клубларида

эришган ютуқлари:

*  Украина чемпиони (6): 2000, 2001, 2003, 2004, 2007, 2009

*  Украина кубоги соҳиби (5): 2000, 2003, 2005, 2006, 2007

*   Украина чемпионати кумуш медали совриндори (3): 2002, 2005, 2006

*  Украина Суперкубоги ғолиби (2): 2004, 2006

*  2008 йилги «Биринчи канал» кубоги ғолиби

Максим Шацких ҳақида қизиқарли маълумотлар:

* 1999 йили 24 июль. Украина чемпионати 4-туридан ўрин олган «Динамо» (Киев) - «Карпати» (Львов) ўртасидаги уй учрашувининг (3:0) 46-дақиқасида мезбон жамоа дебютанти Максим Шацких ҳимоячи Владимир Езерский ўрнига майдонга тушди.

* Ўзининг навбатдаги ўйинида (1999 йил 28 июль. Чемпионлар Лигаси саралаши) Вильнюснинг «Жальгирис»ига қарши ўйинда у рақиб дарвозасини ишғол қилиб, «дубль» қайд этди ва «Динамо»га литваликлар устидан ишончли ғалабани тақдим этди - 2:0.

* Украина чемпионатидаги иккинчи ўйинида эса (1999 йил 7 август. «Динамо» - «Черноморец» - 4:1) Максим лигадаги биринчи голини нишонлади.

* Украина футболидаги биринчи мавсумидаёқ (1999|2000) 20та гол уриб, чемпионатнинг энг яхши тўпурари бўлди. Бу натижани Максим яна бир маротаба 2002|2003 йиллар мавсумида такрорлади: жами 22та гол.

* Максим Шацких 2004 йил 23 ноябрда УЕФА Чемпионлар Лигаси гуруҳ босқичида «Динамо» - «Рома» ўртасидаги уй учрашувида (2:0) ўзининг 100-голини урди.

* 2010 йил 4 апрелда эса «Металлург»га қарши ўйинда у Украина чемпионатидаги 100-голини урди.

* Тошкентлик ҳужумчи ҳисобида тўртта «хет-трик» бор, ҳаммасини Украина чемпионати ўйинларида «Динамо» (Киев) сафида амалга оширган.

* Умумий ҳисобда «Динамо» таркибида 328та ўйин ўтказган ва 142та гол урган. Шу жамоанинг энг яхши тўпурар-легионери. Клуб тарихидаги энг яхши тўпурарлар рўйхатида эса учинчи ўринни эгаллаб турибди. Ундан олдинда фақат Олег Блохин (271) ва Сергей Ребров (177) бор.

* Шацких «Арсенал» (Киев) либосида 100та ўйинда 23та, «Говерла» (Ужгород)да 29 ўйинда 6та гол урди. «Черноморец» (Одесса) таркибида эса етти учрашувда рақиблар дарвозасини ишғол қилолмади.

* Максимнинг ўртача кўрсаткичи - ҳар ўйинда 0,37та гол (Украина клублари учун 464та расмий учрашувда 171та гол).

Максим Шацких клуби:

19.07.2021 й. ҳолати

Максим Шацких клубига номзодлар:

1		Максим Шацких	124	24	23	171
2		Луис Адриано[14]	77	16	32	125
3		Брандао[15]	65	11	15	91
4		Алекс Тейшейра[16]	67	10	12	89
5		Тайсон[17]	50	7	18	75
6		Васил Гигиадзе	61	10	3	74
7		Диого Ринкон	46	13	12	71
8		Валентин Белькевич	51	9	9	69
9-10		Лаки Идахор[18]	54	7	3	64
9-10		Жадсон[19]	41	6	17	64
11-12		Георгий Деметрадзе	52	8	3	63
11-12		Автандил Капанадзе	57	6	0	63
13		Генрих Мхитарян[20]	50	5	6	61
14-15		Клейтон Шавьер[21]	46	2	11	59
14-15		Факундо Феррейра[22]	43	8	8	59
16	/	Эдуардо да Силва[23]	38	10	9	57
17		Джулиус Агахова	35	10	10	55
18		Фернандиньо	31	9	13	53

Изоҳ:  УЧ - Украина чемпионати, УК - Украина кубоги, ЕК - еврокубоклар. Фаолиятини давом эттираётган футболчилар номи қалин қора шрифт билан белгиланган.

Виктор Хохлюк