Халқаро ўртоқлик ўйини

Сречко Катенецнинг Ўзбекистон миллий жамоаси бош мураббийи сифатидаги дебюти УЕФА вакили - Швеция термасига қарши ўртоқлик ўйинига тўғри келди. Вакилларимиз Стокгольмда 1:2 ҳисобида мағлубиятга учрашди, лекин скандинавларда чакки таассурот қолдиришмади, бизнингча. Тўғри, шведлар бор кучларини ишга солишмагандир, айниқса, таркиб нуқтаи назаридан қараганда...

Ўйингача...

Швеция сафаридан олдин Сречко Катанец тузган таркибда мажбурий ўзгариш бўлди - жароҳатланган Жавоҳир Сиддиқов ўрнига «Локомотив»нинг бошқа вакили - Азиз Омонов жалб этилди. Ўз ўрнида айтиш керак, Омонов Суперлиганинг охирги ўйинларида анча самарали ўйнади. Умуман олганда, у жорий мавсум чемпионат ва кубок баҳсларида жами 19та ўйинда майдонга тушиб, 7та гол уришдан ташқари, яна 2тасига ассистентлик қилди. 2 сентябрь куни Стокгольмга Истанбул орқали учган Ўзбекистон миллий жамоаси делегациясини ЎФА бош котиби Аваз Максумов бошчилигидаги мутахассислар ва Швецияда бўлиб турган ватандошларимиз илиқ кутиб олишди. Жамоамиз у ерда «Роял Парк» меҳмонхонасига жойлашди. «Рома» ҳужумчиси Элдор Шомуродов терма жамоа таркибига айнан Стокгольмда қўшилди. 

ЎФА матбуот хизмати Сречко Катанецга юзланиб, унинг ўйиндан олдинги фикрларига қизиқди. «Ҳаммаси ажойиб. Аввало, аъло даражали ташкилотчилик  учун ЎФАга миннатдорчилик билдиришим керак. Футболчилар ўз ишлари билан банд. Муаммо йўқ, фақат Жавоҳир Сиддиқовнинг жароҳатидан бироз ташвишланмоқдаман. Ўйлашимча, у тез орада сафга қайтади. Ўйинга тайёрмиз. Швецияга узоқ парвоз таъсиридами, кеча футболчиларда чарчоқ аломатлари сезилди. Ўйингача барчаси ўз изига тушади. Ҳали йигитлар умумий ҳолатининг 5 фоизидан ҳам хабардор эмасман. Ўртоқлик учрашувлари айнан шунинг учун керак. Бизни жуда қийин ўйин кутмоқда. Умид қиламанки, эртанги учрашувда ўзим учун кўпроқ ижобий, камроқ салбий нарсалар кашф қиламан. Машғулотлар эмас, ҳақиқий ўйин бизнинг қандайлигимизни кўрсатиб беради», - деди Катанец.

Ўйин...

Швеция - Ўзбекистон учрашуви 5 сентябрь куни Стокгольмдаги Friends стадионида Тошкент вақти билан соат 18:00да бошланди. Олдинроқ ўйин чипталари 100 крона (чамаси 122 минг сўм)дан сотувга чиқарилгани маълум қилинган эди. Championat.asia сайтининг маълум қилишича, стадионга чамаси 1000 нафар ўзбекистонлик мухлис ташриф буюрди. Умуман, карантин чекловлари туфайли Friends Arena трибуналарига 13 минг мухлис киритишга рухсат берилганди. Ўйин «Спорт» каналида тўғридан-тўғри трансляция қилинди ва шарҳни чўзишга ҳожат йўқ. Фақат айрим жиҳатларга тўхталиш билан чекланамиз. Биринчи ҳолат - Швеция термаси бош мураббийи Янне Андерссон 4 кунча олдин испанларга қарши кечган учрашувда қатнашган футболчилардан ҳеч бирини бошланғич таркибга киритмади. Яъни у жамоасининг яқин захирасини синовдан ўтказиб олди. Иккинчи ҳолат - Сречко Катанец биринчи ўйиндаёқ таркибни ёшартириш йўлини тутди. Хусусан, Абдулла Абдуллаев ва Фаррух Икромовни бошидан ўйинга ташлади, яна Достон Турсуновни ҳам. Кўриниб турибдики, словениялик мутахассис бу борада ҳали яна янгиликларга қўл уради, фақат бунинг учун футболчилар билан яқинроқ танишиб олиши керак. Учинчи ҳолат - ўйин жамоамиз учун нохуш бошланганига қарамай, футболчилар эсанкираб қолишмади. Оддий айтганда, 6-дақиқадаёқ юзага келган автогол умумий кайфият ва ўйин режасига катта таъсир кўрсатгани йўқ. Шведлар 35-дақиқада Элдор Суюнов дарвозасини иккинчи марта нишонга олишганида ҳам, ҳовлиқиш ёки ўйиндан чиқиб қолиш ҳолати кузатилмади. Тўртинчи ҳолат - қарши ҳужум самараси. 70-дақиқада Фаррух Сайфиев узатмасидан сўнг дарвозабон қаршисига чиқиб борган Элдор Шомуродов бежиз «А» серияда ўйнамаётганини кўрсатиб қўйди.

Умуман олганда, янги Ўзбекистон терма жамоаси ўйинида бир қатор ёқимли жиҳатлар кўзга ташланди. Лекин хулоса чиқаришга шошилмаганимиз маъқул. Ахир битта ўйинга қараб, бутун сценарийни баҳолаш мумкин эмас. Дарвоқе, маълумотларга қараганда, Швеция - Ўзбекистон учрашувини стадионда «Селтик» ва «Мидтьюлланд» клублари скаутлари ҳам кузатишган. Айтишларича, улар «Насаф» футболчиларидан бирига эътибор қаратишган, катта эҳтимолки, Ойбек Бозоровга.

5 сентябрь

ШВЕЦИЯ - ЎЗБЕКИСТОН - 2:1 (2:0)

Стокгольм. Friends Arena стадиони.  

Бош ҳакам: Кай Стен (Норвегия)

Голлар: Абдулла Абдуллаев (6-авт.), Исаак Кизе-Телин (35) - Элдор Шомуродов (70).

Швеция: Кристоффер Нордфельдт, Мартин Ольссон, Йоаким Нильссон, Маркус Даниэльсон (Виктор Классон, 81), Маттиас Юханссон (Даниэль Сундгрен, 62), Маттиас Сванберг (Карл Старфельт, 62), Йенс Каюсте, Кен Сема, Исаак Телин, Робин Квайсон (Жордан Ларссон, 62), Йеспер Карлссон.

Ўзбекистон: Элдор Суюнов, Ҳожиакбар Алижонов (Иброҳимхалил Йўлдошев, 76), Фаррух Сайфиев, Абдулла Абдуллаев, Достон Турсунов, Одил Ҳамробеков (Ҳожимат Эркинов, 89), Отабек Шукуров, Ойбек Бозоров (Аброр Исмоилов, 51), Жалолиддин Машарипов (Азиз Омонов, 89), Фаррух Икромов (Санжар Қодирқулов, 50), Элдор Шомуродов (Игорь Сергеев, 76).

Огоҳлантиришлар: Мартин Ольссон (52) - Одил Ҳамробеков (52).

Ўйиндан сўнг...

Янне Андерссон (Швеция терма жамоаси бош мураббийи): - Бугун майдонга янги шаклланаётган жамоа тушди. Футбол жамоавий ўйин ва унда ҳаммаси бир-бирига боғлиқ бўлиши керак. Ўйинни яхши бошладик ва тезкор гол урдик. Кейин ҳаракатни бироз камайтирдик. Одатда турли дивизионда ўйнайдиган икки клуб тўқнаш келса, улар ўртасидаги асосий фарқ тезликда билинади. Бугун шундай бўлди. Фарқ - тезликда. Иккинчи бўлимда тезликни йўқотдик. рақиб эса ўйинни назорат қилишга уринди. Меҳмонлар қарши ҳужумга ўтишганида, жамоавий ҳаракат кўринмади - футболчилар шунчаки, ортдан қувишди.

Умуман олганда, Ўзбекистон термаси чакки эмас экан. Тўп билан яхши ҳаракатланди. Айниқса, дарвозамизни ишғол қилган ҳужумчи кучли таассурот қолдирди. 14-рақамли ўйинчи (Элдор Шомуродов) жуда кучли экан.

Сречко Катанец (Ўзбекистон терма жамоаси бош мураббийи): - Жамоа кўрсатган ўйиндан қониқдим. Яхши ўйнадик. Албатта, баъзи хатоларга йўл қўйдик, лекин бу нормал ҳолат. Таркибда ёшлар кўп. Энди шулар билан янги жамоа шакллантиришимиз керак. Келажакда шу руҳда давом этамиз. Кучли жамоаларга қарши кучли ўйин кўрсатишга интилиш керак. Ҳимоячилар бироз агрессивроқ бўлишларини хоҳлардим. Нафақат ҳимоя, балки бутун жамоа агрессив ҳаракатланиши лозим. Камчилик шу - агрессив ўйин йўқ. Жамоамиз бироз секин ҳаракатланди, қанот футболчиларида ҳам шу камчилик сезилди. Лекин хотиржамман.

Испания термаси билан бир хил натижа қайд этдик (кулади). Ҳазил, албатта. Швеция термасига бўлажак баҳсларда омад тилайман. Рақиб бугун жиддий ўйин кўрсатди. Омад. Ҳаммага раҳмат!