Франциялик ярим ҳимоячи Тьемуэ Бакайоко «Милан»га қайтганидан сўнг биринчи матбуот анжуманини ўтказди.

- «Милан» ўзгарибдими?

- СПАЛга қарши охирги ўйинимни яхши эслайман. Афсуски, биз Чемпионлар Лигасига чиқа олмагандик, ўшанда. Энди эса ЕЧЛда қатнашадиган «Милан»га қайтганимдан хурсандман. Чунки бугунги жамоа мен ўйнаган пайтдагисидан анча кучли.

- Бу ерда ҳамма нарсани яхши биласиз. Мазкур омил сизга мотивация берадими?

- «Милан» мухлислари билан муносабатларим дуруст. Тан олиш керак, аввалига орамиз унчалик яхши эмасди, лекин кейин ҳаммаси жойига тушиб кетди ва мен уларнинг ҳурматига сазовор бўлдим.

- Пиоли сиздан нималарни кутмоқда ва жамоага бошқа ярим ҳимоячиларидан кўра кўпроқ нима бера оласиз?

- Мураббий билан хотиржам гаплашдим ва унга бор кучим билан ҳаракат қилишимни билдирдим. Жамоа шундоқ ҳам яхши ишламоқда, мен эса ёшлар билан ўз тажрибамни бўлишмоқчиман.

- Паоло Мальдини билан муносабатларингиз қандай?

- Ҳаммаси зўр. Миланга келганимда, у менга катта ёрдам берди. Қийин пайтларда доим «лаббай» деб турди. У ажойиб инсон ва мен ундан кўп нарса ўргандим.

- Бугунги «Милан» Гаттузонинг «Милан»идан фарқ қиладими?

- Ҳа, бу бошқа «Милан», французлар ҳам кўп. Жамоа ҳам аввалгидан кучлироқ. Янги жамоадошларим билан ўйнашни ва яхши натижаларга эришишни сабрсизлик билан кутяпман.

- Миланда ўзингизни уйдагидек ҳис қиляпсизми? Скудеттога эришишни хоҳлайсизми?

- Икки йиллик саргардончиликдан сўнг энди шу ерда қолмоқчиман. Барча менинг ушбу клубга бўлган муносабатимни билади ва ўзимни уйдагидек ҳис қиляпман, албатта. «Милан»да ўйнаркансиз, максимал даражада ҳаракат қилиш талаб этилади. Иложи борича кўпроқ соврин ютиш учун бор кучимни сарфлайман.

- Ижарама-ижара юриш жонингизга теккандир?

- Бундай саёҳатлардан кейин менга барқарорлик керак, шунинг учун ҳам бу ерда узоқ вақт қолишни хоҳлайман. Буни амалга ошириш учун эса қўлимдан келганини қиламан.

- Ўйинга тайёрмисиз?

- «Милан» кучли ярим ҳимоя чизиғига эга. Мен ҳам ўз ҳиссамни қўшишга, ҳар куни бор кучим билан ишлашга тайёрман. Кейин, агар мураббий қарор қилса, майдонга чиқаман.

- Кессье ҳақида нима дейсиз?

- Унинг ёнида ўзимни яхши ҳис қиляпман. У анча ўсибди, ҳар томонлама ривожланибди. Умид қиламанки, у «Милан»да қолади.

- Ибрагимович билан гаплашишга улгурдингизми?

- Машғулотлар пайтида бироз суҳбатлашдик. Златан ва унинг фаолиятини барча яхши билади. Биз унга намуна сифатида қарашимиз ва профессионаллигидан ўрнак олишимиз керак. У билан бирга ўйнаш имконига эгалигимдан хурсандман.

- Дастлабки кунларда Пиоли қўл остидаги «Милан» ҳақида қандай фикрда эдингиз?

- Жамоада атиги иккита машғулот ўтказдим. Ҳар доим мураббийни, унинг маслаҳат ва кўрсатмаларини диққат билан тинглайман. Ҳозирча Гаттузонинг менга айтганларидан унчалик фарқни кўрмадим.

- Скудеттони ютиш учун қайси жамоаларни мағлуб этиш керак?

- «Милан», шубҳасиз, пойга етакчиларидан. Ўтган йили ҳозирги жамоадошларим иккинчи бўлишди. Энг муҳими - ўйиндан ўйинга ўтиш ва албатта, рақиблар прогрессини таҳлил қилиш...

- Сизга иккиталик таянч ярим ҳимоя схемаси қулайми ёки учталик?

- Қандай бўлмасин, шунга кўра ҳаракат қиламан, чунки мен ёлғиз эмас, балки шериклар билан ўйнайман. Таркибни мураббий танлайди ва мен қўлимдан келганича ҳаракат қиламан.

Манба: milannews.it, МУҲАММАДХОН тайёрлади