Бир пайтлари ўта тажовузкор ва қўпол ўйинлари билан ном қозонган Ли Каттермол ҳозирда анча сермулоҳаза, мураббийликка тайёрланмоқда. У FourFourTwo нашрига берган интервьюсида ўз обрўси, мураббийлар ва кубок финалидаги омадсизликлар ҳақида гапирди.

- 2019 йили «Сандерленд»даги 10 йиллик фаолиятингиз якунланганда, ҳаёт йўлингиз бундай кўриниш олишини кўпчилик кутмагани аниқ. Дастлаб Нидерландияга кўчиб ўтиш, кейин эса фаолиятни 32 ёшда якунлаш, ҳозир эса мураббийлик фаолиятингиз бошланиш арафасида...

- Эредивизияда «Венло» шарафини ҳимоя қилган онларимдан роҳатландим, лекин COVID-19 ўтган йили бутсаларимни михга илишимда катта роль ўйнади. Кундалик ҳаёт ва саёҳатлар масаласида жуда кўплаб чекловлар қўйилди... Миямда ҳамма нарса ўз ўрнига тушишига эришдим - мураббийлик билан шуғулланишни хоҳладим. Ҳа, ёшим 32да эди, аммо ўзимни гўё 36-37 ёшдек ҳис этардим, чунки 17 ёшимдан футбол ўйнардим. Кўплаб менежерлар ва мураббийлар ҳозир фаолиятларини эрта бошлашмоқда, шу боис, хаёлларим фаолиятимда янги босқични бошлаб, навбатдаги қадамни қўйиш вақти келганидан дарак берди. Ҳозир «Мидлс­бро»да 14 ёшли болалар билан ишлаяпман, ишим ўзимга ёқади.

- 2006 йилги Тайн-Тисс дербисида, «Мидлсбро» таркибида Премьер-лигадаги дебют 17 ёшли ўсмир учун оғир ўтганмиди?

- Ростини айтсам, ўша ўйинни яхши эслолмайман, лекин мураббийимиз Стив Макларендан, клубдошларимдан ва ОАВдан ижобий фикрлар олганим хотирамда қолган. Ортга назар ташлаб, шуни айтишим мумкинки, бу қадар ёш давримдаги дебют идеал бўлмаганди. Бу ғалати туюлиши мумкин, аммо агар 21 ёшда бўлганимда, энг яхши футболчи, энг яхши инсон ва албатта, бундай старт учун анча чиниққан бўлардим. Лекин ҳаётда кескин «сакраш» қачон рўй беришини олдиндан тахмин қилиб бўлмайди, шундай экан, у режалаштирилганидан аввалроқ рўй берса, бунга тайёр туриш керак.

- Тажовузкор футболчи бўлганингизни гапирадиганларга нима дейсиз? АПЛда 77та сариқ ва 8та қизил карточка - бўлажак мураббий учун намунали кўрсаткич эмас, деб ҳисоблашмоқда айрим танқидчилар.

- Номимни «гугл»дан қидирмаслигимнинг сабабларидан бири шу. 22-26 ёшимда оғир даврни бошдан кечирдим, ҳар қандай тўқнашувим мухлисларнинг ўрниларидан туришларига сабаб бўлган, рақиб футболчилари эса ҳакамни ўраб олиб, унга босим уюштиришарди. Хизмат рўйхатим яхшиланди, бу статистика менинг шахс сифатидаги кўринишимни намоён этмайди. Танқидчилар мураббийликка муносиб эмаслигимни айтишаётган бўлса, уларга яхши менежер бўлиш учун жамоа ҳақида қайғуриш кераклигини айтаман. Ҳатто энг катта танқидчиларим ҳам билишади - ҳеч бир клубда лоқайд футболчи бўлмаганман.

- «Мидлсбро»да биринчи сардорингиз Гарет Саутгейт бўлган, айнан у сизга мураббийлик ҳам қилди. Ушбу мутахассис билан чиқиша олмадингизми?

- Нега энди? Муносабатларимиз ёмон эмасди. Яқин ойларда кўришмоқчи бўлган одамларим рўйхатини тузганман ва Гарет унда биринчи ўринни эгаллаб турибди. У билан бажонидил вақтимни бирга ўтказардим. Саутгейт фантастик етакчи ва сардор эди, чиндан ҳам ажойиб мураббийга айланди. Унга «Мидлсбро»ни тарк этмоқчилигимни, Стив Брюснинг «Уиган»ига ўтишимни айтганимда, мени тўғри тушунди.

- 18 ёшингизда, 2006 йилги УЕФА кубоги финалида - «Боро» тарихидаги энг йирик ўйинни захира ўриндиғида кузатиш қийин бўлгандир?

- Стив Маклареннинг менга кўп нафи теккан, биз ҳозир ҳам мунтазам гаплашиб турамиз. Албатта, бундай бўлишини кутмагандим, лекин ўшанда асосий эътиборни тажрибага қаратганини тушунишим мумкин. Ростини айтсам, мени ҳисоб 0:4 бўлиб турганда майдонга туширганидан ғазаблангандим. Ўйлаб қолдим: «У мендан нима кутяпти? Ўйинни ўзгартиришим керакми?». Ҳозир эса тушуняпман, ўйин бой берилган паллада у менга йирик финалда майдонга тушиш имкониятини тақдим этганди - орадан 15 йил ўтгач, бу воқеа фаолиятимдаги энг асосийси бўлиб турибди. Жамоа­миз ажойиб эди. «Мидлсбро» таркибида Жимми Флойд Хассельбаинк, Марк Видука, Будевейн Зенден сингари юлдузлар тўп суришарди. Каттароқ бўлганимда улар билан бирга ўйнай олмаганимдан жуда афсусдаман.

- Тўртта финалда ютқазганингиз учун ичингиздагиларни айтолмаганлик ҳисси сизни таъ­қиб этмайдими?

- У пайтда кўплаб оғриқлар ва эмоционал зарбаларни қабул қилгандим, бироқ ҳар ҳолда, ушбу финалларда қатнашдим. Айниқса, менга 2014 йилги Лига кубоги финали ёққанди, ўшанда «Сандерленд» «Манчестер Сити» билан ўйнаганди. Танаффусгача муносиб равишда 1:0 ҳисобида бордик, кейин ҳисоб 1:2 бўлиб турганда ҳам мағлубиятдан қутулишга яқин келгандик, аммо якунда яна бир гол ўтказиб, ютқаздик. Гус Пойет бизни ўша учрашувга ажойиб тарзда тайёрлаганди. Бор кучимизни майдонда қолдирганмиз, ҳеч ким вазиятга бефарқ эмасди - охиригача курашгандик. Гарчи якун позитив бўлмасада, иштирокимиздан фахрлансак арзийди.

- Нега Netflix томонидан ишланган, клубнинг қуйи лигага тушиб кетиши ҳақида сўзловчи «Сандерленд, ҳозирча ўлмайман» сериалида кам кўриниш бергансиз?

- Қисқача айтганда, ўзим хоҳламадим. Эътибор марказида бўлишни унчалик хушламайман. Қолаверса, ижтимоий тармоқлар ва шунга ўхшаш нарсаларни ёқтирмайман, атрофда камералар пайдо бўлганда, орқа планда эканлигимдан қувондим. Ҳозир ҳужжатли фильмлар ишлаш урфга кирган, аммо улар мени қизиқтирмайди.

- Ҳойнаҳой, мураббийлар ҳақида сўзлашга арзигулик кўплаб воқеалар гувоҳига айлангансиз, ахир «Сандерленд»да нақ 10 нафар устоз қўл остида ўйнашга улгургансиз...

- Уларнинг ҳаммаси билан яхши чиқишганман. Кўпчилик Паоло Ди Каниони мени жамоадан «ҳайдагани» учун ёқтирмайди, деб ўйлашади, лекин ундай эмас. Ким биландир муносабат ўрнатишдан аввал у ҳақда ҳамма нарсани билиш керак, Паоло билан эса орамизда умуман айтишга арзигулик нарса бўлмаган. Унда менга ёқадиган ёки ёқмайдиган жиҳат йўқ эди. У келганида, жароҳат олгандим, кейинги мавсум бошида эса таркибда эмасдим. Деярли «Фулхэм»га ўтгандим, шунда зўр бўларди, чунки Мартин Йол қўл остида ўйнаб кетишимга ишонардим, лекин ўтиш амалга ошмади. Бунинг ўрнига саккиз ҳафтани мустақил шуғулланиш билан ўтказдим, ҳатто конусларни ҳам майдонга ўзим жойлаштирардим... Умуман, бу ҳаётимдаги ёмон давр эмасди, чунки бўлажак рафиқам Клэрни учратгандим. Биз учраша бошлаганимиздан кейин, орадан бироз вақт ўтгач, у мендан қачон ўйнашни бошлашим ҳақида сўради. Ўша пайтда бу жуда яхши савол эди. Майдонга қайтганимда, иккимизжума оқшомида тамадди қилишга боролмайдиган бўлдик.

- Дик Адвокат билан муносабатларингиз ҳақида гапирсангиз.

- Бир сафар у ўйиннинг 30 дақиқаси ўтганда алмаштирганди. Жуда ёмон эмоционал ҳолатда эдим, чунки ўша ёзда жиддий йўқотишга учрагандим: амакиваччам яқин қариндошим ва энг яхши дўстимни йўқотгандим. Бошим айланиб қолганди, футбол ўйнайдиган ҳолатда эмасдим. Аммо Дик билан ишлаш менга жуда ёққанди, у жуда яхши, чуқур билимга эга мураббий эди. «Венло»да ўйнаётганимда ҳам у билан кўришгандим, ўшанда «Фейеноорд»ни бош­қарарди. Унинг фаолияти чўққисида Адвокат билан бирга ишлашни жуда хоҳлаганман.

- Мамлакат миллий жамоасига чақирилмаганингиздан ажабланмадингизми, ахир ёшлар термасида 16та ўйин ўтказгандингиз?

- Ҳозир ёш ярим ҳимоячилар учун терма жамоа сари йўл очиқ - у пайтлари бундай эмасди. Албатта, рўйхатларни кузатиб бордим, айниқса, ўйиним яхши чиққан пайтларда. Лекин ҳеч қачон миллий жамоага чорловни фаолиятим ривожидаги йўл деб ҳисобламаганман. Ва албатта, очиғи, термага киришимга ишонмасдим. Ярим ҳимояда Стивен Жеррард, Фрэнк Лэмпард ва Скотт Паркердек ижрочилар борлигида рўйхатга кириш осон эмасди.

- Айтишларича, гольфни яхши ўйнар экансиз. Шу тариқа тажрибали мутахассислардан бўлажак фаолиятингиз учун зарур тавсияларни олганингизни эшитдик. Шу ҳақда гапиринг.

- Нортумберленддаги уйим яқинида жойлашган майдонда ўйнаб тураман. Алан Ширер ҳам клуб аъзоларидан бири ҳисобланади, у билан бир нечта раунд ўйнаганмиз. У ажойиб инсон, гольфда ҳам ёмонмас. Ҳатто «Сандерленд»да тўп сурган пайтимда ҳам аҳволим ҳақида суриштириб турарди. Ҳозир эса ундан бир қанча тавсиялар оляпман. Жон Карвер ҳам менга жуда кўп ёрдам берганлардан бири. Мураббийликка ўтаётганимдан хабар топгач, ўтириб суҳбатлашишни таклиф этди, сэр Бобби Робсон билан қандай ишлагани ҳақида гапириб берди. Шунингдек, собиқ мураббийим Стив Брюс билан ҳам тез-тез учрашиб тураман. У ҳақда ОАВда кўп ёзишмайди, лекин футболда Брюс каби машҳур шахслар кўп эмас. Брюс билан бирга ишлаганлар у ҳақда гапиришаркан, футболга ёндашуви, қараши ва ушбу спорт турини тушуниши ҳақида ёмон фикр билдиришганини эслолмайман.

А.АБДУВАЛИХЎЖАЕВ тайёрлади