ВЕРНИДУБДАН ЗИДАНГАЧА. ЕВРОФУТБОЛНИНГ ТОП-МУРАББИЙЛАРИ ҚАНДАЙ КИЙИНИШМОҚДА? Молдованинг «Шериф» клубини бошқараётган украиналик мураббий Юрий Вернидуб ЧЛ гуруҳ босқичидаги биринчи ўйин арафасида уст-бошига ҳам алоҳида эътибор қаратишини яширгани йўқ: «Бундай тантанали катта воқеликни тўйдек қабул қиламан, албатта. Яъни майдон четида мени костюм-шимда кўрасизлар». footboom.com сайти Юрий Вернидубнинг бундай ёндашуви таъсирида еврофутболдаги сара мураббийлар ўйинлар ва турли расмий тадбирларда қандай кийинишларига бирров нигоҳ ташлади. Тушунарлики, кийиниш услуби - ҳар бир инсоннинг ўзига хос «ташриф қоғози». Айниқса, машҳур кишилар, дейлик, таниқли жамоа бош мураббийининг уст-боши ҳамиша ҳамманинг эътиборида бўлади. Марҳамат, футбол олами мутахассисларининг бу борадаги дидларига ўзингиз баҳо беришингиз мумкин.

Роберто Манчини. Италия миллий жамоаси бош мураббийи одатда кўк ёки қора тусли классик костюмни афзал кўради, албатта, бўйинбоғ ҳам тақади. Робертонинг оёқ кийими масласидаги танлови - ёпиқ бантли пойафзал (оксфордча услуб). Италиялик мутахассис совуқ ҳавода пальто ёки мўйнали ёқаси бор иссиқ куртка кияди. Ҳар қандай ҳолатда ҳам унинг асосий мода элементи ўзгармайди - бўйнига жамоа шарфини маҳкам ўраб олади.

Йоахим Лёв. Ташқи кўринишига ҳар доим катта эътибор билан ёндашадиган немис мураббийи. У кўпинча қора рангли костюм ва бўйин қисми V шаклида қир­қилган свитер танлайди. Умуман, Йоахимнинг кийиниш услуби йиллар давомида такомиллашганига шубҳа йўқ.

Диего Си­мео­не. «Атлетико» бош мураббийи нафақат натижа, балки бенуқсон имидж­-ни сақлаш учун ҳам жавобгардир. Аргентиналик мутахассис енгил ҳаракатланиш учун кўпинча костюм ва оксфорд услубидаги оёқ ки­йимини маъқул кўради, яна бир тусли бўйинбоғни. Симеоне одатда қўлига чарм бандли соат ҳам тақади.

Хосеп Гвардиола. «Манчестер Сити» бош мураббийи костюм-шим билан чекланиб қолмай, норасмий кийиниш услубига ҳам тез-тез мурожаат қилади. Испаниялик мутахассис кўпинча нафис свитер ёки кардиган билан бирлаштирилган енгил пальтода кўриниш беради. Бу образини қорамтир шим, кроссовка ёки кеда (баъзан яримботинка) тўлдиради. Хосепнинг энг севимли бренди - Stone Island.

Андрей Шевченко. Украина футболи фахри нафақат яшил майдонларда муваффақият қозонди, балки мода дунёси дарвозасига ҳам «гол урди». Шева Италияга кўчиб ўтгани билан барчасини дарҳол тушунди: «Апеннинни лол қолдириш учун зарур фазилатлардан бири - дид ва тўғри кийиниш. Мода  италияликлар қонида бор». Шевченко шу тариқа янги асрнинг илк йиллари Жоржио Армани билан учрашиб, итальян модасига қадам ташлади. Оддий айтганда, Милан эркаклар мода ҳафталигида Giorgio Armani бренди модели сифатида намоён бўлди. Emporio Armani 7 ва EA7 услублари яратилишига айнан Шевагол ўйини илҳом бағишлаганини ҳам айтиш ўринли. Андрей энди smart casual услубига мойил: одатий кўйлак, чинос ёки жинси шими, спорт кедаси, слипон (боғичсиз енгил пойафзал). Расмий тадбирларда эса Шевани асосан Tom Ford, Armani, Dolce&Gabbana брендларига мансуб классик костюмда кўриш мумкин.

Антонио Конте. Енгил костюм, усти ёлтироқ туфли ва оқ кўйлак - бу Италия миллий жамоаси собиқ устозининг одатий образи. Антонио баъзан пиджакни спорт курткаси билан алмаштириши мумкин. Умуман, у Adidas компанияси маҳсулотларига ошуфта.

Зайниддин Зидан. Франциялик мураббийнинг услуби нозик. Асосийси, у турли кийимларни ажойиб тарз­да бирлаштириш ҳадисини олган. Умуман, бир неча минг евроли бежирим италь­янча костюм ҳам, спорт либоси ҳам Зиданга бирдек ярашаверади. «Реал»нинг собиқ устози оёқ кийими масаласида ҳам хилма-хилликни ёқтиради, шунингдек, узун пальто ва курткани ҳам.

Эусебио ди Франческо. Ди Франческо ва кийиниш қобилияти - булар синоним, гўё. Италиялик мураббий кўк ранг «жинни»сидир. Унинг энг машҳур образи - футболка, кардиган, бўйинбоғ ва пиджак. Буларни ўзига тўлиқ мос келувчи кўзойнак тўлдиради.

Арсен Венгер. Икки услуб ўртасида «ўйин» қиладиган мутахассис. Юпқа қизил бўйинбоғ билан бойитилган кулранг кардиган ва бежирим пиджак ёки Nike компаниясининг тиззагача келадиган улкан курткаси. Дарвоқе, Puma ҳам француз мутахасисисига алоҳида куртка тикиб берганди - тугмали, классик ёқали ва калтароқ.

Юрген Клопп. Германиялик мураббийи об-ҳавога қараб, қулай кийинишни ўрнига қўяди. Қа­лин пиджак ва шим, кроссовка - Юрген услубидаги асосий элементлар. Бунга кўзойнак ва қора ёки қизил тусли клуб кепкасини қўшинг. Айтганча, Клопп кўзойнакдан воз кечганида, интернет том маънода тахминлар ва ҳазилларга тўлиб кетди. Шунда унинг яқинлари мураббий кўзини операция қилдиргани ва энди кўп кўзойнак тақолмаслигини тушунтиришди.

Луис Менотти. Аргентиналик машҳур мураббий ҳам кийиниш услубчиларидан эди. У футбол ўйини эмас, балки қандайдир кечага махсус кийингандек таассурот қолдирарди: ёрқин спорт костюми, олтин соат, ранг-баранг кўйлак... Менотти ташқи кўринишига турли аксессуарларни муваффақиятли қўшган. Айниқса, олтин занжир ва билаг­узукни.

Ҳ.АТАВУЛЛАЕВ тайёрлади