Сўнгги пайтларда омад Оливье Жирудан юз ўгиргандек. Аввалига 35 ёшли ҳужумчи коронавирус билан курашди, кейин жароҳат олиб, Франция терма жамоасига УЕФА Миллатлар лигаси финалида ёрдам бера олмади. Бироқ бу вақтинчалик синовларни тўғри қабул қилган тажрибали ҳужумчи «Милан»нинг навбатдаги учрашувларига қизғин тайёргарлик кўрмоқда.

The Guardian нашрига берган интервьюсида Жиру «Арсенал» ва «Челси»даги фаолияти, Бензема ва Мбаппега муносабати хусусида тўхталиб ўтди. Шунингдек, у Худога ишониши ва ана шу ишонч унга доимо тўғри йўлни танлашда кўмак беришини алоҳида таъкидлади. Масалан, 2017 йилда оиланинг дўсти бўлган диндор унга «Арсенал»дан «Эвертон»га ўтиш имконияти бўлиши, Оливье таклифни рад этиши кераклигини айтган экан. Умуман, ишонч барча қийинчилик ва муаммоларни бартараф этишида кўмакчи бўлганлиги яқинда чоп этилган Жиру автобиографиясининг бош мавзуси эди.

- Мен ҳеч қачон терма жамоага чақиришларини ёки клубда асосий таркибдан жой беришларини сўраган эмасман. Мураббийга керак бўлсам, ўзи мени майдонга туширади. Агар керак бўлмасам... Унда таркибдан четда қоламан ёхуд термага чақиришмайди. «Челси»да ўйнаган давримда, ҳеч қачон «Ҳой, Фрэнк, мени таркибга кирит, хато қилганингни исботлайман», демаганман. Майдонга туширишмаса, албатта, хафа бўлардим. Аммо қўлимдан келганича жамоага ёрдам беришга уринардим. 2020 йилда «Интер»га ўтиш имконияти бўлганида, Лэмпардга шундай дедим: «Қулоқ сол, мени таркибда тасаввур қила олмаяпсан, учинчи ҳужумчиман, жамоага ёрдам беришимга ишонмайсан. Яхшиси, қўйиб юбора қол». Лекин у менга имкон беришини айтди. Фрэнк ваъдасини бажаргач, 11 учрашувда 8та гол уриш билан жамоанинг ЕЧЛга чиқишига кўмаклашдим. Агар Лэмпард имконият бермаганида, ундан хафа бўлмасдим ва омадни бошқа жамоадан излардим.

Ҳозир терма жамоада шунга ўхшаш вазият. Мураббий менга эҳтиёж сезса, қўнғироқ қилади. Агар қўнғироқ бўлмаса, унинг қарорини тўғри қабул қиламан. Бутун эътиборим «Милан»га қаратилган, клубим учун самарали ҳужумчи бўлиш ҳаракатидаман. Лекин терма жамоага ёрдам беришга доимо тайёрман.

Мухлислар ўртасида Франциянинг УЕФА Миллатлар лигасидаги ғолиблиги учун бериладиган олтин медаллар мен билан Кантега берилмаслиги ҳақида гап-сўзлар урчиганди. Чунки биз финал учрашувларида қатнашмагандик. Амалда шундай бўлганида, тақдирга тан берардим. Бироқ бахтимга, медални оладиган бўлдим. Боиси, саралаш баҳсларида фаол иштирок этгандим. Совринларим ажойиб медаль билан бойиди, тўғрими?

Мен ғолиб чиқишга кўникиб қолганман, аммо жамоадошлар бобида ўта омадлиман. Терма жамоада ҳам, клубларда ҳам. Францияда чемпион бўлдим, «Челси» ва «Арсенал» билан Англия кубокларига сазовор бўлдим. Яна «Челси» билан Европа Лигаси ва Чемпионлар Лигасида ғолиб бўлдим.

***

- 2018 йилдаги ЖЧни алоҳида эътироф этиш ўринли. Дешам ва Ги Стефанни (Дешамнинг ёрдамчиси) мени мундиал таркибига киритишгани учун кўпчилик танқид қилганди. Улар клубида мунтазам майдонга тушмайдиган ҳужумчи билан терма жамоа чемпионликка эриша олмайди дейишганди. Кимгадир ўйин услубим, бошқасига сермаҳсуллигим даражаси ёқмаган, яна кимдир менинг ўрнимда бошқа ҳужумчи бўлишини истаганди. Финалдан кейин ёнимга келган Ги Стефан кулимсираб шундай деганди: «Жиру билан ЖЧда ғолиб чиқиб бўлмайди, дейишгани ёдингдами?»

Жиру ва танқид

- Мен жанжалкаш эмасман ва ўринли танқидни қабул қиламан. Лекин «Арсенал» ва «Челси» мухлислари мени мамнуният билан қарши олишлари ва ўйиним учун миннатдорчилик билдиришларини муҳим кўрсаткич, деб биламан. Кишилар ҳурматини қозонганимни уларнинг ўзидан эшитиш жуда ёқимли. «Милан» мухлислари ҳам ҳурмат қиладилар. Бу жуда кўп нарсани англатади.

Менинг шаънимга тош отганлар ҳам борми? Ҳа, албатта. Бироқ реал ҳаётда эмас. Улар асосан ижтимоий тармоқлар орқали танқид қилишади. Мен эса бунга эътибор бермайман. Қачон яхши ва қачон ёмон ўйнаганимни ўзим яхши биламан.

Жиру ва Бензема  ўртасидаги можаро

- Тўғри, айрим танқидларни тан олмасликнинг иложи йўқ. Масалан, 2016 йилнинг майида франциялик мухлислар мени ҳуштакбозлик билан кузатиб қўйишганди. Ваҳоланки, Камерун термаси билан бўлган ўша назорат учрашувида гол ургандим. Норозиликнинг асосий сабаби - Бенземанинг таркибда йўқлиги эди. Гўёки, мен унинг ўрнини эгаллаб олибман. Мухлислар бизни бир-биримизга «қайраб» қўйишди. Терма жамоадаги бутун фаолиятим давомида доимо кимнингдир ўрнига ўйнаётганимга шаъма қилишарди.

Журналистлар мен билан Бензема ўртасида низо чиқаришга уринишди. Шу тариқа мухлисларни ҳам икки гуруҳга - Карим ва менинг тарафдорларимга ажратишга интилишди. Шунингдек, Бенземанинг мен ҳақимдаги ва менинг у ҳақдаги ибораларимиздан «кир» қидиришарди. Бир пайтлари Карим бизни ўзаро қиёслаб, ўзини «Формула-1» болиди, мени картинг сифатида эътироф этганди. Натижада ижтимоий тармоқларда мен картингга ўтирган ҳолда, Каримнинг болидидан ўзиб, жаҳон чемпионати олтин медалини олаётганим ҳақида «мем»лар пайдо бўлди. Бу кулгили, албатта, мен Каримдан хафа эмасман.

Жиру ва Мбаппе  ўртасидаги хусумат

- Мбаппега нисбатан адоват? Менинг Килианга айтган гапларимни ОАВ шунчалик айлантиришдики, гўё ундан нафратланар эканман. Аслида ундай эмас. Ҳар бир учрашувдан кейин, ҳар бир маш­ғулот жараёнида ҳар хил гап-сўзлар бўлиб туради.

Мен шунчаки, агар жамоадошларим кўпроқ узатмалар беришганида, кўпроқ гол уришимни айтгандим. Кимнидир «пас» бермаганликда айблаган эмасман. Журналистларга эса, ўз рейтингларини ошириб олишлари учун можаролар, шов-шувли мақолалар керак. Айнан шу боис, улар Мбаппе билан тортишувни ўйлаб топишган. Мен Килианга ундан хафа эмаслигимни айтдим. У матбуотдаги уйдирмадан воқиф бўлгани сабабли хафа эди. Лекин гапларимни эшитгач, менга ишонишини айтди.

***

- Еврода Францияга нима бўлди? Нима учун муваффақиятга эриша олмадик? Бу савол ўзимизни ҳам ўйлантириб қўйди. Биз фақат ғалабани кўзлаб майдонга тушгандик. Айниқса, Евро-2016даги аламли мағлубиятдан кейин. Ўз уйимизда, яққол устунликка эришган учрашувда Португалияга кубокни бериб қўйгандик.

Бу сафар турнирнинг энг кучли жамоаси мақомида майдонга тушгандик. Назаримда, Швейцарияга қарши чорак финал баҳсида бизга совуққонлик етишмади. Ўйин тугашига 10 дақиқа қолганида 3:1 ҳисобида олдинда эдик. Якунда пенальтилар сериясига кўра енгилдик... Ҳар қандай футболчи учун оғир зарба. Бироқ футболнинг мафтункорлиги ҳам шунда: кетмони «учган» паллада ҳар қандай жамоа энг кучли рақибни таслим этиши мумкин.

Яратганга ишониш

- Мен Библияда ёзилганларга ишонаман, Исо пайғамбарга ишонаман ва эътиқод яхши инсон бўлишимизга ёрдам беради, деб ҳисоблайман. Азоб-уқубатлар - синов дунёсидаги ҳаётнинг асосий қисми. Айнан оғриқ ва аччиқ тажриба туфайли шахсимиз шаклланади. Библия ҳам шу ҳақда маълумот беради. Ўз ҳаётингизда кўплаб қийинчиликларга дуч келсангиз ҳам, улардан тўғри хулоса чиқаришингиз ва янада кучлироқ бўлишингиз лозим. Мендаги маънавий қувват шу тарзда пайдо бўлган. Ҳамма қатори мен ҳам бу ҳаётда жуда кўп қийинчиликларга дуч келдим. Ҳаётда ҳеч нарса осонликча қўлга киритилмайди. Нимагадир эришиш учун имкониятни бой бермаслик ва жон куйдириб меҳнат қилиш керак. Муҳим қарорлар қабул қилишимда эътиқод доимо мадад берган.

С.РАҲМОНОВ тайёрлади