«Манчестер Сити»га эгалик қилаётган City Football Group холдинги Москванинг «Спартак» клубидан 20 фоиз акцияни қўлга киритмоқчи. Бу ҳақда Baza телеграм канали хабар берилди. «Чемпионат» манбалари эса музокаралар ҳақидаги маълумотларни тасдиқлашди.

CFGнинг англиялик вакиллари Россия пойтахтига ташриф буюриб, Руи Витория жамоасининг «Ростов»га қарши ўйинини томоша қилишди, «қизил-оқлар» базаси ва офисини кўздан кечиришди. Бундан ташқари, менежерлар «Спартак»нинг турли йўналишдаги раҳбарлари билан учрашишди. Маълумотларга кўра, CFG Россия бозорига қизиқиш билдирмоқда, Москва клубидагилар эса мазкур холдинг билан ҳамкорлик орқали қўшимча ҳомийлик имкониятларига эга бўлиш ва ягона скаутлик тизимида иштирок этишни кўзлашмоқда. Таъкидлаш жоизки, келишув амалга ошган тақдирда «қизил-оқлар»нинг номи ва бренди ўзгармайди.

City Football Group  нима?

City Football Group «Манчестер Сити»дан ташқари яна ўнта клуб акцияларига эгалик қилади булар - «Нью-Йорк Сити» (АҚШ), «Мельбурн Сити» (Австралия), «Мумбаи Сити» (Ҳиндистон), «Йокогама Ф. Маринос» (Япония), «Монтевидео Сити Торке» (Уругвай), «Жирона» (Испания), «Сичуань Цзюню» (Хитой), «Ломмел» (Бельгия), «Труа» (Франция) ва «Боливар» (Колумбия).

Қизиғи, «Спартак» City Football Group билан боғланаётган ягона Россия клуби эмас. Аввалроқ ушбу компания вакилларининг «Уфа» ҳамда «Химки» раҳбарияти билан музокара ўтказишгани ҳақида хабарлар тарқалганди. Подмосковье клуби директори Сергей Анохин ҳатто CFG билан алоқалар борлигини тасдиқлаганди. Умуман, унинг сўзларига кўра, шайхлар билан келишиш қийин кечган, зеро Россия ёпиқ бозор сифатида лига капитализацияси, қизиқарли футболчилар ва инфраструктурага эга эмас.

Афтидан, «Спартак» бренди City Football Group учун нисбатан ёрқинроқдек кўринмоқда. Москва клуби акцияларининг эҳтимолий сотуви жамоанинг қониқарсиз иштироки фонида яна фаол муҳокама қилинмоқда. Фанатларнинг бир қисми «қизил-оқлар» хўжайини Леонид Федунга босим ўтказиб, клубни сотишни талаб қилишмоқда. Олдинроқ функционер бунга тайёрлигини ҳам яширмаганди. 2019 йилда эса «Спартак»нинг нархи 1,1-1,2 млрд. евро атрофида эканлигини билдирди.

«Спартак» акцияларига ким эгалик қилади?

«СПАРК-Интерфакс» тизими маълумотларига кўра, «Спартак» акциялари «Спорт-Холдинг» МЧЖ (47,44 фоиз), «Капитальнўе активў» АЖ (22 фоиз) ҳамда Россиянинг номи маълум қилинмаган фуқароси (30,56 фоиз)га тегишли. Ўз навбатида, кўрсатилган компаниялар мос равишда Леонид Федун ва «Лукойл» раҳбари Вагит Алекперовга тегишли. Бундан хулоса қилиш мумкинки, Федунда 32,7 фоиз, Алекперовда эса 36,7 фоиз акция бор.

Шайхларга «Спартак» нега керак?

Москва «Локомотив»ининг собиқ президенти Илья Геркус ҳамда «темирйўлчилар»нинг собиқ ижрочи директори Алексей Киричек «Спартак» акцияларининг City Football Group компаниясига сотилиши эҳтимоли юзасидан «Чемпионат» нашрига ўз фикрларини билдиришди. Геркус шайхларга «Спартак»нинг чиндан ҳам қизиқлигига ишонмаслигини билдирди: «Ўйлашимча, бу уйдирма. Мазкур келишувнинг амалга ошиш эҳтимоли деярли йўқ, чунки бундан маъни йўқ. Биринчидан, клубларимизнинг иқтисоди жуда заиф. Улар Европа бўйлаб футболчи олиш ва сотишда қийналишади: бизда европаликлар лимитга йўлиқишади, ЕИда эса бизнинг ўйинчиларни шундай қисмат кутади. Қолаверса, УЕФА рейтингидаги пасайиш туфайли Чемпионлар Лигасидаги иштирокимиз чекланган. 20 фоиз - бу жиддий иштирок эмас. Бу каби истак-хоҳишларнинг ҳақиқатга яқин эканлигига ишонмайман».

Киричек эса мазкур келишув замирида кенг кўламли режа ётганини таъкидлади - келгусида «Спартак» ва ҳаттоки, «Лукойл»ни ўз томонига оғдириш: «Жуда қизиқ янгилик. «Спартак» - катта клуб. Мазкур пирамида ортида «Манчестер Сити», ушбу брендни ривожлантириш ғояси ётганини тушуниш керак. «Спартак»ни сотиб олиш орқали улар клублар ўртасида нафақат футболчилар алмаштириш, балки брендингни тараққий эттириш ва бошқа мақсадларни ҳам амалга оширишга интилишади. Бу «Манчестер Сити»га ўз брендини янги минтақада ривожлантириш томонидан ҳам қизиқ. «Сити» - таниқли бренд, аммо у Россияда «Манчестер Юнайтед» ёки «Ливерпуль» сингари машҳур эмас. Харидорнинг вазифаси - «Сити» бренди ўсишини таъминлаш. «Спартак» брендининг ривожи ҳақида ўйлашаётганига шубҳам бор.

20 фоиз акция нима беради? Бу директорлар кенгашидаги ўриндан бошқа кучлироқ жойни кафолатламаса керак. Эҳтимол, бу «Спартак»ни қўлга олиш йўлида қўйилган дастлабки қадамдир. Лекин бунинг катта келишувнинг бир қисми эканлигини ҳам истисно этмаймиз. «Спартак» Вагит Алекперовга тегишли. Савол - «Лукойл» кимга тегади? Балки бу Вагит Юсуфович компания бошқарувидан чиқишни истаганда, «Лукойл»ни бошқа инвесторларга сотиш бўйича келишувнинг бир қисмидир. Аммо мазкур ҳолатда бошқа инсонлар билан келишишга тўғри келади. Келишувнинг ўзи «Спартак»ка маълум муддатли хотиржамликни тақдим этади, қолгани келажакда воқеалар қандай ривожланишига боғлиқ бўлади».

Ж.БОБОХОНОВ тайёрлади