2017 йилнинг сентябри «Женоа» мухлислари учун сўнгги ўн йилликдаги энг ёқимли ой бўлиши мумкин эди: клубнинг кўпйиллик хўжайини Энрико Прецьози ниҳоят, «мулки»ни бизнесмен Жулио Галаццига сотишга қарор қилди. Генуяликлар бахтига қарши, келишув амалга ошмади. Томонлар «трансфер» суммаси бўйича келиша олишмади: «россоблу» президенти нафақат муайян маблағ талаб қилди, балки янги хўжа­йиндан клубнинг эски қарзларини тўланиши борасида кафолат ҳам сўради. Галацци, ўз навбатида, Прецьозига яхшигина пул таклиф этгани ҳақида гапирди - Gazzetta dello Sport хабарига кўра, гап 120 миллион евро ҳақида бормоқда.

Прецьози рози бўлмагач, шундоқ ҳам сабри тугаган «Женоа» мухлислари клуб президентини тинч қўйишмади. Функционер манзилига йўлланган таҳдидлар оғзаки, лекин жиддий кўриниш олди. Ишқибозлар Энрикога жисмоний зиён етказишларини айтишди. Клуб бош директори Алессандро Зарбано тартиб посбонлари раҳбарини ҳимоя қилиш мақсадида аниқ режа тузишларини таъминлаш учун кўп вақтини полиция маҳкамасида ўтказди. Прецьози жамоасининг «Болонья»га қарши кечган нав­батдаги ўйинига ташриф буюришга жазм этмади.

Вақт ўтгани сайин клубни «С» сериядан Европа Лигасигача олиб чиқиб, 600 миллион евро атрофида инвестиция киритган президентга нисбатан қаршиликлар кучайиб бораверди. Ҳаттоки, машҳур хонандалар Франческо Баччини ва Сандро Жакоббе ҳам Прецьозининг истеъфосини талаб қилиб чиқишди.

Шундан буён тўрт йил ўтди, 777 Partners инвестиция фонди «Женоа»ни 150 млн. еврога сотиб олишга қарор қилди. Майамида жойлашган ушбу муассаса турли соҳалардаги лойиҳаларга инвестиция киритишга ихтисослашган. Фонд шундоқ ҳам етарлича спорт лойиҳаларига эга: Fanatiz стриминг сервиси (Жанубий Америка футболи билан шуғулланади), 1190 Sports компанияси (телевизион ҳуқуқларга жавобгар), Atalanta Media (аёллар футболига бағишланган илк платформа) шулар жумласидан. 777 Partners Лондоннинг энг яхши баскетбол клуби - «Лондон Лайонс»ни қўлга киритганидан кейин футболда ҳам инвестицион лойиҳа қидиришга тушди ва «Женоа» вариантида тўхтади.

Бу сафар Прецьози музокараларга ўзгача ёндашиб, «Женоа»ни ўзи учун мақбул бўлмаган шартлар асосида сотишга ҳам розилик берди. Гап шундаки, 777 Partners Генуя клуби учун реал пулларни тўламади. Инвестиция фонди, шунчаки, 90 млн. евро миқдоридаги қарзларни ёпиш кафолатини берди. 60 млн. евро «Женоа»нинг ёзги трансфер кампаниясининг бир қисмига айланди: янги футболчилар ва уларнинг маошлари учун 20 млн. евро кетди. Қолган 40 млн. еврони эса Прецьози навбатдаги учта трансфер ойнасида жамоадаги беш нафар муайян легионерни сотганидан сўнг қўлга киритади. Агар футболчилар сотилмаса ёки келишувлардан зарур суммага эга чиқмаса, 777 Partners воситаларни ўз чўнтагидан қоплашга мажбур бўлади.

Шу тариқа «А» сериянинг 8-клуби («Интер», «Милан», «Рома», «Фиорентина», «Болонья», «Специя» ва «Венеция»дан кейин) хорижлик хўжайин қўлига ўтди. Яқин уч йил мобайнида Энрико Прецьози миноритар акционер сифатида «Женоа» директорлар кенгашида қолади, лекин консультант лавозимида функциялари ўзгаради.

«Женоа» мухлисларининг катта қисми хўжайинлар алмашишини ижобий руҳда қарши олишди. Айримлари эса 777 Partners мақсадларига шубҳа билан қарашди, зеро инвестиция фондлари фойда кўришдан манфаатдор, «Женоа»нинг эса буюк тарихи (9та чемпионлик соврини)дан бўлак деярли ҳеч вақоси йўқ. Боз устига, ушбу фонд «Севилья» акцияларининг бир қисмига (7,5 фоиз) эга, шу сабабли Испания клуби ичида можаро вужудга келди. Фонднинг уч раҳбаридан бири Андрес Бласкес акциядорларнинг навбатдаги йиғилишида «Севилья» директорлар кенгашидан ҳайдалди.

777 Partners вакиллари шубҳаларни тарқатиш, оммавий чиқиш қилиш мақсадида айрим спорт газеталари саҳифаларини сотиб олишди. Стив Паско, Жош Уондер, Андрес Бласкес ва Хуан Арчинигас Италиянинг қадимий клуби олдида зиммаларига қандай масъулиятни олишганини ҳис қилишларини тушуниб туришгани, «Женоа»ни ҳам майдонда, ҳам унинг ташқарисида ҳимоя қилишга тайёрликларини билдиришди. Шунингдек, Уондер «Севилья» компания стратегиясида иккинчи даражали эканлиги, биринчи ўринга «Женоа» қўйилишини таъкидлади.

Gazzetta dello Sport нашрининг тасдиқлашича, «Женоа»нинг жорий мавсум учун асосий вазифаси - «А» серияда жон сақлаш бўлиб, жамоа имкон қадар тезроқ очколарини 40тага етказиши керак. Умуман, яқин йиллар ичида 777 Partners «Женоа»ни еврокубокларга олиб чиқмоқчи.

Паско-Уондер-Бласкес-Арчинигас квартети «Женоа»ни очилмаган салоҳият сабаб қўлга киритди: «грифонлар»нинг бой тарихи бор, Италиянинг энг кекса клуби. Бу эса «Женоа»ни ривожланишга муҳтож қимматбаҳо брендга айлантиради; клуб сўнгги йилларда шунга эришолмаган. Шу боис, фонд дастлабки ўзгаришларни «Женоа» маркетинг департаментида амалга оширди.

Янги хўжайинлар «Луижи Феррарис» стадиони модернизациясига қизиқиш билдиришмоқда. Генуя шаҳар мэрияси узоқ вақтлардан буён реконструкцияга ижозат бермаётганди, лекин яқинда аренага хорижий ва маҳаллий бизнесменлар ташрифидан сўнг таслим бўлди. Энди барчаси «Самп­дория» билан келишишга боғлиқ. Манфаатдор томон воқеаларнинг бундай ривожига тайёр эди ва қўшнилар билан барчаси келишилганига ишора қилишди.

Америкаликлар «Луижи Феррарис»ни тўй маросимлари, кўргазмалар, экскурсиялар каби турли тадбирлар орқали шаҳар аҳолиси учун кўнгилочар манзилга айлантирмоқчи. 777 Partners бу борада Мадрид «Атлетико»сидан намуна олди: испан жамоаси шу тариқа яхшигина даромад орттирмоқда.

Лекин хўжайинлар алмашганига қарамай, «Женоа» тезда ривожланиб қолмайди: кадрлар алмашинувини амалга ошириш керак. Gazzetta dello Sport нашрининг ёзишича, Сильвио Берлусконининг шахсий шифокори, болалигидан «грифонлар»га мухлислик қиладиган Альберто Зангрилло клуб президенти бўлиши лозим. Бу инсон ҳақида унинг яқин дўсти Адриано Галлиани шундай деганди: «Биз (Берлускони билан) Зангриллони миланликка айлантиришга уринмаганмиз, жамоага меҳр ўзгармайди». Альберто икки йилдан буён анестезиология соҳасидаги чиқишлар бўйича жаҳоннинг энг яхши профессорлари ўнлигидан жой олмоқда. Янги инвесторнинг фикрича, бу хорижий хўжайинлар ва генуяликлар ўртасидаги алоқаларни мустаҳкамлаш учун идеал номзоддир.

Repubblica нашрининг қайд этишича, Леонарду Жардимнинг «Монако»си ва Кристоф Галтьенинг «Лилль» жамоаси чемпионликка эришишига катта ҳисса қўшган Луиш Кампуш «Женоа» спорт директори бўлишга асосий номзод саналади.

Янги хўжайинлар янги бош мураббий масаласини жуда тез ҳал этишди. «Эмполи» билан ўйиндаги дуранг (2:2)дан кейин Давиде Баллардини истеъфога чиқарилганини инобатга олсак, Андрей Шевченко билан музокаралар анча аввал бошланган. Gazzetta dello Sport янги мураббий қидириш жараёнида 777 Partners воситачи скаутлик компаниясига мурожаат этгани ҳақида ёзди. Шартлар қуйидагича кўриниш олди: номзод машҳур ёки юлдуз бўлиши керак. Натижада клубга беш хил вариант тақдим этилди, уч нафари аниқ - Андрей Шевченко, Андреа Пирло ва Доменико Тедеско. Эҳтимол, мазкур рўйхатда Женнаро Гаттузо ҳам бўлган - аввалроқ CalcioMercato нашри Рино «грифонлар» янги хўжайинлари таклифига рад жавоби берганини маълум қилганди.

Якунда Шевченко танланди. «Женоа» украиналик мутахассисга бир мавсумга 2 миллион евро маош ҳамда 2024 йилнинг ёзигача мўлжалланган шартнома таклиф этди. Журналист Николо Скиранинг маълум қилишича, Шевченконинг мураббийлар штабига Украина термасида бирга ишлаган ёрдамчилари - Мауро Тассотти ва Луижи Ночентини киришади. Рўйхатда Андреа Мальдера йўқ, балки бунга шахсий сабаблари бордир (бир неча кунлар аввал отаси вафот этди), балки бошқа ердан қизиқарли таклиф олгандир.

***

...Клуб мураббийни ишдан бўшатганда, шартнома якунланиши ёки бекор қилингунига қадар маош тўлашда давом этади. Айнан шу сабабли «Ювентус», «Интер» ва «Фиорентина» ўтган мавсум собиқ мураббийлари (Маурицио Сарри, Лучано Спаллетти ва Винченцо Монтелла) учун пул тўлаб туришди. Лекин «Женоа» бу борада ҳам яққол ажралиб турибди - «грифонлар» президенти Энрико Прецьози жамоанинг ўша пайтдаги устози Давиде Баллардинидан ташқари, аввалроқ истеъфога чиққан яна уч мутахассис - Аурелио Андреаццоли, Давиде Николе ва Роландо Маранга ҳам маош тўлаган. Шундай экан, «Женоа» раҳбариятидаги зарарли одатлар Прецьози билан бирга тарихда қолади ва Андрей Николаевичга Генуяда ўз лойиҳасини амалга ошириши учун етарлича вақт берилади.

А.АБДУВАЛИХЎЖАЕВ тайёрлади