Ўзбекистон ўсмирлар термаси 2012 йили Дилшод Нуралиев бошқарувида тарихий натижа расмийлаштирганди - вакилларимиз Эрон мезбонлик қилган Осиё чемпионатидан олтин медаль билан қайтишган. Бир эсласак, ўша турнирда жамоамиз сафида Отабек Шукуров, Достон Ҳамдамов, Муҳиддин Одилов ва Жамшид Болтабоев каби футболчилар катта роль ўйнашган. Хусусан, Одилов терма жамоа сардори сифатида майдонга тушганди. Бироқ кейинчалик ёш иқтидорнинг саломатлигида баъзи муаммолар юзага келди ва у нафақат кичик мундиал, балки назардан ҳам четда қолди. Муҳиддин бугунги кунда Тожикистон чемпионати иштирокчиси - «Кўктош» клуби шарафини ҳимоя қилмоқда. Ҳужумчи билан суҳбат давомида унинг ҳозирги фаолияти ҳақида гаплашдик, яна ўсмирлар терма жамоасидан қолган хотираларига қулоқ тутдик.
ТОЖИКИСТОНДАГИ ФАОЛИЯТИ
- Аввало, суҳбатга чақирганингиз учун ташаккур. Ҳозирда фаолиятимни Тожикистон Олий лигаси иштирокчиси «Кўктош» клуби сафида давом эттиряпман. Саломатлигимда юзага келган муаммолар туфайли бир неча йил футболдан четда қолгандим. Табиийки, узоқ танаффус футболчига таъсир ўтказади, спорт формасидан чиқиб қоласиз. Яхшики, орада Тожикистондан таклиф тушди ва ҳозирги жамоам сафига қўшилдим. Мана, бир неча йил бўлди, «Кўкдош» шарафини ҳимоя қиляпман. Чунки бу ерда барчаси мени тўлақонли қониқтирмоқда. Асосийси, мунтазам ўйин амалиётига эга бўляпман. Натижалар ҳам чакки эмас. Дейлик, 2018 йили «Кўктош» чемпионатда 3-ўринни эгаллади. Кейинги мавсум эса мамлакат кубогида ғолиб чиқдик. 2020 йили ҳам яна 3-ўриндан жой олиш имконияти етарли эди. Бироқ айрим ўйинларда ўз даражамизда тўп суролмаганимиз ортидан бронза медалига етишолмадик. Муҳими, жамоада мухлислари бор, бизни мудом қўллаб-қувватлашмоқда. Жумладан, мени ҳам ҳурмат қилишади.
«ЗОМИН»ДАГИ ҚИСҚА ВАҚТ
- Жорий йил бошида Ўзбекистон чемпионати Биринчи лигаси иштирокчиси «Зомин»дан таклиф бўлди. Аслида ўша вақт «Кўктош» шартнома муддатини узайтиришни истаётганди. Кейинчалик яқинларим билан маслаҳатлашган ҳолда, Зомин клуби билан шартнома туздим. Афсуски, бу жамоада ишлар ўзим кутгандек чиқмади. Оддий айтганда, бор салоҳиятимни кўрсатолмадим ва биринчи давра якунлаши билан клуб билан хайрлашдим. Шунингдек, «Зомин»да молиявий муаммолар ҳам кузатилди. Айниқса, маош ва мукофот пуллари тўлашда узилишлар бўлди. Хуллас, «Кўктош» молиявий томондан яхшироқ таклиф юборгач, собиқ жамоамга қайтишни маъқул кўрдим.
ФУТБОЛГА КИРИБ КЕЛИШИ
- Болалигимдан футболга қизиқишим баланд ва миллионлар ўйинига мустақил тарзда қадам ташлаганман. Дастлаб Янгиер шаҳридаги футбол мактаб-интернатида таҳсил олдим. У ерда Санжар Абдукаримов қўл остида шуғулландим. Биринчи устозим айни пайт Зомин тумани болалар-ўсмирлар спорт мактабида директор лавозимида ишламоқда. Аслида ота-онам профессионал футболчи бўлишимга қарши чиқишган. Лекин мураббийларим иштиёқимни кўриб, яқинларим билан алоҳида гаплашишган, уларни кўндиришган. Оддий оилада вояга етганман, шунинг учунми, отам профессионал футболчи бўлиш йўлида жиддий қийинчиликлар учрашини алоҳида уқтирганди.
ОЧ-2012 ВА ТЕРМА ЖАМОА
- Дилшод Нуралиев чиндан ҳам, ажойиб жамоа шакллантирганди. Жуда аҳил эдик. Эсимда, Осиё чемпионати гуруҳ босқичидан катта қийинчилик билан кейинги босқичга чиққанмиз. Дейлик, ярим финалда Жанубий Корея термасини енгишимизга ҳеч ким ишонмаганди. Эҳтимолки, шу ҳам фойда бергандир. Яна йигитлар билан келишган ҳолда, ўйинга пухта тайёрланганимиз ҳам самарасини берганди. Албатта, ўша Осиё чемпионатидан ажойиб хотиралар қолган.
САЛОМАТЛИГИГА БОҒЛИҚ МУАММОЛАР
- Ўзи 2009 йили тиббий кўрикдан ўтганимда, юрак тизимида муаммолар аниқланди. Кейинчалик шифокорлар кўрсатмалари асосида вақти-вақти билан даволаниб юрдим. Осиё чемпионати финали арафасида шамоллаб қолдим ва ҳал қилувчи учрашувда майдонга тушолмадим. Тошкентга қайтгач, кўплаб шифокорлар кўригида бўлдим, аммо ҳеч биридан тайинли жавоб эшитмадик. Хуллас, муаммо қандай юзага келганини айтишмади, шунчаки, футболдан кетишимни тавсия этишди, агар ўйнашда давом этсам, хавф кучайиб боришини маълум қилишди. Ўша вақт «Пахтакор»га тегишли эдим. Афсуски, клубда ҳеч ким менга ёрдам беришни истамади. На клуб раҳбарияти, на мураббийлар... Балки вақтида ёрдам қўлини чўзиб, малакали шифокорларга кўрсатиб, тизимли даволатишганида, ҳозир менга ҳам миллий жамоада тўп суриш насиб этармиди...? Чунончи, футболга муҳаббатим чексиз, ишлашдан асло қочмайман. Ҳалигача орзуларим бисёр. Хусусан, юртимизга қайтиб, Суперлигада ўйнашни истайман. Ишонаманки, бу орзум кун келиб амалга ошади, албатта.
ИЗЗАТБЕК суҳбатлашди
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20