«Ливерпуль» ҳаётида ўта муҳим роль ўйнайдиган инсон жорий мавсум якунида жамоа билан хайрлашади. Айнан у «соя»дан бугунги «Ливерпул»ни шакллантирди, айнан у Юрген Клопп ва Муҳаммад Салоҳни «қизиллар» лагерига олиб ўтди. Гап 10 ноябрь куни жамоа билан хайрлашиш фурсати келганини эълон қилган спорт директори Майкл Эдвардс ҳақида кетмоқда. Тўғри, тажрибали функционер амалдаги шартномаси охиригача ишлайди ва жорий мавсум якунида кетади. Хуллас, Эдвардс ва «Ливерпул»нинг 10 йилга чўзилган ҳамкорлиги хотимаси яқин... «Ҳар доим бу ерда кўпи билан 10 йил ушланиб қолишимни билганман. Табиатан шундай одамман. Айни ҳолатда жамоага катта фойда беролмайман, лекин келажак учун ишлай оламан. Ҳамиша шу ақидага амал қилган ва клубга наф келтирганман. Жорий мавсумнинг қолган қисмида «Ливерпуль» билан бирга бўламан. Бу ерда ҳамкорликда фаолият юритган барча-барчадан миннатдорман. Айниқса, менга имконият тақдим этган FSG ва «Ливерпуль» хўжайинларидан», - деди Майкл Эдвардс ўз баёнотида.

«ЛИВЕРПУЛЬ» УЧУН КАТТА ЙЎҚОТИШ

Ҳа, Эдвардснинг кетиши - жиддий йўқотиш. Ахир гап омадсизликдан чемпионликкача эволюциясини юзага келтилган клуб тизимининг махфий нинзяси ҳақида кетмоқда. Функционернинг асосий ютуғи - Юрген Клоппни жамоада ишлашга кўндиргани ва у билан дўстлашгани. «Ливерпуль» 2020 йилнинг апрелида узоқ кутилган АПЛ чемпионлигини расмийлаштиргач, ҳамма германиялик мураббий ва унинг йўлга қўйган ўйинини беармон мақтади. Тўғри, Эдвардс ҳам эътирофдан қуруқ қолгани йўқ: «Ливерпул»нинг яна бир махфий устуни бор - спорт директори Майкл Эдвардс. Жамоада пул ва трансферларга айнан шу инсон жавоб беради». Функционернинг энг асосий 2та иши - Клопп ва Муҳаммад Салоҳни «қизиллар» сафига қўшгани. Айтишларича, Эдвардс германиялик билан музокара жараёни давомида у жойлашган меҳмонхонада истиқомат қилган ва мураббийнинг мулоқот ўрнатиш услуби ҳақида 60 бетлик маълумот тайёрлаган. Мисрлик ҳужумчи трансферига келсак, Клопп бошида бунга қарши чиққан, лекин функционер мақсадига эришган, барибир.

Юрген Клоппдан олдин «Ливерпул»ни бошқарган Брендан Рожерснинг агенти ҳам Эдвардсни алоҳида эътироф этганди: «Унинг қандай ишлаши ва трансферларга деярли ўзи жавоб беришини на Брендан билган ва на мен». Рожерс «манзилга етиб келганида», янги мураббий топиш масаласи билан ҳам айнан Эдвардснинг ўзи шуғулланган. FSG гуруҳининг йирик раҳбарлари 2015 йили Максимилиано Аллегри каби топ-мураббийларга эътибор қаратишган паллада Эдвардс фақат Клопп номзодини илгари сурган. Унинг шахсан ўзи Дортмундга бориб, «Боруссия»нинг баъзи собиқ футболчилари ва германиялик журналистлар билан гаплашган, Клопп яшайдиган меҳмонхонада бўлиб, мураббийни зимдан кузатган, кундалик ҳаёти ва юриш-туришини ўрганиб, бу ҳақда 60 бетлик маълумот тўплаганди. Шу кузатувлар самараси ўлароқ, Клопп 2015 йилнинг 8 октябрида «Ливерпуль» бош мураббийи сифатида таништирилди. Орадан бир неча ой ўтгач, Майкл Эдвардс Мелвуд базасидаги ўз офисини машғулотлар мажмуаси биносига кўчирди. Бунда иш хонаси деразасидан Клопп офиси ойнаси кўриниб туришини талаб қилди. Шу тариқа мураббий ва менежер ўртасида соғлом иш муносабати шаклланди. Мана, Юрген Клопп эътирофига эътибор қаратинг: «Дортмундда ҳам клуб раҳбарлари билан яхши муносабат ўрнатгандим. Лекин мени ҳеч ким Майкл каби яхши тушунмаган. Ўта кучли ва ҳамиша тўғри ўйлайдиган мутахассис. Асосий устунлиги шуки, бугунги кун билан яшайди, аммо келажак ҳақида кўпроқ қайғуради. Бошқача айтганда, Майкл сотиб олган футболчи бирдан натижа бера бошлайди, лекин 1,5-2 йилдан кейин кўпроқ наф келтиради. Унга ҳурматим баланд, биз яқин дўстлармиз».

ЭДВАРДС ФАЛСАФАСИ: ТРАНСФЕРЛАР - БУ МАТЕМАТИКА

Майкл Эдвардс трансферларга математик амал сифатида қарайди. Унинг учун ҳар бир харид - натижаси турлича чиқиши мумкин бўлган мураккаб операция. Дейлик, Клоппни бир неча ой кузатган менежер Виржиль ван Дейк билан шартнома тузишдан олдин ҳафталар давомида унинг дўстлари ва атрофидагилардан умумий характери ҳақида маълумот тўплаган. Шунингдек,  Салоҳни шахс сифатида ўрганиш учун ҳам кўп вақт сарфлаган. Эдвардс учун асосий иш мезонлари: 1. Номзод футболчининг айни спорт формаси ва имкониятини кўриб чиқади; 2. Номзод футболчининг юриш-туриши, характери ва инсоний фазилатларини ўрганади; 3. Номзод футболчи келажакда клубга қанчалик фойда келтиришини баҳолайди. Эдвардснинг қоидасига мувофиқ, шу 3та банд ҳам талабга жавоб берсагина трансферни амалга ошириш мумкин.

ЭНГ СЕВИМЛИ КЕЛИШУВ - ЭНДРЮ РОБЕРТСОН ТРАНСФЕРИ

Transfermarkt портали маълумотларига қарасак, айни пайт Эндрю Робертсоннинг трансфер баҳоси 65 миллион еврога тенг. Таққослаш учун айтсак, «Ливерпуль» 2017 йилнинг июлида уни «Халл Сити»дан атиги 9 миллион евро (бозор баҳоси 7 миллион эди)га сотиб олди. Юрген Клопп ЧЛдаги ғалабадан кейин айнан шу футболчи трансферига алоҳида тўхталди: «Бизда чап қанот ҳимоя­си учун номзодлар етарли эди. Шунда раҳбариятдан ўйлаб кўриш учун вақт сўрадим ва Майклга бошқа футболчи топиш зарурлигини айтдим. У эса эртасигаёқ Робертсонни тавсия этди. Аввалига ҳайрон бўлдим, шунда Майкл ҳаммасини тушунтириб берди. Яна 1,5 йилдан сўнг трансферни жиддий муҳокама қилдик. Эдвардс қатъий турди: «Робертсонни олиш учун «Ньюкасл» таклифини тўхтатдим. Балки бу мен учун энг севимли трансфер бўлар...».

Эҳтимол, Эдвардснинг энг катта келишуви муаммоли юлдузни манфаатли тарзда сотиб, икки етакчи олганидир. Ҳа, муаммоли юлдуз - бу Филиппе Коутиньо. Бразилиялик футболчи 2016 йилиёқ кетиши мумкин эди, аммо Эдвардс уни олиб қолиш йўлини топди. Яна 1 йилдан кейин бундай қилиш иложсиз бўлиб қолди: Коутиньонинг ўзи «Барселона»га ошиқди. Натижада Эдвардс унинг трансферидан максимал фойда чиқариш режасини тузди ва ишга киришди:

1. 2 ой давомида клуб соҳибларига қарши бориб, Коутиньони сотиш фойдали эканлигини тушунтирди. Якунда ҳаттоки, бразилиялик кетиши билан «Ливерпуль» ўйинида пасайиш кузатилмаслигига кафолат берди.

2. «Барселона»ни 135 миллион евро тўлашга кўндирди, тўғри, бу бир неча йиллик қарзга айланди. «Барса» кейинчалик молиявий инқирозга учради ва битта траншни қоплаш учун Коутиньони «Ливерпул»га қайтаришни хоҳлади, Эдвардс эса буни рад этди.

3. «Барса»дан шартномага алоҳида банд қўшишни сўради, унга кўра, каталонияликлар 2021 йилнинг ёзига қадар «Ливерпул»дан бирор футболчини «йўлдан урмаслик» мажбуриятини олишди. Айтишларича, Эдвардс бунда Муҳаммад Салоҳ ва Садио Маненинг қандай даражага чиқишларини олдиндан сезган ва уларга потенциал даъвогарлардан бирини 4 йил муддатга четга сурган!

4. Коутиньо трансферидан тушган маблағни Алиссон ва Виржиль ван Дейк харидига йўналтирди.

Ҳа, асосий етакчини вақтида қўйиб юбориш - Эдвардсга хос донолик.

Майкл Эдвардснинг яна бир Қатор эффектли келишувлари

** Муҳаммад Салоҳ. «Ливерпуль» спорт директори ролидаги биринчи келишуви. Аслида Юрген Клопп ҳам, FSG раҳбарлари ҳам мисрлик ҳужумчи трансферига қарши чиқишган, бироқ Эдвардс уларни кўндирган.

** Такуми Минамино. «Ливерпуль» япониялик футболчини режалаштирилганидан 1 йил олдин сотиб олди. Эдвардс унинг шартномасида кўрсатилган товон пули 8,5 миллион евро эканлиги ҳақида хабар топгач, дарҳол ҳаракатга тушди. «Зальцбург» президенти Гаральд Люрцер сўзларидан иқтибос: «Агар «Ливерпуль» бўлмаганида, Такумини 2020 йилнинг ёзида 20 миллион еврога сотардик. «МЮ» билан оғзаки келишувимиз ҳам бор эди».

** Харви Эллиотт. Эдвардс ва Клопп томонидан тузилган келишув. «Ливерпуль» истиқболи баланд йигитча учун курашда «Челси» ва «Манчестер Сити»ни ортда қолдирди.

** Доменик Соланке. «Ливерпуль» бу футболчини текинга олиб, уни «Борнмут»га сотди (21 миллион еврога). Соланке деярли 2,5 йил ичида 33та гол урди, бироқ кучли рақобат туфайли таркибга ўрнашолмади.

** Жордан Айб. «Ливерпул»да барча ёш босқичларини босиб ўтган, аммо асосий таркибда ўзини кўрсатолмаган футболчи учун 2016 йили «Борнмут»дан 18 миллион евро ундирилди. Ваҳоланки, transfermarkt портали ўша пайт уни 7 миллионга баҳолаганди. Айб 5 йил давомида «Борнмут» ва «Дерби»да жами 117та ўйин ўтказиб, 10тагина гол урди. Ҳозир эса клубсиз ва трансфер баҳоси атиги 800 минг еврони ташкил қилмоқда.

А.АҲМЕДОВ тайёрлади