Москванинг «Спартак» клуби президенти Лео­нид Федун ва собиқ бош директор Шамиль Газизов ўртасидаги можаро янги даражага кўтарилди.
Энг ёмони, ўртадаги муаммо ҳамюртимиз Остон Ўрунов трансферига боғлиқ. Яқинда «Спартак» хўжайини клубга айнан Газизов томонидан олиб келинган Остон Ўрунов ва Александр Кокорин трансфери юзасидан текширув олиб борилиши ва ҳаттоки, судга мурожаат қилиши мумкинлигини айтганди. Шамиль Газизов эса дарҳол қарши ҳужумга ўтди. «Спартак»да мавқеи баланд одамларга тўқнаш келишимни билардим. Лекин ҳамммаси шу даражага етишини кутмаганман. Энди жим туришим мантиққа зид. Шу пайтгача устимдан мағзава ағдаришди, индамадим. Дейлик, Ўрунов трансфери билан боғлиқ турли иғволар тўқиб чиқаришди. Барчасини жимгина кузатдим. Айримларнинг айтишларича, Остон Ўруновни ўзимдан ўзим сотиб олган эмишман. Футболчи худди бир буюмдек. Ваҳоланки, «Спартак» Ўрунов трансферида ҳам, Кокоринникида ҳам бир тийин комиссион ҳақ тўлаган эмас», - деди  Шамиль Газизов. Эслатиш керак, Ўрунов ва «Спартак» ўртасидаги шартнома 2025 йилнинг ёзигача мўлжалланган. Остон ҳозирча собиқ клуби - «Уфа»да ижара муддатини ўтамоқда. Уфаликларда уни ёзда 1 миллион еврога сотиб олиш ҳуқуқи бор. Бироқ Бошқирдистон жамоасида молиявий инқироз кузатилмоқда.

***
Transfermarkt портали Ўзбекистон миллий жамоасининг легионер футболчилари трансферидаги ўзгаришларни ҳам алоҳида қайд этди. Янги варақага кўра, «Рома»да ўйнаётган Элдор Шомуродов ва «Шабаб Ал-Аҳли» вакили Азиз Ғаниевнинг трансфер баҳоси пасайди. «Тобол» шарафини ҳимоя қилган Игорь Сергеев, «Ал-Наср» ярим ҳимоячиси Жалолиддин Машарипов, «Шаржа»да фаолият юритаётган Отабек Шукуров ва «Нижний Новгород» аъзоси Иброҳимхалил Йўлдошевнинг трансфер қиймати эса кўтарилди. Икром Алибоев («Тэжон Ситизен») ва Жасур Яхшибоев («Шериф»)нинг трансферида ўзгариш йўқ.