Ярим йиллик танаффусдан сўнг яна Суперлигага қайтган Сардор Рашидов «Пахтакор» клуби аъзосига айланди. 

«Ўтган мавсум жамоамиз шарафини ҳимоя қилган Сардор Рашидов жорий мавсумни ҳам «Пахтакор» сафида ўтказадиган бўлди. У 2022 йилги мавсум охиригача мўлжалланган шартномага имзо чекди. Рашидов эркин агент сифатида «Пахтакор» сафини тўлдирди. Умид қиламизки, у жамоамиз билан кўплаб ғалабаларга эришиб, «шерлар» учун совринлар ютишга ёрдам беради. «Пахтакор»га қайтишинг муборак, Сардор!», - дейилади клуб хабарида.

Сардор Рашидов ўтган мавсумда тошкентликлар сафида 9 беллашувда 2 гол муаллифига айланган ва ёзда «Кувайт» клубига кўчиб ўтганди.

Аввалроқ, Сардор Рашидов «Навбаҳор» билан музокара олиб бораётгани ҳақида хабар берилганди. 
***

Айтганча, "шерлар" иқтидорли ярим ҳимоячи Риан Исломов билан келишувни узайтиришди.   Исломов 2022 йил охиригача "Пахтакор" билан келишувга имзо чекди. Ёш футболчининг ўзини кўрсатиши давом этган тақдирда у билан шартномани узоқроқ муддатга имзолаш борасида музокаралар бўлиб ўтади. Риан 2021 йилги мавсумда U-18 ва U-21 жамоалари сафида жами 19 ўйинда майдонга тушиб, 2 гол муаллифига айланди.