Boxing Dayнинг охирги куни пешқадам «Челси» сафарда «Тоттенхэм»га ютқазиб, ғалабали серия бўйича лига рекордини янгилаш имкониятидан маҳрум бўлганди. Антонио Конте шогирдлари бу сафар   «Лестер» майдонида яққол устунлик ўрнатиб, амалдаги чемпионни 3та жавобсиз гол билан «сийлашди». Кўриниб турибдики, лондонликлар айримлар айтаётганидек, ҳали чарчаган эмаслар. Мазкур ғалабадан сўнг «кўклар» ҳисобидаги очколар сони 52тага етди. Эътиборлиси, бу жамоанинг бутун ўтган мавсум давомида йиққан очкосидан 2та кўпдир. Чунончи, «Челси» АПЛ-2015|2016да 50та очко олиб, 10-ўрин билан чекланганди.

Юқори ўринлар учун курашаётган «Тоттенхэм» ва «Арсенал» клублари ҳам рақибларини йирик ҳисобда мағлуб этишди. «Тоттенхэм» ҳужумчиси Гарри Кейннинг «хет-трик»ка эришганини алоҳида айтиш жоиз.

Турнинг марказий учрашуви - «МЮ» - «Ливерпуль» қарама-қаршилигида Жозе Моуриньо жамоасининг 9та ғалабадан иборат ажойиб серияси узилди - 1:1. Боз устига, мезбонлар мағлубиятдан сўнгги дақиқаларда, «афсунгар» Златан Ибрагимовичнинг голи туфайли қутулиб қолишди.

Хосеп Гвардиола бошқарувидаги «Манчестер Сити» навбатдаги қақшаткич зарбага учради. Жамоа дарвозабони Клаудио Браво «Эвертон» вакиллари томонидан берилган 4та аниқ зарбанинг бирортасини  бартараф этолмади. Умуман, 0:4 - бу Гвардиола учун мураббийлик фаолияти давомида миллий чемпионатлар доирасида кузатилган энг йирик мағлубиятдир. Тўғри, унинг жамоалари шу кунга қадар бундай ҳисобда 3 марта ютқазишганди, фақат ЧЛ доирасида. Айтиш жоиз, Пеп жорий мавсумнинг ўзида 4та гол фарқи билан иккинчи марта мағлубиятга юз тутди. Эътиборлиси, бу ўйинда дебютини нишонлаган «Эвертон» ҳужумчиси Адемола Луқмон ҳам ўз ҳисобига гол ёзиб қўйди. 19 ёшли йигитча сўнгги лаҳзаларда захирадан майдонга тушиб, 90}4-дақиқада якуний ҳисобни ўрнатди. «Эвертон» ушбу футболчини қишда «Чарльтон»дан тахминан 10 миллион фунтга сотиб олганди.

14 январь

ТОТТЕНХЭМ-ВЕСТ БРОМВИЧ-4:0 (2:0)

Лондон. 31613 томошабин.

Голлар: Кейн (12, 77, 82),

Маколи (26-авт.).

Тоттенхэм: Льорис, Дайер, Алдервейрелд, Вертонген (Дэвис, 64), Уокер, Ваньяма, Дембеле

(Уинкс, 83), Роуз, Эриксен, Алли, Кейн (Сон Хюн Мин, 90).

БЕРНЛИ-САУТГЕМПТОН-1:0 (0:0)

Бернли. 20254 томошабин.

Гол: Бартон (78).

Саутгемптон: Форстер, Соареш, Йошида, ван Дейк, Бертран, Хейбьерг, Ромеу, Уорд-Проуз, Редмонд (Симс, 80), Лонг, Тадич (Родригес, 68).

ВЕСТ ХЭМ-КРИСТАЛ ПЭЛАС-3:0 (0:0)

Лондон. 56984 томошабин.

Голлар: Фегули (68), Кэрролл (78), Лансини (86).

Вест Хэм: Рэндолф, Коллинз, Рид, Огбонна (Байрэм, 46), Антонио (Флетчер, 89), Нобл, Обианг, Крессуэлл, Лансини (Фернандеш, 87), Фегули, Кэрролл.

САНДЕРЛЕНД-СТОК СИТИ-1:3 (1:3)

Сандерленд. 42722 томошабин.

Голлар: Дефо (40) -

Арнаутович (15, 22), Крауч (34).

СУОНСИ-АРСЕНАЛ-0:4 (0:1)

Суонси. 20875 томошабин.

Голлар: Жиру (37), Корк (54-авт.), Нотон (67-авт.), Санчес (74).

Арсенал: Чех, Габриэль, Мустафи, Косьельни, Монреаль, Рэмзи, Жака, Ивоби, Озил (Перес, 79), Санчес (Уэлбек, 79), Жиру (Окслейд-Чемберлен, 60).

УОТФОРД-МИДЛСБРО-0:0

Уотфорд. 20659 томошабин.

ХАЛЛ СИТИ-БОРНМУТ-3:1 (1:1)

Кингстон-апон-Халл. 17963 томошабин.

Голлар: Эрнандес (32, 50),

Мингс (62-авт.) - Станислас (3-пен.).

ЛЕСТЕР-ЧЕЛСИ-0:3 (0:1)

Лестер. 32066 томошабин.

Голлар: Алонсо (6, 51), Педро (71).

Лестер: Шмейхель, Морган, Хут (Оказаки, 60), Фукс, Олбрайтон (Симпсон, 77), Дринкуотер, Н~Диди, Менди, Чилуэлл, Мусо (Грэй, 71), Варди.

Челси: Куртуа, Аспиликуэта, Давид Луиз, Кэйхилл, Мозес, Канте, Матич, Алонсо, Виллиан (Батшуайи, 84), Азар (Фабрегас, 79), Педро

(Лофтус-Чик, 84).

15 январь

ЭВЕРТОН-МАНЧЕСТЕР СИТИ-4:0 (1:0)

Ливерпуль. 39588 томошабин.

Голлар: Лукаку (34), Миральяс (47), Дэйвис (79), Луқмон (90}4).

Эвертон: Роблес, Уильямс, Фунес Мори, Бейнс, Холгейт, Баркли (Луқмон, 90), Дэвис, Миральяс (Шнайдерлин, 65), Бэрри

(Маккарти, 74), Коулмэн, Лукаку.

Манчестер Сити: Браво, Стоунз, Отаменди, Клиши, Сабалета (Ихеаначо, 62), де Брюйне, Туре, Стерлинг, Сильва, Санья, Агуэро.

МЮ-ЛИВЕРПУЛЬ-1:1 (0:1)

Манчестер. 75000 томошабин.

Голлар: Ибрагимович (84) -

Милнер (27-пен.).

МЮ: де Хеа, Рохо, Жонс, Дармиан (Феллайни, 76), Валенсия, Эррера, Кэррик (Руни, 46), Погба, Мхитарян, Мартиаль (Мата, 65),

Ибрагимович.

Ливерпуль: Миньоле, Александер-Арнолд, Клаван, Ловрен, Жан, Хендерсон, Лаллана, Вейналдум, Фирмино, Милнер, Ориги

(Коутиньо, 61).

Тўпурарлар:

Санчес (Арсенал) - 14та

Ибрагимович (МЮ) - 14та

Диего Коста (Челси) - 14та...

Келгуси ўйинлар:

21 январь (шанба)

17:30       Ливерпуль-Суонси

20:00       Борнмут-Уотфорд

20:00       Вест Бромвич-Сандерленд

20:00       Кристал Пэлас-Эвертон

20:00       Мидлсбро-Вест Хэм

20:00       Сток Сити-МЮ

22:30       Манчестер Сити-Тоттенхэм

22 январь (якшанба)

17:00       Саутгемптон-Лестер

19:15       Арсенал-Бернли

21:30       Челси-Халл Сити

Ўйиндан кейинги фикрлар:

Клаудио Раньери («Лестер» бош мураббийи): - Жуда яхши ўйнадик, аммо ютқаздик. Футбол шунақа. Хусусан, мен амалга оширган алмаштиришлар ҳам чакки эмасди. Ҳаттоки, 2та гол қўйиб юборганимиздан кейин Челси»дан ёмон кўринмадик. Ҳа, голлар олдини олганимизда эди, мутлақо бошқача футбол томоша қилардик. Алоҳида айтишим керак, шогирдларим Педро, Азар ва Виллианга ўйин беришмади, аммо «Челси»нинг барча футболчиларини шундай таъқиб остига олиш керак эди.

Антонио Конте («Челси» бош мурабббийи): - Иккинчи давра ҳисобидан иккинчи ўйинни ўтказдик. Энди ҳар бир очко учун кескин кураш боради. Муҳими, ҳамон етакчимиз ва тушунамизки, ҳар бир ғалабамиз ортимизда келаётганларга босим юклайди. Бугунги ўйинни «Тоттенхэм» ва «Арсенал»нинг натижаларини билган ҳолда бошладик. Бу қўшимча босим эди. Лекин ўз тажрибамизга суяндик. Зеро, буёғига очко йўқотмаслик талаб этилади.

Роналд Куман («Эвертон» бош мураббийи): - Бундай ўйинни қандайдир режага солиш мумкин эмас. «Сити»га қарши баҳслар доимо оғир кечади. Зеро, «шаҳарликлар» сифатли футбол кўрсатишга ўрганишган. Бугун айниқса, иккинчи бўлимдаги ҳаракатларимиз барча жабҳаларда идеал чиқди. Ўйлашимча, «Эвертон» шу ўйини билан энг илиқ мақтовларга муносиб.

Хосеп Гвардиола («Манчестер Сити» бош мураббийи): - Биринчи бўлимда гол уриш учун етарлича вазиятлар яратдик. Аммо улардан фойдаланолмаслик шундай оқибатга олиб келди. Бу футбол. Унда баъзан гол уриш учун кўп нарса талаб этилмайди. Буни «Эвертон» тўлиқ исботлади. Ахир мезбонлар танаффусгача дарвозамиз томон бир марта яқинлашишди ва гол... Ҳа, бу шогирдларим учун даҳшатли оқшом, шундай  натижа. Лекин ишончим комил, биз ўзимизни тиклай оламиз - кучлироқ ўйнашга қодирмиз.

Жозе Моуриньо («МЮ» бош мураббийи): - Ўта ёрқин учрашув. Ҳаттоки, бетараф мухлисларга ҳам шундай. Тўғри, ҳаракатлар ўта сифатли чиққани йўқ, аммо эҳтирос, фаоллик, шиддат, тажовузкорлик - барчаси ҳар икки жамоа мухлисларини охирги сонияларгача кучли ҳаяжонда ушлаб турди. Муҳими, биз охиригача курашдик. Рақиб эса ўта тартибли ўйин намойиш этди. «МЮ» ҳужум уюштирган жамоа бўлди, «Ливерпуль» эса ҳимояланган...

Юрген Клопп («Ливерпуль» бош мураббийи): - Кўпчилик ютқазишимизни тахмин қилди. Чунки «МЮ» ажойиб тезлик намойиш этаётганди. Кадрлар борасидаги муаммоларимизни назарда тутиб айтсам, жамоам жуда яхши ўйнади. Айнан шундай, қўрқмасдан ҳаракатланиш керак эди ва буни уддаладик. Ўз ўрнида, Ибрагимовичга қойил қолганимни тан олишим жоиз. У «МЮ»ни қутқарди. Хулоса шуки, ўйиндан 100 фоиз қониқдим.