Термизда «Сурхон» клубини қайта тиклаш масаласига бағишланган йиғилиш бўлиб ўтди. Унда Маданият ва спорт ишлари бошқармаси, вилоят футбол федерацияси, «Сурхон» ҳамда «Нефтчи» (Жарқўрғон) клублари раҳбарлари, мураббийлар, шаҳар, туман ҳокимларининг иқтисодиёт-тадбиркорлик масалалари бўйича биринчи ўринбосарлари, мутасадди муассасалар вакиллари, шунингдек, матбуот ходимлари иштирок этишди. Вилоят ҳокими - Эркинжон Турдимов олиб борган йиғилишда ҳудуд футбол федерацияси фаолияти танқидий таҳлил қилинди. Хусусан, футбол оммавийлигини ошириш ва ривожлантириш, моддий-техник базани шакллантириш бўйича мавжуд муаммоларга эътибор қаратилди. 2016 йилги мавсум якунига кўра, ўтиш турнирида муносиб қатнашиб, биринчи лига йўлланмасини қўлга киритган «Нефтчи» хусусида илиқ фикрлар билдирилди, бироқ Жарқўрғон туманидаги  стадион, шарт-шароитлар ва спорт базаси ПФЛ талабларига жавоб бермаслиги қайд этилди. Шу туфайли вилоят ҳокимлиги ва футбол федерацияси «Нефтчи» раҳбарияти билан келишган ҳолда, жорий йил биринчи лигада «Сурхон» клубининг қатнашишини расман маълум қилди.