“Динамо” – “Насаф” ўртоқлик учрашуви ниҳоясига еткач, бош мураббийлар Олег Тюлькин ва Рўзиқул Бердиевлар ўйин ҳақидаги фикрлари билан ўртоқлашишди.

Олег Тюлькин: «Асосийси натижа эмас, ўйин эди»

- Қизиқарли ўйинга гувоҳ бўлдик. «Насаф» билан ўтказилган ўртоқлик баҳси ҳар икки жамоа учун ҳам жуда муҳим бўлди. Бугун натижа асосий эмасди, ўйин муҳим эди. Яхши тайёргарлик кўра олдик. Ёшларимизни синаб олдик. Олдинда кубокда Зоминдаги ўйинда тўп сурсак, кейин «Навбаҳор» билан баҳс кутиб турибди. Йигитларни яхши тайёргарлик билан тўп суришлари учун ҳаракат қилаяпмиз. Самарқандда назорат учрашувида ҳам шунча мухлис келгани ажойибдир. Шу боис йигитлар дастлабки голни мухлисларга бағишлашди.

Рўзиқул Бердиев: «Самарқанд футбол билан яшамоқда»

- Бугунги ўйинни шахсан ўзим ўртоқлик учрашуви демаган бўлардим. Чунки ўйин кескин курашларга бой бўлди. Стадионда мухлисларнинг кўплигидан сезиш мумкинки, самарқандлик футбол ишқибозлари катта футболни соғиниб қолишган. Самарқанд футбол билан яшамоқда. Шунингдек, “Динамо” турнир жадвалида бекорга етакчилик қилмаётганини бугун кўрсатди. Бугун биз уларнинг жиддий қаршилигига дуч келдик. Кўриниб турибди, “Динамо”да мураббийлар яхши ишлашаяпти. Жамоа таркиб жиҳатдан анча ёш. Уларда иштиёқ жуда кучли. Ўйлайманки, бугунги ўйин ҳар иккала жамоа учун фойдали бўлди.