Ўзбекистон терма жамоаси ташвишлари билан тўла кунлар ҳам ортда қолди. Энди эътиборимиз марказида яна олий лига бўлади. Ўзбекистон терма жамоасини қўя туринг, ички чемпионатда ҳам янги мавсум биз учун кутилмаган совғалардан холи бўлмаяпти.

Хусусан, «Динамо» чемпионатда байроқдор бўлиб туришини ҳеч ким кутмаган бўлса керак. Агар воқеалар ривожи шу тахлит давом этаверса, самарқандликлар яқин кунларда пеш-қадамликни бой бериб қўйишмаса керак. Масалан, 4-тур тақвими бизга айнан шундай хулоса чиқариш имконини беради. Ушбу турда эътиборимизни учта ўйин тортди.

«ДИНАМО» - «НАВБАҲОР»

«Динамо» ушбу турда ўз майдонида «Навбаҳор»ни қабул қилиши лозим. Агарда кимдир мавсум бошланиши олдидан ушбу учрашув энг қизиқарлиларидан бири бўлади, деганда, аниқки, ишонмасдик. Бироқ «Динамо» 9 очко билан мусобақада етакчилик қилмоқда ва бу жамоанинг ҳар бир ўйини эътибор марказида бўлиши турган гап. Айтайлик, самарқандликларнинг 1-турдаёқ «Металлург»ни сафарда 2:0 ҳисобида мағлуб этишларини кимдир кутганмиди? Майли, «Шўртан»нинг йирик ҳисобда маҳв этилишини тахмин қилганлар бордир (3:0), аммо «Пахтакор»га қарши кечган ўйиндаги ғалаба-чи? Бунақа натижани кимдир олдиндан айта олармиди?

Агар мана шу мантиққа асосланиб фикр юритадиган бўлсак, «Навбаҳор»га қарши кечадиган ўйинда ҳам «Динамо» эртаги қай тахлит давом этишига қизиқиш бўлиши турган гап. Зеро «Навбаҳор» ҳам анойи жамоалардан эмас. Наманганликлар янги мавсумда нималарга қодирликларини кўрсатишга уринишлари аниқ. «Динамо» эса ўз мухлислари қаршисида юзи ерга қарамаслиги учун ҳам бор кучини ташлайди. Хуллас, Самарқанддаги ўйинни назардан четда қолдирманг...

«ЛОКОМОТИВ» - «ОЛМАЛИҚ»

«Олмалиқ»да янги мавсум олдидан жуда катта ўзгаришлар қилинди. Энг аввало, Игорь Шквирин бошчилигидаги мураббийлар штаби тўлиғича истеъфога чиқарилди ва ўрнига қозоғистондан Виктор Кумиков келтирилди. Шунингдек, таркибда ҳам анча ўзгаришлар бўлди. Бу эса «Олмалиқ» олдига янги мавсумда улкан натижалар қўйилганини тахмин қилиш имконини берарди. Аммо учинчи тур якунларига кўра, жамоа биргина очко жамғарди ва 15-ўринга тушиб кетди. Аммо ҳамма гап шундаки, мана шу биттагина очко ҳам «Бунёдкор»га қарши кечган ўйинда қўлга киритилди.

Гарчи Игорь Шквирин «Олмалиқ»дан кетган бўлсада, жамоа ўша эски одатини ташламаган кўринади. Яъни олмалиқликлар «Бухоро» ва «Сўғдиёна» каби у қадар кучли бўлмаган жамоаларга очколарни осон совға қилмоқдалар, аммо «Бунёдкор»дек етакчи клуб билан охирига қадар курашдилар. Бу эса 4-турда бўладиган «Олмалиқ» - «Локомотив» ўйинига эътиборни кучайтириши турган гап.

Кўрамиз, «Олмалиқ» бу турда ҳам «фаворитлар кушандаси» номига яраша ўйин кўрсатармикан?

«ОБОД» - «БУНЁДКОР»

Ўтган мавсум «Обод» ва «Бунёдкор»  ўртасида кечган учрашувлар у қадар эътиборни тортмаган ва бунинг сабабини қидириб узоққа бориш шарт эмас эди. Чунки «Обод» олий лигадаги илк мавсумини ўтказаётган дебютант клуб эди, «Бунёдкор» эса қай даражада катта тажрибага эга эканини ҳамма яхши билади. Шу боис бўлса керак, «қалдирғочлар» сафарда 4:0, ўз майдонларида эса 3:0 ҳисобида ғалабага эришдилар ва ҳамма бунга одатий ҳол сифатида қаради.

Аммо бу йил вазият анча ўзгаргандек. «Обод» билан-ку ҳаммаси жойида: янги мавсумда учта ўйинда 4 очко жамғариб, ниятлари жиддий эканини кўрсатди. Аммо «Бунёдкор» билан боғлиқ ҳодисалар кишини таажжубга ва керак бўлса, ташвишга солмоқда. Бахтиёр Бобоев ва Сергей Лушан бошчилигидаги клуб Осиё Чемпионлар Лигасида бирорта ҳам очко ишлай олмагани баробарида олий лигада ҳам «Сўғдиёна»ни аранг - 1:0 ҳисобида мағлубиятга учратди. «Олмалиқ» билан нурсиз дуранг қайд этганини эса аввалроқ айтиб ўтдик.

Шундай экан, энди «Бунёдкор»нинг «Обод»га қарши ўтказадиган ўйини ҳам алоҳида қизиқишга сабаб бўлиши турган гап. «қалдирғочлар» таркибида иқтидорли футболчилар жуда кўп, аммо ҳозирча уларнинг бир жамоа сифатида бирлашганини кўрмадик. Балки «Обод» билан бўладиган баҳсда ниҳоят ўша якдилликни кўрармиз?!

АБДУЛЛОҲ