ХХ асрнинг энг яхши футбол клуби - «Реал Мадрид»га оид сўнгги хабарлар, жамоа тарихи ва келажаги, клуб ҳақида қизиқарли факт ва статистикаларни батафсил ёритиб боришга ҳаракат қиламиз.

Қани кетдик бўлмаса...

Ҳа, «Қироллик клуби»ни апрель ойида жуда мураккаб ўйинлар кутиб турибди. Нейтрал мухлис учун «Реал»нинг ушбу ойдаги ўйинлари «иштаҳали» кўринмоқда, бироқ бу палла Зинедин Зидан ва унинг шогирдлари учун осон бўлмайди, ишонаверинг.

Мадридликларни 15 кун ичида «Атлетико» билан дерби, кейинчалик ЕЧЛда Мюнхеннинг «Бавария»си билан икки ўйин ва ундан сўнг «қаймоқранглилар»ни «Барселона»га қарши «эль-класико» кутиб турибди. Шунингдек, ушбу вақт оралиғида Ла Лигада жон сақлашга уринаётган «Спортинг» Хихонга қарши сафар учрашуви ҳам бор.

«Реал» клубининг апрель ойидаги учрашувлари:

2 апрель: «Реал Мадрид» – «Алавес»

5 апрель: «Леганес» – «Реал Мадрид»

8 апрель: «Реал Мадрид» – «Атлетико»

12 апрель: «Бавария» – «Реал Мадрид»

16 апрель: «Спортинг» – «Реал Мадрид»

18 апрель: «Реал Мадрид» – «Бавария»

23-24 апрель: «Реал Мадрид» – «Барселона»

25-26 апрель: «Депортиво» – «Реал Мадрид»

29-30 апрель: «Реал Мадрид» – «Валенсия»

Нисбатан осонроқ учрашувлар билан бошланадиган апрель ойи Зидан шогирдлари учун борган сари мураккаблашиб боради. Мадриднинг «Атлетико»си «Бернабеу»да «Реал»га ҳақиқий бош оғриқ бўлиши тайин.

Бунинг устига уларни тўрт кундан сўнг Карло Анчелотти бошқараётган «Бавария»га қарши сафар учрашуви кутиб туради. Орадан яна шунча вақт ўтгач мадридликлар енгил тин олишлари мумкин, катта эҳтимол билан Зидан «Спортинг»га қарши ўйинда захира кучларини майдонга ташлайди. Якшанба кунидаги ўйиндан икки кун ўтиб «Реал» ўзида «Бавария»ни қабул қилади, ким билади дейсиз, балки бу тўқнашув мадридликлар учун апрелнинг энг муҳим ўйинига айланар...

Аммо, хулоса қилишга шошилмаймиз, чунки «Барселона»га қарши «эль-класико» принципиаллик бобида юқоридаги барча муҳим ўйинларни «кўмиб» юбориши мумкин.

Ҳа, тўғри ушбу баҳсга икки жамоа ҳам анча куч йўқотган ҳолда етиб келади, «Барселона» бу ўйингача Туриннинг «Ювентус» клуби билан ЕЧЛ доирасида куч синашади.

Бироқ, бу фактлар баҳона бўла олмайди, бу баҳсда ушбу жамоаларнинг футболчилари икки ҳисса куч билан ҳаракат қиладилар, керак бўлса ва бу ўйин Ла Лига чемпионлиги масаласини ҳам ҳал қилиб қўйиши мумкин.

Ниҳоят... дейишга шошилмаймиз, «Реал»ни ой охирида ҳам осон ўйинлар кутиб тургани йўқ. «Қироллик клуби» апрелнинг сўнгги ҳафтасида принципиал рақиблари «Депортиво» ва «Валенсия»га қарши ўйнайди.

Зидан ушбу мураккаб даврдан жамоасини қандай олиб чиқади? Балки айнан шу давр франциялик мутаҳассиснинг ҳақиқий салоҳиятини кўрсатиб берар. Агар «Реал» ушбу «тўфон»га чап бера олса, май ойидаги совринларга биринчи рақамли даъвогар бўлиши мумкин.

Нима бўлган тақдирда ҳам, «Реал» ишқибозлари ҳар доим ўз севиклиларини олқишлайдилан ва унга охиригача ишонадилар.

HALA MADRID!!!