Беш йил аввал АПЛнинг энг ношуд легионери сифатида қайд этилган Антони Модест ҳозирда «Кёльн»даги сермаҳсул ўйинлари туфайли Франция терма жамоаси эшикларини дадил тақиллатмоқда.

Ғайритабиий феъл-атвори билан ном қозонган Дидье Дешам эса шундоққина тумшуғи остида ўта сермаҳсул ўйин намойиш этаётган Александр Лаказетт ва Антони Модестни эмас, олис Мексика чемпионатида тўп сураётган ҳужумчини термага жалб этмоқда.

Тиниб-тинчимас журналистлар эса нима учун 22та гол билан бундеслиганинг иккинчи тўпурари бўлиб турган Модестни терма жамоага чақирмагани ҳақидаги саволлар билан мураббийнинг «қулоғини узиб, қўлига ушлатишмоқда».

Афтидан, Дидье Дешамни ҳисобга олмаганда Антони Модестнинг Франция терма жамоасида тўп суришига қарши бўлган яна бир киши бор. У -  Мартиника ФФнинг президенти Самюэль Перо. Антонининг отаси шу митти оролда туғилиб ўсган. «Николья Анелька давридан бери ҳали ҳеч кимга бу қадар ашаддий мухлислик қилган эмасмиз. Умид қиламанки, Антони Модест ота юрти шарафини ҳимоя қилади», - дейди Перо.

Дарҳақиқат, Мартиникада вояга етган Ги Модест - собиқ футболчи. Аммо у Францияни забт этишга сал кечроқ, 22 ёшда қарор қилди. Шу сабабли фаолиятини «Сент-Этьен» ўринбосарлари, «Кан» ва «Шатеру» каби камтарин жамоаларда кўчманчилик билан ўтказди. Антони Канда дунёга келган пайтда Ги Модест бутсаларини михга илиб улгурганди.

«Кан кинофестивалига дунёнинг турли бурчакларидан таниқли кино ва спорт юлдузлари келишарди. Мен Арнольд Шварценеггер, Диего Марадона каби афсоналарни ўз кўзларим билан кўрганман. Мени Марадона ҳақидаги фильм премьерасига таклиф этишган», - дея хотирлайди Модест.

Франция терма жамоаси - азалий, лекин ҳозирча ушалмас орзу: 7 йил аввал Антони Эльяким Мангала, Муссо Сиссоко ва Антуан Гризманн билан ёшлар термасида тўп сурган, бироқ асосий жамоага ёлғиз Габриэль Обертан йўл олганди.

Ёшлар таркибига Модест илк марта «Ницца»дан таклиф этилганди. Ўйинлардаги маҳорат ва меҳнатсеварлик машғулотларда дангасалик билан алмашиб туриши боис ҳужумчи 2-лигадаги «Анже»га бериб юборилди. Мавсумни 20та гол билан якунлагач, Маруан Шамахни «Арсенал»га сотиб юборган «Бордо» эътиборига тушди. Янги жамоага маъшуқаси билан ташриф буюрган футболчини Ярослав Плашил самимий қарши олди. Бироқ жамоадошлари тўп билан таъминлашда меҳмондўстлик қилишмади. Оқибатда Антони «Бордо»даги 1,5 йил ичида атиги 15та гол урди. Аммо «Блэкберн»даги дебюти бунданда муваффақиятсиз бўлди. Тўғри, АПЛда ўз маҳоратини синовдан ўтказиш - ҳар бир футболчининг орзуси. Уларнинг ҳаммаси ҳам инқирозга юз тутган, рисоладагидек соҳиби ва мураббий бўлмаган жамоада ўйнашга рози бўлавермайди. «Блэкберн» элитани тарк этди, Антони жамоанинг «Арсенал»дан 1:7 ҳисобида енгилганига гувоҳ бўлди. «Вест Бромвич»га қарши баҳсда қизил карточка билан «мукофотланди». Аммо гол уришни уддалай олмади. Шу тариқа мавсумни АПЛнинг энг ношуд ўйинчиларидан бири сифатида якунлади. Кореялик Пак Чу Ён Модестдан ёмонроқ натижа қайд этган ягона футболчи бўлди.

Ҳозир Антони хавфли вазиятлардан унумли фойдаланиш борасида 28,2 фоиз кўрсаткични қайд этмоқда. Кучли бешлик чемпионатлари орасида фақат Фалькао, Лаказетт ва Каванининг натижалари юқорироқ. Ҳатто Обамеянг ва Левандовски ҳам унга тенглаша олишмаяпти. қисқаси, АПЛ сабоқларидан қаҳрамонимиз тегишли хулоса чиқарди: «Ҳеч кимдан хафа эмасман, инглиз тилини ўрганиб олдим-ку».

«Бастия»да фаолиятини изга солиб олган ҳужумчи «Хоффенхайм»­да Роберто Фирмино ҳамда Кевин Фолланд билан самарали ҳамкорлик қилди. Англиядаги омадсизликдан сўнг 5 йил ичида амалга оширилган парвоз чиндан ҳам ҳайратланарли - камтарин «Кёльн» шарафини ҳимоя қилаётган Модест жорий мавсум 22та гол билан бундеслига тўпурарлари сафида бормоқда. «Бавария» мергани Роберт Левандовски ҳамда «Боруссия» Д. вакили Пьер-Эмерик Обамеянг - Антонининг фахрий қўриқчиларидек, гўё.

Робертнинг ҳисобида 21та, Обамеянгда эса 23та гол бор. «Кёльн» дарвозабони Тимо Хорн франциялик жамоадошининг голлари рақобатчилариникидан кўра юқорироқ коэффициентга муносиб, деб ҳисоблайди: «Модест Обамеянг ва Левандовскидан олдинроқда юришга ҳақли. Чунки рақиблари ҳар бир ўйинда жамоадошлари томонидан яратилган 6-7та голли вазиятлардан фойдаланишади, Антони эса голни кўпинча ўзи яратади». Аммо франциялик ҳужумчи жамоадошларининг кўмагисиз ҳеч қачон 22та гол уролмаслигини таъкидлайди.

«Такалар» бош мураббий Петер Штёгер учун Модест - оддий ҳужумчи: «Аустрия» клубидаги Филипп Хозинер исмли ҳужумчи ҳам сермаҳсул ўйин кўрсатган. Бироқ бутун жамоа Хозинер учун ишларди». Нима бўлганда ҳам, Модестнинг жамоадаги аҳамияти катта - Антони гол уролмаган 11 учрашувда жамоа бирорта ҳам ғалабага эришолмаган ва атиги 6 очкони қўлга киритган. Модестнинг голлари эса «такалар»га 9та ғалаба ва 31 очкони тортиқ этган. қўшимчасига, жорий мавсумдаги голларнинг 59 фоизи унга тегишли - бундай кўрсаткич нафақат Германия, балки Европанинг ҳеч қайси мамлакатида йўқ!

Антони Модестнинг вазиятлардан унумли фойдаланиш қобилияти янада ҳайратланарли. «Ёшим 28га чиқди. Аввалгидан кўра ўзимга ишонадиган ва босиқ бўлиб қолганим боис, ўз ҳаракатларимни пухта таҳлил қиляпман. Ҳар бир учрашувни қайта кўриб чиқаман, тўпни қандай қабул қилганим ва узатаётганимни таҳлил қиламан. Бу кейинги ўйинларда камроқ хатоларга йўл қўйишимда ёрдам беради», - дейди ҳужумчи.

Тинимсиз изланишлар эвазига Антони самарали зарбаларни 25 фоизга етказиб, гроссмейстер нормативини бажарди, ҳозирда унинг кўрсаткичи 28,2 фоизга тенг. Ҳужумчининг муваффақиятларида жамоадошлари улуш қўшаётганларига шубҳа йўқ. Айниқса, «Кёльн»га хос бўлган вертикал футбол услубида қанотлардан амалга ошириладиган диагонал узатмаларнинг аҳамияти катта.

Бундан ташқари, Модест ортида ҳаракатланадиган Юйя Осако ҳам жамоадошининг сермаҳсуллиги йўлида ўзининг худбинлигидан батамом воз кечган: «Тўпни эгаллаган пайтимда Модестнинг қандай ҳаракат қилишини аниқ ҳис этаман. Бунинг учун бир марта нигоҳ ташлашим кифоя қилади», - дейди япониялик легионер. Олис масофадан йўлланган кучли зарба эвазига «Герта» дарвозасига урган ажойиб голини Осако ҳам каратэчилар услубида нишонлаганди. Муваффақиятни ўзига хос тарзда байрам қилишга мураббий ҳам қарши эмас - машғулотлардан холи пайтда ўйинчилар турли услубни ўйлаб топишади.

Бу борада ҳам Модест етакчилар сафида. Ўзининг 20-юбилей голини («Кёльн» футболчилари орасида бундай натижани 20 йил аввал Тони Польстер қайд этганди) «Герта» дарвозасига урган ҳужумчи лағмон тановвул қилаётган хўрандани тасвирлаш орқали нишонлаганди. Маълум бўлишича, мавсум бошланиши арафасида у жамоа шифокори билан гаров ўйнаган, агарда голлари 20тага етса шифокор Модестни, 20тадан кам бўлса, ҳужумчи шифокорни маззали спагетти билан меҳмон қилишга келишиб олишган экан. қувончли лаҳзаларда Антони оила аъзолари, фарзандлари учун ҳам қандайдир эътиборли ҳаракатларни амалга оширишни унутмайди. «Мен учун оила аъзолаарим биринчи ўринда туради. Улар куч-қувват бағишлашади. Кёльн ҳаётига тўлиқ мослашиб олдик, қизим уч хил тилда гаплаша олади», - дейди футболчи.

Мабодо унинг либосларида Мики-Маус тасвирини кўрсангиз, ажабланманг - бутсаларида фарзандларининг исмлари, туғилган саналари ёзиб қўйилган. Айнан шу оилапарварлиги ёзда Модестнинг Хитойга йўл олишига монеълик қилди. Ҳужумчининг ўтган мавсумдаги 15та голига мафтун бўлган «Пекин Гуоан» «Кёльн»га 20 млн. евро таклиф этган, Модестга эса йиллик 7,5 млн. иш ҳақи ваъда қилганди. Антони манфаатли таклифни рад этиб, хитойликлардан 3 марта камроқ иш ҳақи бераётган жамоа билан шартномани узайтирди: «Ўғлимнинг аллергияси бор, Германия илғор тиббиёт муассасаларга эга. Хитойда ўзини қандай ҳис этиши эса, менга қоронғу. Бу ёруғ дунёда ҳамма нарсани пул билан ўлчаб бўлмайди».

Ҳужумчининг Хитойдан воз кечганига бошқа сабаблар ҳам йўқ эмас - Антони барча орзуларини рўёбга чиқаришга улгурмади. Унинг кумири - Дидье Дрогба. «У Франциянинг қуйи лигаларидан энг юксак чўққиларга кўтарилди, кўплаб совринларни қўлга киритди. Мен эса бундай марралардан йироқман».

Дарҳақиқат, Дрогба 28 ёшли пайтида ЕЧЛда муносиб тўп суриб, ЖЧ иштирокчисига айланди. Модестда эса бундай натижалар йўқ. Балки у азалий орзуларидан бири - еврокубок баҳсларида майдонга тушишни кузда амалга оширар? Ҳар ҳолда, «Кёльн» ЕЛ йўлланмаларидан бирига даъвогарлик қилмоқда. қолаверса, ҳужумчининг жорий мавсумдаги ёрқин фаолияти ниҳоят, ўжар Дидье Дешамнинг қарорини ўзгартирар? Ахир мураббий Россия мундиалига Модестдек тўпурарни олиб бормаса, кимни олиб боради?!

Антони Модест

Жамоаси: «Кёльн»

қайси жамоаларда ўйнаган: «Бордо», «Блэкберн», «Хоффенхайм»

Энг яхши натижаси: 25та ўйин, 22та гол.

Энг яхши мавсуми: 2016|2017 - 22та гол

Бошқалардан ажралиб турадиган жиҳати: голларни эмедзи (каратэ услуби) орқали нишонлаш.

Унга аталган эътиборли фикр: «Агар тўп осмонга чиқиб кетган бўлса ҳам, Модест уни албатта, эгаллаб олади!» (Янник Герхардт).

СОДИҚЖОН РАҲМОНОВ тайёрлади

Anthony Modeste ● Goals ● 2016/2017 || Cologne (Koln) || HD