Россия премьер-лигаси тарихидаги энг яхши украиналик легионерлардан бири, яқинда «Зенит»­га мураббий сифатида қайтган Анатолий Тимошук ушбу вазифага тайинлангач, дастлабки катта интервьюсини Championat.сом сайтига берди. Қуйида ана шу суҳбатни ўқишингиз мумкин.

— Россия чемпионатлари тарихидаги энг яхши украиналик легионерлар орасида биринчи бўлдингиз. Сизнинг шахсий рейтингингизда кучли учликка кимлар кирган бўларди?

— Александр Горшков, Максим Калиниченко ва Александр Спивак.

— Ўзингизни Россияда легионердек сезармидингиз?

— Футболда ўзимни бегона ҳис қилмаганман. Энг муҳими шу. «Зенит»га келганимда Россия ва Украина чемпионатлари кўп жиҳатдан бир-бирига ўхшарди. Бу ерда катта иштиёқ билан ўйнаганман, майдонда бор кучимни сарфлардим. Шунингдек, мухлислар ҳам илиқ муносабатда эдилар. Мени қандай кутиб олишган бўлса, шундай кузатишган. Бу бир умр қалбимда қолади. Ўшанда уларга «Зенит»га қайтиш имконияти бўлса, албатта, қайтаман, деб ваъда бергандим. Мана, яна шу ердаман. Илк марта «Бавария»дан футболчи сифатида қайтгандим. Энди эса Петербургда мураббийман.

— Фаолиятингизни давом эттириш учун бошқа таклифлар ҳам бормиди ёки «Зенит» ягона вариантмиди? Масалан, «Шахтёр»га чақиришмадими?

— Бир қатор таклифлар олдим. Аниқ айтадиган бўлсам, улар учта эди. Аммо «Шахтёр» бу рўйхатда йўқ. «Зенит»ни танлашимнинг ўзига хос сабаблари бор. Бу ерда ажойиб футболчилар жамланган. Шунингдек, Луческудек мутахассисдан кўп нарса ўрганиш мумкин. Ёш мураббий учун бу ажойиб имконият.

— Фаолиятингиздаги энг асосий жамоангиз қайси - «Шахтёр», «Зенит» ёки «Бавария»?

— Тўғрисини айтсам, бу уч клубдан бирортасини алоҳида ажратиб кўрсата олмайман. Уларнинг ҳаммаси билан юқори марраларни забт этганман. Боз устига, охирги бир ярим йилни Қозоғистонда ўтказдим. Фаолиятимнинг бу қисмини ҳам ёмон ўтди, дея олмайман. Ўзим ўйнаган ҳар бир жамоада бор имкониятимни ишга сол­ганман. Умуман олганда, мен учун асосий ёки иккинчи даражали клубнинг ўзи йўқ.

— Петербургга қайтишингизда нима асосий роль ўйнади? Сизни Луческу чақирдими ёки «Зенит»?

— Луческудек мутахассис билан амалиёт ўтказиш имконияти туғилганда, ортиқча ўйлашга ҳожат йўқ. Бу гап клубга ҳам тегишли. «Зенит» таклиф қилганда, иккиланиш ярамайди. Бир фактор иккинчисини тўлдирди. Энг муҳими, бу ердалигимдан хурсандман.

— Мураббийлик фаолиятингизни ассистент сифатида бошламоқчимидингиз ёки бирор кичикроқ клубни бошқариш нияти бормиди?

— Ҳаммасининг ўз вақти келади. Ҳозир мен учун энг муҳими - мослашиб олиш. «Зенит»га мавсумнинг қайноқ вақтида келдим. Шу боис ҳам ишга жиддий киришиб, йигитларга ёрдам беришим лозим.

— Сиз тўп сурган пайтдан бери Мирча Луческу қанчалик ўзгарган?

— Барчамиз йил ўтгани сайин тажрибали ва ақлли бўлиб борамиз. Луческу ҳамон амбицияларга бой. Фаолияти давомида кўплаб ютуқларни қўлга киритганига қарамай, бир жойда тўхтаб қолишни истамайди. Замонавий футболда уни бирор нарса билан ажаблантириб бўлмайди.

— Қайси тилда гаплашасизлар?

— Рус ва инглиз тилларида.

— Сиз билан бирга ўйнаган Данни, Кержаковлар билан муносабатларингиз қандай? Оралиқ масофани сақлайсизларми ёки яқинмисизлар?

— Ҳозирги таркибдаги футболчиларнинг кўпи билан бирга ўйнаганман. Данни ва Кержаковдан ташқари, Ломбертс, Лодигин, Нету ва Кришито ҳам бор. Айни пайт уларнинг мураббийи эмас, катта акасидекман.

— Мавсумнинг дастлабки қисмида «Зенит» иштирокидаги баҳс­ларни кузатдингизми?

— Албатта. Биринчи даврада «Зенит» бир қатор ёрқин ўйинлар намойиш қилди. Умуман олганда, Россия чемпионатидаги барча жамоаларни кузатиб бораман.

— Луческу ҳакамлар ҳақида кўп гапиради. Уларнинг муаммоларини сездингизми?

— Ҳар бир жамоа бундай ҳолатга дуч келган. Қайсидир пайт ҳакам сизга «ён босса», бошқа сафар рақибга шундай «илтифот» кўрсатади. Муҳими - хатолар давомий бўлмаслиги лозим.

— Сиз Луческу, Адвокат ҳамда ван Гал каби мураббийлар билан ишлагансиз. Уларнинг орасида қай бири кўпроқ эркинлик беради?

— Адвокат юмшоқроқ. Умуман олганда эса, сиз номини санаган мураббийларнинг барчаси машғулот жараёнида ўта қаттиққўллар.

— Қозоғистонга кетиш хато бўлмаганмиди?

— Албатта, бошқа таклифлар бўлган. Аммо мен учун «Қайрат»нинг чорлови қизиқарлироқ эди. Қозоғистонга борганимдан афсусланмайман.

Абдураҳмонхўжа АҲМЕДОВ тайёрлади