«Локомотив» (Москва) ярим ҳимоячиси Жефферсон Фарфан «Советский спорт» нашрига берган интервьюсида Россиядаги дастлабки ўйини, Перуда ўтган болалик онлари ва ўзи бирга ишлаган мураббийлар ҳақида гапириб ўтди.
- «Локомотив»даги дастлабки учрашувингиздаёқ гол урдингиз. Бу фаолиятингиздаги энг яхши дебютми?
- Энг яхшиларидан бири. Лекин муҳими - бу гол бизга уч очко келтирди.
- «Уфа» билан бир ҳафтада иккита ўйин ўтказдинглар. Шулардан қай бири қийин кечди?
- Иккиси ҳам. Бири сафар ўйини, иккинчиси эса Россия кубоги ярим финали эди. Қандай осон бўлиши мумкин? Хайриятки, ҳал қилувчи баҳс йўлланмасини қўлга киритдик.
- Финалдаги рақиб - «Урал» ҳақида тасаввурга эгамисиз?
- Рости, бу клуб тўғрисида кўп нарса билмайман. Финалга чиқибдими, демак яхши жамоа.
- Иккита ўйинда майдонга тушдингиз. Бир нечтасини трибунадан кузатдингиз. Россия чемпионати кутганингиздек ўтяптими?
- Ҳа, кучли мусобақа. Руслар ўлкасида ўйнаган дўстларим Кураньи, Хурадо, Самбранолар билан гаплашгандим. Улар бу лиганинг яхшилигини айтишганди. Россияга келганимдан сўнг гаплари ҳақиқат эканига ўзим гувоҳ бўлдим.
- Ари иккингиз тезда дўстлашиб олдингиз...
- У билан Голландия чемпионатида бирга ўйнаганмиз. Мен ПСВда, у эса АЗда. Ўшанда танишиб қолгандик. Ари жамоаси сафида кўплаб голлар урган. АЗ эса чемпионлик йўлида ПСВ рақобатчиси ҳисобланган. Ҳозир бир уйда яшаяпмиз. Умуман олганда, бразилиялик бошқа футболчилар - Гилерме ва Майкон, россиялик футболчилар билан ҳам муносабатларимиз яхши. Фақат маҳаллий тил муаммоси борлиги учун баъзан қийинчиликка дуч келаман.
- Тилни ўзлаштириш ниятингиз борми?
- Аста-секин мулоқот жараёнини ўрганяпман. Ишончим комил, тез орада рус тилида нимадир дея оламан.
- Кураньи сизни гол урувчи машинага қиёслаганди. Мавсум якунлангунча қанча тўп киритмоқчисиз?
- Биринчи галда ўз голларим билан жамоага ёрдам берсам дейман. Индивидуал статистика ҳақида ўйламайман, аммо ҳамиша ўз олдимга юқори мақсадлар қўяман.
- Перу термасидан чақирув кутяпсизми?
- Айнан шунинг учун меҳнат қиляпман. Агар ишларим юришиб кетса, миллий жамоага қайтишим аниқ.
- Лимага саёҳат қандай кечади? Бир сутка сарфлайсизми?
- Деярли. Аввал Амстердамга бораман. У ерда олти соат кутаман. Кейин Перугача 12 соат учаман. Ўртача 20 соат кетади.
- Перу термасининг ашаддий рақиби қайси жамоа?
- Чилиликларга қарши ўйинлар бизнинг маҳаллий дербимиз ҳисобланади. Учрашувлар эҳтиросларга бой тарзда кечади, қайсидир жиҳатлари билан Бразилия-Аргентина тўқнашувига ўхшаб кетади.
- Бутун Жанубий Американи айланиб чиққандирсиз?
- Фақат футболчи сифатида, иш билан. Саёҳатга вақтим йўқ. Биз ҳамиша йўлдамиз. Бирор жойни томоша қилиш учун вақт бўлмайди.
- Парвоз ҳақида гапирсак, қайси мамлакатга учиш қўрқинчли бўлган?
- Кучли турбулентлик ҳақида сўраяпсизми? Жанубий Америкада бу одатий ҳол. Ҳар сафар самолёт титраганда қўрқиб кетаман.
- Тоғли ҳудудда ўйнаш қийинми?
- Жудаям. Айниқса, Боливияда. Лекин ўрганишга мажбурмиз. Баъзи учрашувларнинг танаффус пайтида айрим футболчиларга кислород ниқоблар керак бўлади. Айтганча, Перунинг тоғли ҳудуди - Кускода ҳам ўйин ўтказадиган жамоа бор.
- Перу нимаси билан фахрланади?
- Меҳмондўстлиги билан бўлса керак. Биз очиқ инсонлармиз. Шунингдек, қадимий маданиятимиз - Мачу-Пикчу бор. Бундай жойлар мамлакатда жуда кўп.
- Бошқа тарафдан, Перуда зилзилалар кўп учрайди.
- Болалигимда бир неча марта кучли ер силикинишлари рўй берган. Лекин мана, 20 йилдан бери Европада яшаяпман, аммо бундай кучли зилзилалар гувоҳига айланмадим.
- Айтишларича, Перуда одамлар кучсиз ер силкинишларига ўрганиб қолишган экан.
- Жуда кучли зилзилалар кам бўлади, кучсизларини ҳеч ким сезмайди. Умуман олганда, бу каби табиий ҳодисалар провинцияларда кўп учрайди.
- Фаолиятингизни қандай бошлагансиз?
- Етти-саккиз ёшимда маҳаллий мактабда футбол ўйнашни бошлаганман. Орадан уч йил ўтиб, «Альянса Лима» клубига ўтганман. 16 ёшимда эса Перу чемпионатида дебют қилганман.
- Перуда, айтайлик, Бразилиядан кўра профессионал футболчи бўлиш осонроқми?
- Ҳеч қаерда осон эмас. Бизда иқтидорлар кўп. Лекин уйларидан узоқ бўлишни исташмагани учун Европада перулик футболчилар кам. Энг катта муаммомиз - менталитет. Ўйинчилар оилаларини тез соғинишлари туфайли «кўҳна қитъа»га боришни исташмайди. Шу боис ҳам бутун фаолиятларини Перуда ўтказишади.
- Деярли барча бразилиялик футболчилар ота-оналарига ёрдам бериш учун болалик пайтлари меҳнат қилишган. Сизда қандай бўлган?
- Бизда ҳам шундай. Аксарият болалар ота-оналарига ёрдам бериш учун ишлашади. Бу Жанубий Америкада одатий ҳол. Менимча, 95 фоиз футболчи болалигида жисмоний меҳнат билан шуғулланган бўлса керак.
- Сиз нима иш қилгансиз?
- Машина ювардим, нималарнидир сотардим.
- 16 ёшимда дебют қилганман, дедингиз. Бу Перу чемпионати учун рекордми?
- Мен биринчи бўлмасам керак.
- Перуда ўйнаганингизда ягона таклиф ПСВдан тушганми ёки рақобатчилар ҳам бормиди?
- ПСВ энг охиргиси эди. Кўп таклифлар бўлган. Оилам ва агентим билан маслаҳатлашиб, ПСВни танлаганмиз. Адашмаган эканман. У ерда кўплаб совринларни ютдим, ажойиб тўрт йилни ўтказдим.
- ПСВда Гус Хиддинк қўл остида ўйнагансиз. Унинг маслаҳатларини эслайсизми?
- Хиддинк - менга Европа футболи эшикларини очган инсон. Ҳамиша қўллаб-қувватларди, кўп мулоқот қиларди.
- Аксарият хорижлик футболчиларнинг айтишича, Россия клубларидаги энг қийин онлар мавсумолди йиғинларга тўғри келаркан. Сиз бунга нима дейсиз?
- Жамоага йиғинлар пайтида келдим. Яна бир қийин жиҳати - анчадан бери футбол ўйнамай, якка тартибда шуғулланаётгандим. Ҳозир ўзимни яхши ҳис қиляпман.
- Энг ёмон йиғин Магат билан бўлганми?
- Ҳа, ўта қийин. Унинг йиғинидан чиққан футболчилар бемалол марафонда қатнашсалар бўлади. Тайёргарлик шунчалик оғир эдики, худди урушга кетаётгандек тайёрлашарди. Танаффуссиз уч кун югуришимиз мумкин эди.
- Шундан кейин ҳам Магат қайсидир футболчи учун ёқимли мураббий бўлганми?
- Уни ёмон кўришарди, дея олмайман. Футболчиларнинг Магат билан муаммолари бўлмаган. Шунчаки, бундай оғир машғулотларга ўрганиш қийин. Инсон сифатида у ҳурматга лойиқ.
- Сиз билан ўйнаган энг яхши футболчи...?
- Кимнидир алоҳида ажратиб кўрсата олмайман. Аммо собиқ жамоадошларимдан уч нафарининг номини айтишим мумкин. Филипп Коку ПСВнинг муҳим ўйинчиси бўлган. Рауль - ажойиб футболчи. Юлиан Дракслер - бўлажак юлдуз.
- Қайси ҳимоячига қарши ўйнаш қийин бўлган?
- Яна уч кишини айтаман: Мальдини, Роберто Карлос ва Матерацци.
Жафъарали БОБОХОНОВ тайёрлади
Манба: www.iff.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20