«Шанхай СИПГ» яримҳимоячиси Одил Аҳмедов нега «Краснодар» клубини тарк этгани ҳақида гапириб берди.

«Россияга қайтмайман, 2-3 йил Хитойда ўйнаб, кейин уйга қайтаман. Вақти келди. Шалимов «Краснодар»ни бошқарганида, у билан бор йўғи бир марта гаплашганман. Ўшанда мураббий менга: «Сенга майдон марказида жой йўқ. Гап тамом» - деган. Балки унга ўйин услубим ёқмагандир. Нима ҳам дердим...

Шалимов қўли остида ўз нуқтамда бирор марта ўйнамадим, гоҳ чап, гоҳ ўнг қанотда майдонга туширилдим. Ахир мен марказий яримҳимоячиманку?! Қанотларда самарадорлигим икки баробар пасайиб кетадику?!

Хуллас, мураббий билан бўлган суҳбатдан сўнг, кетишга қарор қилдим. Вазиятни таҳлил қила туриб, 2017 йилда «Краснодар»да ҳеч нарсага эришолмаслигимни тушундим.

Ўзим «Краснодар» ўйинларини кузатмайман. Танишларимнинг гапига кўра, ўйин унчалик яхшимас. Бу «Краснодар» бошқача ўйнамоқда, аммо Кононов қуйиб кетган пойдевор ҳалиям мавжуд. Кейинги мавсумда Шалимов билан нималарга эришилиши катта сўроқ остида турибди.

«Краснодар» хўжайини Сергей Николаевич Галицкий Россия футболи учун кўп нарса қилмоқда. Унинг жамоаси чемпион бўлиб, Европа лигасининг финалида ўйнашга муносиб. Жамоадан кетишим маълум бўлгач, Галицкий билан боғландим, унга миннатдорчилик билдирдим. Айнан у мени Краснодарга таклиф қилган эди. Биламан, унга ўйиним ёқарди. Бундай инсон билан ишлаш ёқимли бўлган» - деди Аҳмедов «Футбол» ҳафтаномасига берган интервьюсида.

«Шанхай СИПГ» яримҳимоячиси Одил Аҳмедов Хитойдаги фаолияти ҳақида гапириб берди.

«Хитойга кетишимдан олдин, араб клубларидан таклиф олдим. Улар мени анчадан буён «таъқиб» қилиб келмоқда. Яна бир вариантда Франция чемпионатига ўтишим ҳам мумкин эди. Аммо улар менинг трансфер нархимни кўтара олишмади. «Шанхай» эса керакли пулни беришга рози бўлди.

Ҳозир «Краснодар»дагидан сал зиёд маош олмоқдаман. Бироқ, Хитойга пул учун келмадим. Мен учун пул масаласи ҳеч қачон биринчи даражали бўлмаган.

Янги лимит туфайли, Суперлига ўйинларида уч нафар легионерни таркибга киритиш мумкин. Бошқалар эса захира ўриндиғида ҳам ўтирмаслиги шарт. Шу туфайли бош мураббий таркибни тез-тез ўзгартириб туришга мажбур. Бир ўйинда майдонга тушсам, кейингисида дам оляпман. Агар бош мураббийимиз Виллаш-Боаш лимит жорий қилинишини билганида, яна бир легионерни, яъни мени таклиф қилиб ўтирмасди. У менга: «Ротация қилишга мажбурман, тўғри тушун» - деди. Мен тушундим.

Мухлисларга қойилман. Биринчи марта келганимда, аэропортда гуллар билан кутиб олишди, бунақаси ҳеч бўлмаган. Одамлар чин дилдан футболга мухлислик қиларкан. Ютасанми, ютқазасанми, уларга фарқи йўқ. Ҳар доим қўллаб-қувватлаб ўтиришади.

Жамоадошим Халкни россиядагиларданам жуда яхши кўришади, бу аниқ. Одамлар уни кўрганида, хурсандчиликдан бақириб юборишади. Қаерга борсак ҳам шу ҳолатни гувоҳи бўламиз. Ўз уйимиздаги ўйинларда эса камида 25-30 минг томошабин ташриф буюради» - деди Аҳмедов «Футбол» ҳафтаномасига берган интервьюсида.