“Бунёдкор” – “Ал-Аҳли” учрашуви олдидан ташкил этилган матбуот анжуманининг биринчи қисмида жиддаликлар устози ва жамоа дарвозабони қатнашди.

- Эртанги баҳс биз учун жуда муҳим. Гуруҳ босқичи якунига етмоқда. Очколар сарҳисоб қилинадиган паллада турибмиз. “Бунёдкор”нинг кейинги босқичга чиқиш имконияти йўқолган бўлса-да, рақиб ўз обрўсини сақлаш учун ғалабага ўйнайди, деб ўйлайман. Ўз навбатида “Ал-Аҳли” ҳам фақат ғалаба қозониш учун майдонга чиқади.

Осиё Чемпионлар лигаси қитъанинг энг нуфузли турнири ҳисобланади. Бизда ички чемпионат якунланган бўлишига қарамасдан, мухлисларимизни халқаро турнирда хурсанд қилишга ҳаракат қиламиз. Саудия Арабистони чемпионатида савияли ва бир-бирларига муносиб жамоалар кўп. Аниқроғи рақобат кучли. Чемпионлар лигасида эса бироз бошқачароқ. “Бунёдкор”нинг бирон футболчисини ажратиб ўтирмоқчи эмасман, рақиб жамоа сифатида кучли, - дейди “Ал-Аҳли” устози Кристиан Гросс.

- Эртага қўлга киритиладиган уч очко бизни кейинги босқичга олиб чиқиши мумкин. Рақибнинг устун томони шуки – уларда босим йўқ. Мураббийлар томонидан бериладиган кўрсатмаларни тўлиқ бажарсак мақсадимизга эришамиз, - дейди “Ал-Аҳли” посбони Ёсир Ал-Мусайлим.