«Лацио»-«Наполи» ўйинининг 25-дақиқаси. Жоржиньодан тўпни қабул қилиб олган Мертенс қаршисидаги рақибни алдаб ўтиб, чап қанотдан олдинга интилаётган Гамшикка «пас» берди. У эса янада илгари бориб, дарвозабон қаршисида турган Кальехонга ажойиб узатма йўллади. Испаниялик футболчи биргина ҳаракат билан ҳисобни 0:1 шаклига келтирди. Иккинчи бўлимда 1 рақами 3га ўзгарди...

Маурицио Сарри бошқараётган «Наполи»нинг ўйини мана шундай. Ҳимоядан ҳужумга тезкорлик билан ўтиш ва қисқа «пас»ларнинг ўта аниқлиги. Деярли «Барселона». Аммо «Ювентус» билан ўйнаган эмас, мукаммал «Барселона». Дарвоқе, таъкидлаб ўтиш лозим, неаполликларга қарши ўтган икки ўйин «Юве» учун ажойиб тайёргарлик вазифасини ўтади ва шунинг учун ҳам Энрике шогирдлари туринликлар томонидан йирик ҳисобда мағлуб этилди. «Лацио» билан бўлган ўйинда Жоржиньо узатмаларнинг аниқлиги бў­йича топ-5 чемпионатларида рекорд ўрнатди - 151та. «Наполи» эса тўпга эгалик қилиш бўйича «А» серия­даги ҳар қандай жамоадан яхшироқ кўрсаткичга эга: ўртача 59 фоиз.

«Биз жамоамизга ҳамжиҳатлик бағишламоқчимиз», - деди Сарри ўйиндан кейинги матбуот анжуманида. Натижалар эса чакки эмас: ҳозирги «Наполи»ни фаоллик ва прессинг туфайли бир лаҳзада таниб олиш мумкин. Жамоа мудом «биринчи рақам» остида ўйнаяпти, миттигина Инсинье ва Мертенслар эса олдинги чизиқда мўъжизалар яратишмоқда. Умуман олганда, бельгиялик футболчи мавсум кашфиёти даражасига кўтарилди. Бу ўринда гап фақат унинг самарадорлигида эмас. Шунчаки, қанот ҳужумчиси сифатида танилган Мертенс Миликнинг жароҳати туфайли марказга жойлаштирилди-ю, нафақат «алдамчи тўққиз», балки тўлақонли марказий ҳужумчига айланди-қолди. Авваллари тенгсиз бўлган Милик ва Паволеттилар эса энди захирада ўтиришибди. Ажойиб топилма!

Саррининг ўйин услуби унчалик мураккабмас. Лекин энг муҳими, у италияликларга хос консерватор ҳам эмас. У - чиниққан теорик бўлиб, Арриго Саккидан кўп нарсаларни ўзлаштирган. Қизиғи шундаки, Маурицио мураббийлик курсисига худди севимли хоббидек қарайди. «Мен футбол ўйнаганман, аммо очиғи, бош­қалардан яққол ажралиб турадиган иқтидор эгаси эмасдим. Шунинг учун доим мураббийликни орзу қилардим. Қарангки, айни пайтда жон деб бепул қилишим мумкин бўлган иш учун каминага ҳақ тўлашмоқда».

Маурицио ўз ғояларини қадрлайди, бироқ уларга жон-жаҳди билан ёпишиб олмайди. Дейлик, севимли 4-3-1-2 схемаси қайсидир футболчининг йўқлиги учун панд берадиган бўлса, «Наполи» дарҳол 4-3-3 га ўтиб олади. Саррини ҳурмат билан «маньяк» деб аташади. Зеро у машғулотларда шогирдларини сира аямайди. Масалан, унинг бир иш кунида 13 соат фақат футболга ажратилган. У рақибларни мукаммал ўрганиш билан бирга, кўп ўқийди ҳам. Стандарт вазиятлардан фойдаланиш ҳақидаги машҳур 33 вариантни мутолаа қилгани учун Саррига бир вақтлари «Мистер 33» лақабини қўйиб олишганди. Аммо Мауриционинг айтишича, у мазкур усулларнинг 4-5тасидан фойдаланади, холос.

Хуллас, йилнинг энг яхши мураббийига аталган «Олтин курси-2016» соврини муносиб инсонга топширилди. Чунончи, «Наполи»ни бошқараётган 56 ёшли мутахассис мисолида кўрдикки, инсон ўз меҳнатлари билан топ-даражага етиши мумкин. «Мени совринлар ҳеч қачон қизиқтирмаган. Аммо бу гал ҳаммаси бошқача. Чунки ғолибни ҳамкасбларим - мураббийлар аниқлашди. Мукофотдан сўнг янада кучлироқ иштиёқ билан ҳаракат қиламан». Албатта, юқоридаги гаплар инсоннинг камтарлигидан дарак. Лекин баъзида Маурицио қизишиб кетиб, кераксиз сўзлардан ҳам фойдаланиб юборади. Бунга мисол қилиб, Манчини билан рўй берган воқеани келтириш мумкин. Ўшанда Сарри унча-мунча бетчопар ҳам айта олмайдиган жумлаларни ишлатганди.

Шубҳасиз, Сарри - ажойиб мутахассис. Аммо «Реал» ва «Юве»га қарши ўйинлардан келиб чиқсак, Мауриционинг «Наполи»си бундан ортиғига қодир эмасдек туюлади. Тактика, интизом, кадрлар ечими - бу ажойиб. Бироқ Серхио Рамос ёки Гонсало Игуаин каби футболчиларга қарши тура олиш ҳам осон эмас. Игуаиннинг ўтган йили Сарри ихтиёрида бўлгани эса икки карра аламли. Қолаверса, статистика бўйича ўзиб кетилса-да, турнир жадвалида «Ювентус»дан ортда қолишдан нима наф?!

Ҳа, Неаполда ўсиб-улғайган Сарри учун ҳозирги иш ўрни - орзумонанд жой. Лекин футболдаги барча мақсадларига эришиш йўлида унга биргина нарса - жамоавий соврин камлик қилмоқда. Қўйиб берилса, Маурицио «Наполи»да ҳали яна узоқ йиллар фаолият юритиши мумкин. Аммо у ўзининг «Игуаин» ёки «Рамос»ларига эга бўлмаса, ҳеч қачон устози Арриго Саккига тенглаша олмайди. Тан олиш керак, ҳозирги «Наполи» - ажойиб жамоа. Бироқ «Мистер 33» янада баландроқ курсига ўтирса, бизнингча, ёмон бўлмасди.

И.РАҲИМОВ тайёрлади