Европа Чемпионлар лигасининг ярим финал илк баҳсидан ўрин олган учрашувда «Реал Мадрид» «Сантьяго Бернабеу» стадионида «Атлетико»ни тор-мор келтирди.

Ўйин ҳақида

Ўйиннинг биринчи бўлимида Қироллик клуби вакиллари кўплаб ҳужумлар уюштирдилар ва португалиялик ҳужумчи учрашувнинг 10-дақиқасидаёқ жамоасини олдинга олиб чиқди. Шундан кейин мухлислар биринчи бўлимда бошқа гол кўрмадилар, ҳамда таймнинг охири Дани Карвахалнинг жароҳат олгани билан эсда қолди.

Иккинчи бўлимда ўйин темпи бироз тушди ва «Реал» рақиб дарвозаси ёнида хавфли вазиятларни кам содир этди, бироқ бу ҳолат майдон эгаларининг иккинчи голига қадар давом этди. Учрашувнинг 73-дақиқасида Криштиано ўйиндаги дублини нишонлади, 86-дақиқада эса ўзининг ва жамоасининг учинчи голини киритди ва «Реал»га йирик ҳисобдаги ғалабани тақдим этди.

Статистика ва рейтинг

Учрашувда футболчиларга қўйилган баллар билан танишинг:

Турли кўрсаткичлар бўйича топ-5:

Рақамлар, рекордлар ва қизиқарли фактлар

Роналду ЕЧЛ плей-оффида кетма-кет икки бор хет-трик қайд этган илк футболчига айланди;

Роналду «Реал» сафидаги 400-голини киритди (Ла лигада – 281 та, ЕЧЛ – 88, Испания Кубоги – 22, Клублар ўртасидаги ЖЧ – 4, Европа Суперкубоги – 2, Испания Суперкубоги – 3);

Роналду ЕЧЛ ярим финалларидаги 13-голини киритди ва бу борадаги рекордни янгилади;

Роналду «Атлетико»га қарши кечган ўйинларда энг кўп гол (21) урган футболчига айланди;

Роналдунинг ЕЧЛдаги голлари 103 тага етди ва бу бутун мусобоқа давомида «Атлетико»нинг киритган голлари (100) сонидан кўпдир;

Роналду ЕЧЛ гуруҳ босқичининг олти ўйинида бор йўғи 2 та гол киритди, плей-оффнинг бешта учрашувида эса 8 та!

Хулоса ўрнида

«Мадрид» ўз майдонида идеал ўйин намойиш этди. Қироллик клуби футболчиларининг ҳар бири Швейцария соатларидек аниқликда ишлади. «Атлетико» биринчи бўлимда рақибига анча-мунча имкониятларни тақдим этди. Меҳмонлар фақатгина тезкор қарши ҳужумларгагина умид қилдилар. Симеоненинг қарши ҳужумга қаратилган тактикаси деярли ўхшамади. Фақатгина бир вазият: Кевин Гамейронинг бирга-бир чиққан ҳолати бундан мустасно.

«Атлетико» футболчиларини питбул итларига ўхшатишади, улар ўткир тишлари билан рақибларини қаттиқ тишлайдилар ва 90 дақиқа давомида қўйиб юбормайдилар. Бироқ, «Атлетико» «Бернабеу»да Годин, Габи, Коке ва бошқа «тиш»ларини кўрсата олмади. Иккинчи бўлимда мезбонлар тўпни рақибга топширдилар, аммо «Атлетико»даги вазият ўзгармади.

0:1 – «Атлетико»га икки ўйинли баҳс учун қониқарли ҳисоб эди ва меҳмонлар буни жуда яхши тушиниб турган эдилар. «Атлетико» таваккал қилиш ва гол киритишга уринишдан кўра, ҳотиржам ўйнаб, ҳисобни ушлаб қолишга уринди.

Криштианонинг бир ўзи ўйин тақдирини ҳал қилди. «Атлетико» мана шу ўйини билан «Висенте Кальдерон»да ҳеч қанақасига ҳозирги «Реал»га учта гол кирита олмайди, ишонаверинг.

Шундай таъсурот уйғонмоқдаки, Европада Зинедин Зидан жамоасига қаршилик қила оладиган фақатгина биргина клуб қолди. Ўша жамоа Кардиф томон қадам ташлаш учун бугун «Луи II» стадионида ўйин олиб боради. Тан олайлик, «Монако» ва Мбаппе ҳозирги «Реал» ҳамда Криштианонинг йўлини тўсолмайди. Қолган жамоаларга ҳурматни сақлаган ҳолда шуни айтиш мумкинки, финалда «Реал» – «Ювентус» қарама-қаршилигини кўриш жуда қизиқ бўларди...

HALA MADRID!!!